Ka khankhiatna Bi’ Inn ~ Lian Sian Thang

Ka khankhiatna Bi’ Inn ~ Lian Sian Thang

Mitawh ka kibatlohna
1. Kei pen Ka nu tawh ka lamkiatna (pianna) inn kibang sese hi. Nu tawh pianna Inn kibang tamhet lo ding ahih manin ka tuampianna khat hi in, zongh ka angtang sese hi.

2. Innkuan khat bek hilo-in innkuan tampi ah innteek ka hi kawikawi hi. Ka Pu teng inn ah om kawikawi kha kahih manin innkuanpih ka hau mahmah hi. Tua hangin lupna kilaih leh ihmu theilo cih te pawl ka nei kei hi. Omom na, Tuntun na ah a kisek sa kasuak pah hi. Mun tuamtuam ah om kha kahihmanin Khualzin na peuh” ah zong ka ki innteek sak kha phiak mawk hi.

3. Min lawh/sap zia tudong kasiam kei hi. Pu teng tawh khangkhia khawm kahihmanin a mau sap bangbangin ka sap tamzaw hi. Ka gol ciangin pawlkhat ka laih aa pawlkhat bel tudong mah ka laihkhia zo mahmah kei..Ka Pu te pawlkhat bang “Pa” ka cih aa ka gol ciangin a hihloh lam ka thei pan hi.

Mi in lamdang hongsa ciat

Kasang kah aa kipan in Lawm le gual tampi ka nei hi. Kamtampian kahih manin mi tampi tawh kimaingap pah hing. Nu le Pa gualte in hongtel lo uh ahih manin Nu le Pa min hong pahpah thei uh hi..Nuam lua khol lo hi. A pilte in bel a tamdot beh selo uh hi. Pawlkhat in a bul a baal in hongdong aa naupang hihna tawh ka heh bangsuak, ka muhdah kha phialmawk zawzen hi. Mikimin lam dang hongsak pen Ka min “Lian Sian Thang” ahihi. Nu le Pa thei uh ahihman in banghangin “Lian” tawh kipan hiam cih hong lunghimawh zawzen uh hi. Mi lunghimawh khat kahih pen ka angtang mahmah lel hi.

Innmun neihna (Gamh luahna)

Ka Pu Tuan Suan Cin (Phamsa) in Ta pasal hau mahmah hi napi a ma Innmun khat hongpia hi. Tulaitak aa ka om na mun uh hihi. A mau konggal, RC Biakinn’ nuai, Hau Cin Khup lampi tung ahihi. Gamh luah khalo ding kimlai Gamh luahpa ka suakhi.

Inn neihna (Ka khankhiatna Bi’ Inn)

Ka Pu teng le Ka nu teng hanciampihna tawh Ka Pu Cin hongpiak innmun tungah Inn khat honglam sak uhhi. Ka theihkhialh kei le Innsing ding Tuitum khuataw ah sui ngeingai uh hi. Khuam ding pen Haita lam ah sui uhhi. A Um nang pen Mukhuai lui lam ah Guapi pua uh aa Cipeek in bawl uh hi. Tua hun lai in neupian lai kahihmanin a vek in ka theician kei hi. Ka Papi Pau Khan Suan (Phamsa) te Saihpuizi veng pan Ko veng (Leisan veng) hong lalphei uh aa a innlui singteng ko inn dingin kizang hi cih ka mangngilh kei hi. Inn neipa kasuak mawk hithiat hi. Innsap cih pen a phukha lo himawk ing.

Bi’ inn sung pan Dipkuatna le Lungkhamna

Khalhun hongtun sim Dipkhuatna

Khal khuahun sungpen Khamtung tadingin lo hal hun ahihi. Ka Nu pen Nisim lokuan den zaw hi. Kei pan sangkhah ka hi hi. Meei hongsan sim, Gam hongkat sim in Ka omna pan ka inntungah mei-ak khat na tu in ka inn peuh na kang leh maw! Cih ka om na peuhpeuh pan kumsim in ka lungkham den hi. Khat veivei ka ngaihsunna le ka mangin ka inn kakang sak zel hi. Nu ei! A taktak hilo ci in ka lung kanopsak zel hi. Ka huan khang uh VMBC Han kim teng le Pu Mungsen gualak teng kumsim in khat vei ta kahal uh hi. Tua nitakpen Inn tungah kahto in Tui a dim belkhai khat le Puansia kot khat ciangtawn/Guatawn muk ah vial venvan in mei-ek hong tukha leh ci-in ka kiging den uhhi. Sikkang inn deihna bel hong khang mahmah hi.

Tuk hunsung buaina

Tuk hun hongtun ding ciangin Khuapi guah le Huihkhauh hong kithuah denhi. Inn tung Bi teng mutkhia zel ahi man in Phopden kul hi. Ka Nu in Mualnuam lopan vaikuan hongciah simin Bi puakkhat ta Innphop nang hongpua zel hi. Ka inn hongphop sak den pen Ka Pu Dai Suan Pau (Phamsa) le Ka Pu Go Khua Hau Kangawng pua dingpa ahihi. Ka Pu Pau pen Post Office​ ah zum nasem ahihmanin Zum kah ma zingsang le Sani ni-in hongphop sak hi. Ka Pu Hau pen Phaipi ah a tamzaw logiak hi. Hongciah sun ciangin inn hongphopsak hi. Tawlngak tha gunsuang pua a cihdan in tawlngak kawm inn phop hiden hi. Inn phop khit tawlkhat sungbel lungnuam mahmah hi.

Kum hongtam pian ciangin a Bi te zong muat/Siata ahihmanin Guahzu leh innsungteng kot den hi. Zan bang guah a tam ciangin lupna hei kawikawi in ka Nu tawh ka buai mahmah uh hi. Heihei na ah guah tui tak hi, a tam tak lohna mun tata ah ka lum zel uh hi. Ka lupna uh pen Inn nunglam ah kakoih uh hi. A um nazong Cipeek a hihmanin a tungpan, a pampan guah in hong then den hi. Tu ni guah zu in cei ka cih uh ciangin zingsangin lupna khinsa in kakoih uh hi.

Ahang pen ka nu lo zingta kei sangkah sun aa inn ah a om, omlo hi. Khat veivei mangngilh kha in ka puanza teng uh na kot dipdep hi. Puanza adang silh ding omlo ahihmanin tua zan pen ihmut cim lo hi. Khat veivei Kasangpuan, Puankang zong kot thei zel hi. Tuk sung aih nak leh Nitak sangtuah ciangin ka sangpuan sangah khansungah ka nusia thei zel hi. Zingciang ki gualh ma in silh saisai zel ee.

Cipeek innneih a nopna

Ka cipeek te uh hong sawt ciangin siata ahihmanin vuikai in val silsial hi. Kha a taang ciang bangin ka inn sungteng uh khuavak heuhau ahihmanin ka ih mu thei kei zawzen hi. Khuavak ah ih mu ngeilo lua… Zanzun a suak ciangin innpua pai kul lo hi. Cipèek te phen in zun katha ziau hi..gamla pi tu ziauhi. Nuam mahmah lel mawk hi.

Meitang ah ih muthei lo

Kumpi mei, Solar cihdan a tang nam peuhmah nei lo hi ung. Meikhuat khat ka nei uhhi. Nitak sim in lai kasim zel hi. Khat veivei a tang ding deih kahihmanin Meikhuat sung aa, a khau ka kai to zel hi. Tua ciangin ka nu in kai to kei in meitui bei baih dinghi ci-in hongtai zel hi. Meitui pen Ka Pu Lammung (Tun Tedim ah teng) le Pu Thawcin kiangah ka nu in ngenzel hi. Tua laitakin a mau meiset ah sep uhhi. Meikhuat tui a bei ciangin ka pu te inn khatpeuh ah pai in lai ka en zel hi. Degree ka ngah dongmah mei neilo ka hihman un tudong mah meitang ah ka ihmu thei kei hi. Ka meikhuat uh ka mitkha in mumu lai ing.

Bi’ Inn sungpan Buhsih duh mahmahna

Ka Nu pen Lo zingta den zaw hi. Kei pen zingsang an su in nitakpen Tuition ka kah hi. Nitak in Zingan ding le zingciang nitak an ding pen a minsa hiden keei hi. Nitak an pen ankhing ka mangden uh hi. Tan 6 pan tan 10 ciang Tuition kah kahihmanin tua kumsung tawntung bang pongman peuhmah hi. Kum 5 kician suak hi. Tualaitak bel Vaimin ci bei leh kinuam mahmah dinghi. Ka Pu ten Ka Pi Cing Ngaih Vung in Ninga ni or Nipi ni pen Vaiminngiam sih cihkhat huan den hi. Tuani pen Pu’ten nitak an nek ni a hihi. Kingak lah mahmah hi.

Buh bek hilo in Kawlmin ahihkeileh Vaimin sukna a ngiam tawh kihel hi. Lim ka sa mahmah hi. Gatui nei zo den lo hi ung…Gatui ka lakawi” uhhi. Khat vei” be tawh huan kahihmanun nitak an pen khualum hun ciangin ning thei zel hi. Ka Nu in bel Ning taleh ne lel hi. Ken an ning duhloh ka hihmanin Tuani Buhsih huan ding ka upmawh ka pute inn khatah annek hun ciangin Vai kin mahmah om dan in an (buhsih) simin ka pai zel hi. Khat vei” nitak an ding omlo zel hi. Tua nitak pen Pu te inn khattuak ah ka kikhen ziau uhhi. Innkuam tamloh pen a lem mah” khat hong suak hi. Buhsih ne kha sawnsawn…Buhsih nekkhak nitak bel lungzuang hetlo in ih mut nuam mahmah hi. Buhsih duh in nitak an givahloh in ih muttheihloh hun tamsim hi.

Veengte Cooker in ka lungtang hongsukha

Ko pen vaiminkhin mang hiden, meh zong omlo hi. Khat veivei ka Nu in lo pan a hangkuadei ah Mehthuk peuh/ lengmasel peuh gawisa in hongpua tua pen ka meh uh ahihi. An nek laitak pen kei leh kei kikhem bawl in ka om hun, gilvah ding ka hanciam hun ahihi. Tua laitak in veengte cooker hong phit seuseu hi. Tu aa Cooker sungah bang aom zen tam maw…Beli peuhmah bel om ding hive mate,,, Khat veivei sa hong nam sawnsawn…Veengte Cooker sungah om ding meh ka mitkha ah koihin an ka ne daidai hi. Veengte cooker in lungtang hongsu kha mahmah hi. Khat veivei Sathau mehkan hong ging seuseu sawnsawn,,, khat veivei ngapik hong nam viauviau lai….

Sikkang inn ah lup cil ni ih mu theilo

Ka Nu in vok khat khawi in tua sum tawh sikkang lei hi. 2008-9 tansawm ka phi khit ciangin Pialciang lam Thadah mual, thanglui kimteng, Tuitum khuataw ah Taaksing ka pute tawh kasui pah ziahziah hi. Sikkang innthak nei ding cihtawh ka gim thei kei phial mawk hi. Khuataw lam Sihpi, Haita, Bawnghu lam ah lawptak in ka tai lenlen den hi. 2009 June kha in Sikkang inn ka lam uh hi. Zawhciangin ka giak pah uh aa ka giah masak ni dinguh bang ka Nuta un ka lawp mahmah uhhi.

Tuk hun ahihmanin ka giah masak ni uh guah hong zu citciat hi. Sikkang hong ging tamtam ahihmanin zaknop sa lua in tunglam en in ka nuinui hi. Ka lungkim mahmah hi. Tua zan bel ki ih mu thei lo hi. Bi Inn bel Guah a zuk hang ging phelhphelh lel in ih mut nuam mahmah zaw hi. Ka Nuta un Bi inn mah ih mut a nuamzaw hi ee mate ka kici pong uhhi. Ih mu thei takei leng cikkang inn mah nuamsa zaw ing ka ci hi.

(At ding bel tam lua mahmah in tu aa zah ciphot ni) Coronavirus tawh a kibuai mahmah laitak abeisa Topa’n hong ompihna, thuphate, ka nu hong itna, Pu’te hong itnate ka ngaihsunsun aa virus bang ka phawk kha man kei liang hi. Hong paisan sate ka phawk mahmah hi. Lian Sian Thang