Ka muhpak US Gamthu pawlkhat (29) ~ Awn Za Pau

Ka muhpak US Gamthu pawlkhat (29) ~ Awn Za Pau

Mangpau Siam leh Theihloh In Phamawh
Ei Kawlgam bang a, ih dotnop thu khat peuhpeuh eimau mahmah va pai a ami mahmah tawh va kimu a, dot theih pahpah ding hi lo hi. Gentehna in kei tuahkhak mah honggen pah zual zel leng, ka innsapna innkhan ka lut lai un ka inn mei a’ding deposit ka piakna ding ka omna ka kim ka pamah mun tampi om hi.

Ahi zongin deposit piak theihna dingin account nambat hon kul masa a, tua vaai dotna ding telephone nambat theih masak kul hi. Internet vive tawh kizom ahih manin, ko omna Tulsa ah deposit leh electric bill tawh kisai ih dotnop leh tua tawh kisai a len atuam hi a, Tulsa zongah a om pah zong hi tuan lo in mundang state khat peuhah koih uh hi.

Tua hun ciangin ei lam bang a, a zumah va kimu ning e cih theih om lo hi. A phone nambat tawh hopih hamtang ding kul hi. A phone sung zongah ami tawh kimu pah lian lo lai in, tua thu tawh kisai na theihnop leh nambat tua zah meek in, customer service ahih leh nambat tuazah, na meisaap na piak nop leh nambat tua zah, na inn meisia ahihleh tua zah meek in, cih akipan in nam tampi takin kikhen behbeh lai a automatic voice vive in hong kigen hi. Ka cihnopna ah a tuate mahmah akipan a mangpau ih theih ih siam ih tel ding kul hi.

Kei bang zong midang bulphuhin amau vive muan bawl niloh leng kithei lo kankan ding ci in keimah mah in ka hopih a, athu ala a paidan kithei nailo lua mahmah ahih manin, a theih huaipipi kitelthei zok mahmah lo hi. Kawl kumpi in “e-government” acihcih pan sansan uh pen a khangto gamte in a zat zawh a na sawt mahmah ta ahi a, ei kiangah kizang nai mahmah lo ahih manin, a tua teng mah thu muh lahna, theihtheih lohna, teilahna in akinei na hi tazen lawmlawm hi. (azom omlai hi…) Agelh: Awn Za Pau