Ka muhpak US Gamthu pawlkhat – 41

Ka muhpak US Gamthu pawlkhat – 41

Zomite Khuado Pawi Zat Dan
Zomite Khuado pen ih Kawlgam bangah Kawlgam suahtakna ngah zawh akipan hong kinaktheih khin mahmah hi. Chin Rifles battalion 1st Chin Rifles Bn pan 4th Chin Rifles Bn, battalion 4 tak a om hun lai in kumsialin battalion bup in Khuado pawi kibawl ngitnget hi.

Tua bang aa akibawl sialsialin a omnana uh khua aa Kawl uliante leh mi namdang ulian om sunsunte zong kisam in kibawl tanghtangh a hih manin, ei bek hi lo in a sawt lo in Kawlgam bup nadong inh hong theihpih pah uhhi.

Tu hun ciangin ih Khuado pawi pen leitung bupah kibawl hi mai ta hi. Ahi zongin ih bawlna khempeuhah a khua a khua in ahi zongin, Zomi bup in ahi zongin, midang kuamah dang peuhmah sam lo in, ei leh ei bek mah nuam kisa in ih bawl ngeiingaii leltak hi. Tua ahih manin ih Khuado pawi pen tu ciangciang en’ ih thupi ngaihsut mahmah tei hangin, kuamah dang in hong theihpih khol naii lo uhhi.

Tua hi aa, mai lam hong pai lai ding hunte ah ih Zomi makai a tuamtuamte in ih ngaihsutnate puahpha in, laamhto tektek le hang aa, ei sung bek ah Khuado pawi ih bawl kuaukuau tawntung sangin, a tangzai theithei ding leh mi namdangte hong theihpih (recognize) theih dingin, ih omna ih tenna a khuakhua aa ulian makaite sam in theihsak zo leng, hoih mahmah in zungkha zo taktak ding hi cih upna ka nei hi.

(azom omlai hi…)

Agelh: Awn Za Pau