Ka phawk khak thu pawlkhat ~ Pu Thangboi

Ka phawk khak thu pawlkhat ~ Pu Thangboi

1997 kum hi. TBC-Y pawlpi apianma deuh hi. YZBC pawlpi makai in Zangkong a Zomi khangnobup Summer Music Training cih thulu tawh music nasia tak in hong hilh uh hi. Ahilh siate lakpan ka theih lai te: Sia Zam Kham (Tu’n Happy Family music sang, Mandalay), Sia David Suum (Tu’n senior pastor of Grace AG cum Director of GMI), Sia Zen Lian, U Cinpi (Lazy club), Pu Zam Za Mung (S 1 of ZCD), Sia Nang Sawm Piang, (L) Sianu Dim Kham, (L) Ka U Heavy Piang cihte pawl hi.

Music nam tuamtuam ong hilh uh a asin zong kitam mahmah hi. Ken Keyboard leh Lungtui (staff note) kasin hi. Ka KB siate pen Sia Zam Kham leh Pu Zam Mung te hi. Lungtui ong hilh pen Sianu Dim Kham (L) hi.

Hih man (photo) sung ah amai gual a tute pen Ciin Kham, Zamnu leh Kim Pau te hi. A thum un amau’ mun tek ah Pasian in zangh mahmah hi.

Lesson

KB laivuan ni in ka cina sese ahih man in lai kavuan thei kei hi. Lungtui vuan ni in bel hoihtak kavuan thei a akhatna kangah hi. Theih ngei hetloh la khat alungtui en kawm a thakhat thu in hong sasak hi. Tua lai khuak hat lai hiding hiven thakhat thu in khial vetlo in kasa thei hi. Ka sianu in zong lamdang ongsa mahmah hi.

Ken lungtui ah akhatna kangah a, Zamnu leh Sianu Zen Dot Mang te’n a nihna leh a thumna ngah uh hi. Ka gennop bulpi pen;

“Laivuanna ah akhatna ngahna pen khuasuak hamtang ding cihna hi zenzen lo hi”.

Ka etkik teh kei akhatna ngahpa ka khuasuak kei pen hi. Kim Pau bang tualai in kidawk hetlo hi. Ahih hang tuni in Pasian in nakpi tak in lamsang a ama’ laphuahte in mi tampite’ nuntakna lawng hi. 2016 kum US a Minnesota state a Kayah te’ lak ah gospel kapai laitak in Kim Pau’ laphuah “Khasiangtho hong kibua suk in” cih la pen Kayah la tawh khangno te’n sa ziahziah in kap ziahziah uh hi. Kei zong lungdam in ka kap hi.

Zamnu zong hanciam mahmah a Kawlgambup level ah mi minthang mahmah khat hong suak hi. Kuama’ ciin theihloh ding zadong in a aw tuampian (distinct) ngiat hi.

Tua lai a ka lungtui sinpihte mi tampi khuasuak mahmah hi. Kei akhatna ngahpa khuasuaklo pen hi’ng.

Bang hang?

Ahang tampi omsam in ci adiak in Pasian’ hong sawl pen sem masalo in kei sepnop pen tawh nitum in thudang ladangte ka donloh man hi pipen in ka ngaihsun hi.

1998 kum August kha 18 ni in Pasian in Ama’ nasem ding in hong sam hi. Ka etkik teh Ama’ na kasep sung teng ka dau pai mahmah hi. Ama’ hong sawlte semnawnlo in ka sepnopte ka sep zawk a kipan damdam in kiasuk diaidiai in aniampen mun dong atung kahi hi.

Hanthotna

Khangthak te’n laivuanna khawng ah akhatna nangah sese loh hang ki khuasuak thei mahmah veve hi cih phawk huai hi. Sang sung a pilna ciang tawh ki khuasuakzo nailo hi.

Pasian mah pom tentan ding. Amah tawh kizawl ngiat ding. A awnem zaksawm ding. Athu mang ding. Ama’ hong sawlte sem ding. Sep ding theih kei leh bang sem ding ka hiam cih Amah dong ngiatngiat ding.

Hih man ka muh teh ka phawk khak vat teng kong suut suk pak hi. Hih man US pek pan hong puak dildel ahi Sianu Dim Khek’ tung ah lungdam mahmah ing. Lai nasim kawmkawm in Pasian’ lawnna na ngah ngiatna ding in thu kangen hi. Atawp dong nong simsak lungdam mahmah ing. Gen khialh a om leh ngai dam. (Mung Laan Thang) Zangkong