Community Card tawh Australia paitheihna ahang

Community Card tawh Australia paitheihna ahang

Tuu sungteng, ei Zomi sunga mi pawlkhat te’n, ih sanggam Hakha Falam te CRC card tawh Australia gam ah hong tung ziahziah uh ahih manin, Malaysia a om ZAM te hi ta leh Australia gam sunga a-om Zomi kipawlna makai te tungah hawmthawhna leh mawhsak na nei kha pongmawk uh hi. “Ih makai te’n bangmah sem lo” peuh kici kha pongmawk hi. Hi thu tawh kisai in, ka theih thu pawlkhat hong hawm sawn nuam ing.

Tuulaitak lian a, ih sanggam Chin lam te, CRC card tawh Australia hong tu’n theih ziahziah na pen, a makai te vaihawm siam man hi peuhmah lo hi. Australia kumpi te’n ei sangin a-neek-ngaih zawk man zongh hi kiuh-keuh lo hi. A haang taktak pen, amau sung ngiat ah, khat-leh-khat ki deihsakna/ki neek-ngaihna nei ahih man bek hi zaw hi.

Amau sunga, Australia gam a-tung khinsa te in, a CASE sunga a-guan sa, Nu leh Pa/Sanggam U leh Nau min te ( Thu tuamtuam hang tawh Australia hongpai nawn lo ding) te min tawh kituak in, Malaysia/India a om, gam thumna tu’n theih nading lam-et na a-nei lo, a khuapih/a mipih te, bulh-sak hi. Tua min tawh kituak in CRC card bawlsak uh hi. Tua dan in sapna bawlsak ahih manin, immediate family members status hongsuak ta hi. Australia kumpi in, immediate family members te, First Priority in koih ahih manin, UN card a-tawi loh hangin, VISA pia ve ve uh hi. UN card a-tawi khinsa te naleeng in, a UN card zangh nawn lo in, UN card a-nei lo bang dan in, CRC card bawlsak uh hi. Australia gam pan asam ding te CASE sunga a-min dan lian a deih man uh hi pah hi.

Amau lungsim puakzia pen, a sanggam meltheih ading ciang bek deihsak na nei lo in, a minampih te ading ciang dongin, nek-ngaih uh hi. Tua ahih manin, Nipini biakpiakna hun sung naleeng ah, CASE sunga min om, aki sam thei nawn lo ding, min-awng te, kai-khawm liang uh hi.

A case sunga a-min leh a suahni / suahkha / suahkum a-guan teng leh a CRC card tunga min/suahni suahkha suahkum te kituak sitset ahih manin, Australian High Commissions Officers te’n zongh, DNA sit sak peuhmah lo hi. Tua dan lampi tawh Australia hongtung tam penpen hi.

Cih nopna ah, amau ii CASE sunga a-guan uh, Nu/Pa/Sanggam U leh Nau / Zi / Pasal te, Australia gam ah hongpai khol nawn lo dinga a-theih uh min teng, mawk koih hi-thiat lo in, a minampih te ading phattuam -na pia uh hi.

Gentehna in, a CASE sunga a-guan, a innkuanpih te; USA/Europe gam khawngah a-na tu’n khit phial hangin, tua teng ii min mah tawh CRC card bawlsak in, Sapna bawl sak uh hi. Tua lampi zongh tawh hong tung thei ve-ve uh hi. Problem om kiuh-keuh lo hi.

Ei Zomi te pen, ih kamvang in Pasian thu bekbek gen nuam, ki piangthak sak lua kisa in, ih Pawlpi makai te na-ngawn, hawmthawh phial napii hangh in, hi bang dan te pawl ciang in, ih minampih te tungah deihsakna a-nei kitawm mahmah lai hi. Ei leh ih innkuanpih te aading ahih kei naak a leh, ih-hun nai khat naleeng zongh beisak nuam lo te hi hangh. Ih sum $50/$100 bek naleeng abeisak ngam lo te hi hangh. Kei leh ka innkuanpih te hamphat nading ahih kei naak a leh, midangte ek a-suak hangin poi sa kiuh-keuh keng….aci ki tam sim-thamh hi.

Ei Melbourne sunga om, Zomi pawlkhat te bang in, amau CASE sunga a-guan min pawlkhat te, awng hiil-hial na piin, minampih te ading cih tha-dah, a sanggam Pa ki unau / Nu ki unau te ading naleeng, phal kiuh-keuh lo hi. Ka up mawh hi peuhmah lo hi. Tuu sungteng a ka tuah khaak sitset thu hi.

DNA sit ding khawnga hong kisawl khaak ding, hai lauh kul kiuh-keuh lo hi. Ih Case sunga aki-guang min / date of birth te, aki-tuak sitset naak a leh, cik mah hun in DNA hong sit sak ngei lo hi. Kua ma tungah ih deihsak khol loh man a, ih pau-lap thu khawng ahih a leh lah, thu khat ci ni.

DNA aki sit sak te pen, CASE sungah min kiguang lo na-piin, ka sanggam laizom hi/ ka Nu leh Pa taktak hi..a-ci te, Suahni Suahkha Suahkum aki-tuak gai sit set lo te, Case sunga min pen ka min-neu hi, ka minpi taktak pen, hih hi….cih dan te pawl tawh explaination bawl a, sapna a-bawl te…..etc cih dan te tung bek ah DNA ki sit sak pan hi.

Ei Zomi te pen, mi gen-siat na leh mi hawmthawh na lam sangh ah, hangsan mahmah na pii hangh in, hi bang dan te pawl ciang in, mei dawi bil bel hi hangh.

Hi a-tunga kong gelh thu te ngaihsun thei leng, Hakha Falam te hong tung ziahziah uh, ei Zomi te lah hong tung tawm mahmah, cih thu bek tawh khawl sak lo a, ih minam makai te, ZAM makai te, ZAA makai te’ tungah hawmthawh na leh gensiatna a khah khia-khia te adingin, lungsim cidamna nengkhat beek a-ngah zo tuam dingin lam-et lunggulhna lianpi ka nei hi.

More: Australia ah hongnusia Pa Pau Lian Mang (Mangpi) sihvui hunbawlna

Ei sungah zongh, amau bang dan lungsim puakzia te nei sawm ngiat ni. Nang hangin, na minampih Innkuan khat Australia hongtung thei leh, amau tungah Kawlgam Sum Tein Tul Khat na piak sangin mangpha zaw pekpek lai ding hi.

Ih minam khantoh nading in, ih minam makai te tung bek ah mawh-puak om lo hi. Ei a mipi te sung mahmah ah zongh minampih te tungah deihsak / neek-ngaihna kisamh mahmah hi. Cin Lam Tuang, ZAA Media, 7/04/18