Ka lungulhna ~ Dong Mung

Ka lungulhna ~ Dong Mung

Mipihte aw… Minam kician khat in lai a neihloh phamawh a, tua lai a neihte a picingsak leh a kipsak pen laigelhte ahi hi. Mipite aw…i minam sunga laigelhte kamsiam beek ahi zongin thapia siam ni…

Makaite aw… Kawlgam sunga Zomi kipawlna makaite, Leitungbup a Zomi makaite aw…minam picing ihihna a kilatkhiat nadingin i pau i lai mahmah a thupipen khat hong suak hi. I pau i lai a mangthan’ loh nadingin eipau, ei lai tawh laibu bawlte, laigelhte panpih siamin tha pia siam ni..

Laigelhte panpih ni

USA, Malaysia, Norway, Ausie, Singapore, India cihte ah Zomibup huamin pawi lianpipi i bawl a, kidemna thupi taktak i bawl uh hi. Tua munte ah lasiam, music siam, political leaders le a tuamtuamte i sam a, pahtaakna tuamtuam i pia hi. Ahi zongin laigelh siate nong phawkkha kei uh a, lailam khantoh nadingin bangmah vaihawmna le gelna omlo hi.

Hong phawk un

Zomi sungah i lai i pau a kip semsem nading, laigelh ukte hong thakhauh semsem nadingin

1). Laigelh kidemna hong bawlpih unla, letsong limci hong bawlsak un… (Khangthakte hong thalawp diang laibu hoihnono i neihbeh kha ding hi).

2). Mundang ah huhna lianpipi na piakkhiat bangun laigelhte’n laibu a hawmkhiat nadingin zong hong panpih un…

3). Siamna tuamtuam a neite’n hamphatna tuamtuam a ngah bangun laigelh siate’n zong hamphatna tuamtuam hong ngah theih nadingin kal thak khat hong vaihawm un..

Note: Kei mimal lunggulhna hi-a kuama tungah thangpaihna leh khasiatna hituanlo hi.

(Zomi sung kipawlna makai pawlkhat tawh tuma kum nih lai pekpan lailam khantoh nadingin deihna le lunggulhna ka sungkhia ngei a, tuciang dong bangmah pholok nailo ahih manin hong genkhia kik ka hi hi…)..

Lametna lianpi tawh
Dong Mung