Ka muhpak US Gamthu pawlkhat – 34

Ka muhpak US Gamthu pawlkhat – 34

A Kuamah Peuh Monthly Bill tawh Kibuai
America ah Zomite atamzaw sushi leh company te setzung atuamtuam ah na sem uh a, setzung a nasemte bang in tax akipan dok ding teng a dawh khit uhteh kha khat in $1000 kim vive ngah uhhi. Sushi zialte bel sushi ahoih laitakin $ 2000 – $3000 in kicial a, a cialte in an vakin a innah akhongin omsak lai mawk ahih manin, a ngah khempeuh amau khut sungah tunggai pah hi. Tua hi a, sushi zialte leh sushi saite pen nikhat zong pengg thei lo ahih mah bangin, sum zong tampi ngah thei uh a, a innlam a nute pate sum tampipi khakzo ziahziah thei zaw uhhi.

Tua lo peuhmahte pen a kha khat sung a sum ngahna lak pan, kha khat sung mah a, innsaap, an leh meh man, tuisaap, meisaap, mawtaw car insurance, datsi leina ding akipan dokkhin leh tampi val nawn hetlo hi. A kha sum mahmah sungah zong life insurance, health insurance leh tax na dok pah uh ahih manin khasum bit kisang gai lo lai hi. Kha khat a tung a teng piak kim zawh leh mi nuamsa pawl hi zaw lai uhhi. Khanglui pau leng khawhsa kham a cihte hi pan bek hi.

Tua huhau in US tung tektek ahih hangin khat leh khat kibang kim hetlo hi. Uang gen leh tawilawn mahmah in naupang bangin kigen leng, pawl khatte’n hai min thei min lawh bang a US dollar lawh ziauziau ding, hai min kia thei min kia bang a top ziauziau ding bang khat in ki-ngaihsun kha phial mawk thei hi.

Tua bang hi peuhmah lo hi. Zawlla sung a heisa paak bang mah hi a, a ngiam a po heisate midangte’n na lo khin gaita in aituam in na nei khin zota uh a, ei Zomi a tamzaw a’dingin midangte lawh naii loh leh lawh zawh loh/ lawh ngam loh kendang apo singkung dawn atuang a heisa paak lawh ding bangmah in, US dollar ngah na’ng haksa kisa mahmah hi. US tung khempeuh muan pah suan pah ding hi het lo hi.

Inn lam a om nu leh pa leh sanggam u leh naute in sum a ngah ciangin muhkhong hilhial mah a bat hangin, gimpi tawlpi tak a, a tha lawh leh a neih sung pan haksapipi a hong khenkhiat veuveu vive ahih lam kong phawksak nuam hi. A cidam ding leh a masuan a zawhna ding thu mah ih ngetsak tangtang ding thupi mahmah hi. Tua bang aa inn lam hong phawk aa sum hong khak tangtangte pen mi kician mi thupi mahmahte bekmah ahihi.

(azom omlai hi…)

Agelh: Awn Za Pau