Ka muhpak US Gamthu pawlkhat – 51

Ka muhpak US Gamthu pawlkhat – 51

Life Begins at 64!
1967 kumsung RIT sangkah lai in leitung lasiam minthangte lak ah London pan Beatles kici mi li apha, a vekpi a samphasak nelnalte beelpawl (group) minthang mahmah uh hi. Tudong mah a sih zawh kum 33 phata a aminthang mahmah, amin a mang ngeilo ding, lasiam minthang penpen Elvis Presley, King of Rock zom ah a minthang pen uh ahihi. Leitungah lasiam a minthangte a banbanin akigualh saktak ciangin Elvis Presley, Beatles, Michael Jackson hi pah hi. Tua hun lai in kum 64 kipha leh puteek dan mah a kingaihsun a nasep sem zo nawnlo ding mah in kituatpah hi. Tua hi a, Beatles te lakah Paul MacCartney in kum 17 a phak lai (1966) kumin apa kum 64 aphakni tawh kisai, apa a cihna aa, aphuak leh sak athuah la << When I’m Sixty Four >> cih la hi a, a lamalte khat bang:

“ When I got older losing my hair
Many years from now
Will you still be sending me a valentine
Birthday greetings, bottle of wine?
If I’d been out till quarter to three
Would you lock the door?
Will you still need me, will you still feed me
When I’m sixty four “ cih a kipan ahihi.

Ahi zongin nuntakna khan kisau semsem hi. Nidang lai in < Life begins at 40 > kici hi. Hun hong paipai a, kikhanto tektekin a nunung pen ah < Life begins at 60 > kici leuleu hi. Reader’s Digest sungah ka sim kha ngei aa, aphuakpa Mac Cartney in tua hun lai a ka la phuak pen tuhun teh maan nawn lo hi, kum 64 hi lo zaw in kum 84 tawh kheel ding hi zaw hi, ci in na gen kik hi.

Kawlgamah kum 60 valte kumpi nasepna ah kikhawlsak in pension kilasak hi. Tuate lakmah ah kei zong ka kihel a Pasian hongpiak inn leh lo tawh a om hithiat a khawlnga hithiatta ding ka hihi. Tua kim lai ah Pasian hong gelsak kholhsa om bangin hi lam ka tung hi. Hi lamah inn leh lo sum leh paai neihsa zangkhat zong om lo in “0” tawh nuntakna athak ka kipan hi. Omna ding inn ka saap tawm hi. Inn buulpi mahmah pan nauzaw inntuan thak linlian tawh ka kibang hi. Kivaakna dingin nasep zon kul kikta hi. Ngah nak leh sepzawh bangbang sep kik ding ahihi.

America in galsim in nitum a, galvaai in a sum beilawh uhhi. Agam hauhna uh kiam hi. Ko tunteh bang akiam semsem na hi zaw lai hi. Nasep zong nidang zahin baih lo hi. Mikangte zong pension la khinsa mah na sem kik uhhi. Adiakdiakin ‘veteran’ kici galkap luite bang kum 80 gual vive mahin na, na sem tangtang lai mawk uhhi. Tua teng huhau mahin galkap lui lah ahilo a gammi lah a suak nailo uham khin kum 65 gualte a’dingin nasep ngah ding zong haksa mahmah hi. Kawlgam sung a ei septheihte leh ih nasepsate lah hong thudon sak ding bang hi dektak lo hi.

Gamdang pan USA a tung khempeuh in, na nutsiatna gam pan na ngah pilna na siamna letmatte (certificate) khempeuh pen na ken hangin hong kithupisak peuhmah lo hi. Tua thute huhau in bangmah lo mun pan kipat phat kik ding hong kul ta hi. Tua ahih manin mun tuamtuam gam tuamtuam panin USA atun uh ciangin USA ii akhiatna taktak pen a sau in (long form) “ U Start Again ” a cihna hi na ci uh a, kei mahmah zong in a sin kha a phulkha takpi mah ka hihi.

Tua hi a, kei a’ bang diakdiak dingin ‘A’ pan kipat kik kul phingphing tadih mawk a, << Life begins at 60 >> acih zong hi nawn peuhmah lo lai in << Life begins at 64! >> hi zaw mai ta hi.

(azom omlai hi…)

Agelh: Awn Za Pau