Ka muhpak US Gamthu pawlkhat (13) ~ Awn Za Pau

Ka muhpak US Gamthu pawlkhat (13) ~ Awn Za Pau

Ngaihsut Na Bang Het Kei! Kawlgamah Mikang pau ka zat ding hun kei nasep tawh kizui in athu in hong pia peuhmah lo aa, ka Mangpau zat hun pen tawm pha mahmah hi. A kizang ngei peuhmah lo hi zaw hi. Japan ka pai lai ka omsung ka zat bekmah ahihi. Tua hi a, Mikang pau a pauna gamkhat tung peuhmah leng kha thum sungin siam ngap pha mahmah pah ing ka cih phuauphuau vial leh ka tun taktak ciangin tua bang na hi deksuai lo hi.

Adiakdiakin Tulsa khua bang a Zomite tam mahmahna khua ah Mangpau pau ding hun omlo hi. Khang no lai sangkah ding a pai cih lah ki-hi lo lailai a, innkuan tawh kithuah ngitnget lailai ka hih manin, midang tawh kiho hun ding zong om lo hi. Kumtam khitteh akitung pan ahih tawh lungsim leh khuakte zong manlang nawn lo hi. Ciapteh theihna khuak hat nawn lo in kampau mukpau zong kinal zialzial nawn peuhmah lo hi.

USA ah New York khuapi sung leh Los Angeles China town cih pian khuapi mahmah khuate lo buangah Yangon bang aa, lamdungteng aa innsai kihong cih bang om lo hi. Lam dungah mawtaw lo buang khe tawh mi vak mi ciah kimu lo hi. Kawlgam bang danin ih veeng ih paam ah nupi papi piteek puteek numei naupang ciak lialua in kiho ziahziah kipau latlat ding a, tua teng kizaza ding ka sak leh tua bang ahi nuam ei leh kuamah zong ki-mukha ngei meel lo hi.

Inn akici khempeuh kongkhakpi leh padinpauh kuamah in hong deda lo uhhi. Sun tawh zan tawh kikhakcip hi. Phalbi hunin kihong leh khuadam in huihvot honglut hi. Khua lum ciangin huihlum hong lut hi. Tua banah thopi, thovaii, thosi zong hong lutthei hi. Tua huhau in inn honsa in kikoih lo hi. Avot leh asa (aircondition & heater) vive akizat man ahihi.

A nasepna a pai ding ciangin a mawtaw tungah a kah laitak muhpak zual cih loh, veeng leh pam tawh ki-muh ding na leng haksa hi. Van zuakna saipite ah van lei tam mahmah napi’n, kiho leh zong a gei a omte nawngkai sak nuam lo ahih manin, a mau zakkhop lian bekin kiho uhhi. Ei lam bang a khat leh khat kiho pih zakzak cih bang omlo hi. Mi vomte lo buang anuih uh leh zong nui lala nui uat-uat cih bang na om lo mai hi.

Kawlgam bang hi lo in nasepna sungah akisawk zakzak, limlang a ki-enen, tadinsa simsim, an nene pawl cih omlo in sun khuavak a mau sepkhop ding tek a omsa ahih manin manlah thei mahmah uhhi.

Sangnaupang ahi zongin nasepna ah a hi zongin naseppih mikangte tawh kihona a om kei ngal leh Mangpau hun ding om tuan lo hi. A diakdiakin USA ah mikang pau a siam lo Hispanic te zong a lom a tangin tampitak mah na om euau hi. Ei Zomite nasepna diakdiak ah tua bang mite tawh kithuah uh a, amau lah amau pau bekmah in kiho in Mangpau pau hun ding zong om lo lailai hi.

Tua hi a, kha thum sungin Mang pau siam pah ning ka cih pen ka tun taktak teh tua bang na hi kilkel lo hi. Kha thum cih thadah kum sawmthum na sawt zongin sinthuah kan thuah kei peuh lecin bangmah a kithei tuan nawn ding zong hi lo mai hi.

Hih lam pai ding ahi zong mikang pau kisin nuamte’n Kawlgamah Mangpau (English speaking) kah in kisinsin kulzaw hi. Hi lamah akhong sang kah theihna a om kei leh sum tawh kah ni cileng kiman het lo in sum tampi bei zaw tham hi. Yangon khawngah pilna deih bangbang oltak a kingah zaw ahih gige zawk lam hih ka laibu sung pan kong theisak nuam kong hanthawn nuam hi. Nidang a ei mi Mangpau sinnuamte’n touristte sabeng ding bang a, a zonzon lai bang lo in tuhun ciangin tourist tam mahmah ta ding hi. (azom omlai hi…) Agelh: Awn Za Pau