Tuunnu’ Itna ~ Thawnpu

Tuunnu’ Itna ~ Thawnpu

Simlei tongluan zatam’ cin loh
Simlei vannuai piandang sak thei
A mi zata’ neih loh theih loh
Mimbang pianna Tuunnu itna.

Bei hun nei lo, a tul ngei lo
Hun na ngawngin a taih zawh loh
Bangmah peuhin susia zo lo
A deih huai pen Tuunnu’ itna.

A manpha bel tehpih om lo
Simlei hauhna sum le paai tawh
Lei theih hi lo, zuak theih hi lo
Manpiak kul lo Tuunnu’ itna.

Ahau azawng akua ci lo
Apil amawl deidan nei lo
Khal tui luangbang kiam hun nei lo
A kikhel lo Tuunnu’ itna.

Amoi aham, akua om lo
Koimun koikuam sawlbang hei zong
Banghun banghun ngilh theih hi lo
Lailung phawng den Tuunnu’ itna.

Simlei nuntak lungmuan om lo
Haksat’ meeipi hong zing mah leh
Daibang nawk ding lung ka lau lo
Ka thahatna Tuunnu’ itna.

Simlei nuntak lung ka lau lo
Lenpih gual tawh tanbang kim ta’ng
Hiciang ka tun kei tha hi lo
Maciang hongpi Tuunnu’ itna.

Simlei nunsung thuh zawh hi lo
Siammang’ itna duang in sun ee
Sianmang sil piak a tul thei lo
Vondeih ading Tuunnu itna.

By: tpthawnpu
May 4, 2010
Happy Mother’s Day!

[Nu aw, na vondeih in hih lapau suut in kong pahtawi hi].