Ka Lung A Zuang Ding Bang E ~ Rev. Zam Khat Kham

Ka Lung A Zuang Ding Bang E ~ Rev. Zam Khat Kham

Ka sang kahna St. Louis, MO, USA zuan kik dingin Zangkong pan zingsangin ka dingkhia a, ka Pu Suante nupa, ka tanu Lampi leh Dr. Gin En Cin-te in hong kha-in Bangkok ka zuan-a, tua lai ah sun sung tawlnga, natakin Seoul lam zuanin ka dingkhia kik hi. Incheon (Seoul) ka tun ciangin zingsang khuavak khin ta a, tua panin Tokyo khuapi Narita International Airtport leng ding American Airlines leh Japan Airlines kipawlkhawm vanleng ka tuang hi. Tokyo khuapi Narita International Airport ah tawlkhat mah ka tawlnga leuleu hi.

Tua banga ka khawl sungin ka gil hong kial ahih manin Japan ansai khat ah an ne-in, a pualam a kimuhsuak theihna mun khat ah tawlpi khat sung ka tu hiithiat hi. Vanleng tam mahmah a, a tampen JAL vanleng mah hi-in, leitung mun tuamtuam pana vanleng tuamtuam, a mel zong a tuamtuam, a kibawl a kilam dan zong a tuamtuam, tu zel, lengkhia zel-in om hi. Tua banga ka tut sungin ka lungsim sung ah thu tampi hong lut-a, ka nu leh ka zi ka tate ngai-in ka gei ah om le uh ka ut a, tua ban-ah, Zangkong pan ka dinkhiat ma-a ka pute in ka Pu Thang Khen leh ka Pi Luan Khaw Mante’ thu laibu-a a bawl sawm uh ka simna sunga thute zong ka lungsim ah thak lai mahmah hi. Tua tungtawnin ka neu lai-a ka pute tawh ka kikholhnate, ka pute’ inn sung ah ka khankhiatnate ka lungsim ah hong suak denden hi. Thu ngaihsunsun-a ka om leh ka lung a zuang ding hong bang sim diaiduai hi.

Ka neulai thu ka ngaihsut ciangin kei mahmah in ka theih hiam, a kigengen za mun lua ka hiam ci-a ka khentel theih loh, ka theih thu pawlkhat om den mawk hi. A hai deuh, a moi deuh ka hiam thei lo, ka neulai thu pawlkkhat ka tel phat loh zong om keiimawk hi. Ahi zongin, ka neu lai-un ka nu vaikuan den-a, ko unau zingsang an nek khit teh sun-an hong kiguansak-in ka pute’ inn ah ka nau tawh hong kikhak den bel ka neu-thu-mang-mawh-in ka thei lai hi. Ka pute’ inn mualtung hi a, inn tual ah Ameircan kaphi a kici singkung gol khol lo khat po hi. Tua nuai khawng ah tua hun lai-a sang kah lo-a inn ah a om ka Pu Lal tawh ka lup zel khawng uh ka thei lai hi. Ka pi bel lokuan denin, ka pu bel a sumbuk zuakna mah ah kuan den hi.

Ka gol zawk deuh ciangun sun kam peuh-in inn-a om ka pute tawh kimawlin, tungman peuh tawh kidengin ka diang zakzak thei uh a, “Cina hat, cina hat” ci-in ka kiko thei uh hi (Ka Pu Lal pen dam lo-a sang a tawp dan ahi hi). “Chae-pha-wa-a thet-kyi-thi. Myethnar daunthmann thi,” peuh ci-in ka kiko pongmawk uh a, tua hun lai-in a khiatna bang hiam cih zong ka thei kei hi. Nitak an nek khit ciangin ciah pah lo-in tawlkhat tu suak denin ka pu in thucin thutang hong gen dena, anbuk meisak tutphah niam, a sau khat tung ah ihmu-in ciah ding ciangin hong kiphong dena, khangmulongin kapsa-in inn ah ka ciahsuk den hi.

Khatveivei, ka pute khat leh nih in hong giahpih zel uh hi. Tua lai-in ka pu in Pasian’ thu leh leitung ka nuntak sunga ka zat ding thu a kisam khempeuh hong hilh khin na hi mawk! Ka pianna ka pute hau het lo-in leitung thu ah mi nuamsa luate ahih loh uh hangin Pasian’ thu leh pianthakna thu ah mihaupite na hi mawk uh a, piangthak kimin inn sung ah zu leh za peuhmah kizang lo ahih manin tuni ciang dong tuate peuhmah tawh ka buai ngei kei uh a, Pasian’ thupha taktak ahih lam ka phawk semsem hi.

Ka gol zawk deuh uh ciangin, ka pi’ lo khawhna Baalzang ah Sani ni ciangin ka kuan den uh a, “Ciangka,”panin Balzang lam zui-in “Suangkang” ka cihna mun panun “Mincim,” tua pan, “Ken,” tua pan tu hun cianga suang kilakna mun, tua pan lam katna mun, tua pan “Takzang” cih bangin min ka phuahna munteng uh tawnin lo kitung hi. Tuuk lam ciangin lokuan kawmin thei ka vil den uh a, ka pute’ lakah ka Pu Mung pen thei vil, aisa tawh, cih pian va phadeuh, ngah thei phadeuh hi. Theikungte nangawn a omnana ah lotngah zawzen-in “Theinui” cih mah, “Puamnip” cih mah, a tuamtuam ka phuak se uh hi.

Ka pututeng-un ka lokhawh kawmun lapawl ka sa den uh hi. Lobuk mai, suang lakteng bang ka khawh uh ciangin, dinsa-in zong kikho thei lo ahih manin tutsa-in ka kho uh a, ka Pu Suan in a paisuak, a dangte in a aw tuamtuam zui-in la-aw kim zui-in la kasak den uh ka mangngilh thei kei hi. Ka nau Thangpi bang a aw hoih kalkal mahmah-in a paisuak sakpih den-a, ka Pu Lian bel nautum hi-in neupen napi-in a un zui den-a zong zo mahmah guagua se hi.

Amah guak bang lo a kuan ciangin Suangkang ka cihna mun panun lo a tun dong la sa taiitaii den-a Mangzang lam kuante bang in “Tha Lian lo kuan ta ei” ci bek uh hi. Tua lai-in “AGAPE Itna Late” leh TSKhai’ la “Sihna Kigo Zo” cihte a than mahmah lai ahi hi. Ui zong kikhawi den-a a masa-in “Tal Kang,” tua khit teh, “Bilkhup” cihte nisim-a ka kithuahpihte uh ahi hi. Ni khat tuk hun sung lo-honga ka pai kal-un inn ngakte in Talkang na go mawk uh a, ka heh suak lua mahmah-in an ka ne kei hi. Tua lai, ui-hai tam hun a hih manin hong hai sawm pian-a kigo hi, hong ci uh hi. Bilkhup bel sa va mahmah-in bilpi bang delh den, zong manman mai hi.

A mat masakpen bang, lokuan ciah, Suangkang gei ka tun uh leh Bilkhup in bilpi khat hong phawngin delh-a man lian sawnsawn hi. Inn tun ka bawl uh a, aksa bangin paak lihleh-in lim peuhmah hi. Ka neulai-un ka Pu Lal in inn-bilpi khawi thei den se hi. Zawhngeu peuh in zong hong neksak thei zel sawnsawn hi. Taihciat ak khawi khat zong uk sawnsawn hi. Tuate tawh a khangkhia Lalpu pen tuhun cianga laphuak siam Zogam Lalpu hong suah ding lam peuhmah thei khol khang e.

Nitak sang a kituah nak leh gamlak lam kimanawh den-a, sing pua lote in keel kicing hi. Ka nau Thang bang keelcin va mahmah-in ciang saupi khat tawh diang zauzau-a keel a cin khawng ka mitkha-in mu lai hi. Tu-a tan sawm sang omna mun khawng ka keel cincinna uh hi a, sing zong kigamla puak nai khol lo-in, Ciangka paam-a tuisam phulna mun ciang, khawlmun ciang bang kipha lel hi. Tua hun lai-in ka pi in Baalzang lo ban ah Tuilehluan lam ah lo khat hong zuatpih a, guam sung khat hi-in Cikha lam pana a ngah “kambelh” kici ankam kha pawlkhat ciingin hoih peuhmah hi. Suaklu mual lam kendang khat zong hong zuatpih a, mai bang gah cihtakin gah zen hi. Kum khat bang kipuakhia zo lo phial a, lampi ah ka tuksuahsuah uh zong tampi om hi.

Tua bang hun nuamte i phawk loh kal-in hong beibei a, 1980 kum bei kuanin ka pu in hong nusia mawk hi. Dah lua mahmah ka hih manin ama’ nunga hong giak nungak tangvalte bang a mi mahmah-in ka it ngaungau zen hi. Tan nga ka sim laitak ahi hi. Ka Nu Cing in Tungzang ah siama hong sep ciangin ka Pu Suan tawh khatvei ka va kha uh a, ka Pu Mung in Heilei ah sangsia hong sep ciangin zong ka Pu Suan mah tawh ka va hawh uh hi. Tedim gam bup tan 4 sangteng bawling sui kidemna ah Heilei in a khatna a ngah kum, tua shield a ai hun uh tawh kituak lian ciitciat hi.

Ka ciah uh ciangin khua sung mite’ piak zawhngeuno khat khai lenglengsa-in ka ciah hi. Ka Pu Suan in Tungzang ah sangsia hong sep ciangin ka Pu Lal tawh ka va kha leuleu uh a, neulai mahmah hi napi-in pute tawh kithuah-in amau’ omna munteng bang ka va pha kawikawi hi. Ka gol khit ciangin bel ka Pi Cing Laitui ah hong om teh ka Pu Lian leh U Tuang (Zawl Tuang) tawh belbawm lupuakin ka kha uh a, ka Pu Liante Kaptel ah pastor-a hong om ciangin ka Pi Ngaih leh ka U Tuang mah tawh belbawm lupuakin ka kha leuleu hi. Tua hunte a nuam mahmah hi mawk veh e maw…

Ka Pu Lal leh ka Pu Lian tawh Laisiangtho sang ka kah uh hi. Laisiangtho sang kah ding ka ut het kei hi. Laisiangtho ka sin ding ka nu in hong deih lua mahmah a, ka Pu Mung in hong cih teiiteii ciangin, “Ka puan ding om kei, ka thung-ip ding zong om kei” ka cih leh ama’ puan-ak khat hong pia lianin, thung-ip khat hong leisak lian mawka, paulap ding om nawn lo-in sang ka kah hi. Pasian in ama’ nasem dingin tuateng tungtawna hong sam peuh na hi mawk! Tua banga Laisiangtho sang kah ding a ut lo penpen, tu dongin sang a kahkah lai peuh ka hi zawsop hi.

Zi ka nei hi. Hong ki-awi nai khol lo pi-in ka nei hi. Ka zi neih ni nitakin ka pi hong giak ngiat-a, kei leh ka zi Lun lumin, ka pi bel ka nu tawh lum hi. Ka u in lah pasal nei khin tham, ka nau lah Tamu a ka Pa Suante’ kiangah sum zonga om ahih manin kei leh ka nu bek ka om laitak uh ahi hi. Ka pi in hong giahpih ngiat-a, ka nu mahmah a ngaihsut tam lua ding, ci hi ngel ding hi. A nuntak sungin bangmah ka piak man loh hangin tuni dongin ka lungdam mahmah hi. Ka pi in ka zi hong itsak mahmah hi, nuam mahmah ing.

Ni khat bel, ka Pu Lal in, “Khampite nupa na kitawi keii uh” ci-in ka pi kiang ah hong khia dihmawka ka pi in bangci ngaihsut ahi ding hiam hong tai gawp-a, ka ngaihsut kik uh teh ka nupa-un ka nuih uh za kik zawzen hi. Tua hunte zong hun nuam mah ahi ve! Tu-in bel ka pu lah om nawn lo (kikholh khakna tawm zawdeuh), ka pi lah om nawn lo a, i matutna khatpeuh, i thupha sanna khatpeuh, zi leh ta i neihte hong lungdampih ding, i tut nading om nawn lo-in kihawm mahmah hi, hong ngai mahmah ing, pi leh pu aw…

“Attention, please…” ci-in ko vanleng a len hun ta-a hong kisapna ka zak ciangin ka ngaihsutna hong kitat vat-a pammaih ka sa liang hi. Ka pianna ka pi leh ka pute om nawn lo hi ta leh hong thuhilh hong pattahnate uh tuni dong nuntak pih thei ka hih manin ka nuam hi. Ka pute unauteng mah in tuni dongin hong it khial lo uh a, unau banga khangkhia khawm ka hih mahbangun tuni dong mah unau sanggam banga ka neih ahi hi. Ka neulai thute, ka khankhiat ziate ngaihsun kikin ka lung peuh a zuang ding hong bang hi.

Rev. Zam Khat Kham