JESU pen Santa Claus tawh kiteh theilo hi ~ Hau Za Cin

JESU pen Santa Claus tawh kiteh theilo hi

• Santa leilu lamah teng a, Jesu mun khempeuh ah teng hi.
• Santa leng tungah tuanga, Jesu huihlak ah leengin tui tung nangawn ah a pai thei hi.
• Santa kumkhat in khatvei bek hong kidawk a, Jesu in hong nusia ngeilo hi.
• Santa in na ipsungah van tawmkhat hong guangsak a, Jesu in na kisap khempeuh hong pia hi.
• Santa na inn khum tungpan hong tuaksuk a, Jesu na kongkhak ah dingin kong kiu a, na lungsim ah hong tum hi.

• Santa muhna dingin mite kigual a, Jesu muhna dingin ama min pulak ziau leng kingah hi.
• Santa in a pheitungah hong lumsak a, Jesu in a angsungah hong pom bikbek hi.
• Santa in na min theilo in, ‘naupang note aw, numei pasal note aw’ hong ci a, Jesu in na min teekteek tawh hong sam hi. Na min bek a thei hilo a, na pumpi tungah samzang omzah nangawn a theikhinpa hi. Na innkuan thu khempeuh a theihloh omlo a, na lungsim khempeuh uh zong a tel khin hi. Na hun paisa khempeuh thei a, na mailam thupiang ding khempeuh zong a tel hi.
• Santa a gil puak sungah muamkhum bek om a, Jesu lungtang sungah itna bek tawh kidim hi.
• Santa in Ho Ho Ho ciin hong lungdamsak pak a, Jesu in bel cidamna, thahatna, lametna hong piak ban ah na kisap hun sim in hong huh nuam tawntung hi.

• Santa in ‘kap kei in’ hong ci thei bek a, Jesu in, “Na van gik khempeuh uh kei hong suan un” ci hi.
  Santa in tengtabel leh muamkhum khawng bek bawl thei a, Jesu in nuntakna thak, lungsim thak, ngaihsutna thak tawh hong nungtasak kik hi.
• Santa in tawmvei hong lungdamsak pak kha dinga, Jesu in tawntung lungnopna hong pia hi.
  Santa in van neng pawlkhat hong pia a, Jesu in nuntak tawntungna hong pia in nang leh kei mawhna thaman in Singlamteh tungah hong si hi.
• Kiteh thei vetlo hi cih i mu hi. Tua ahih manin Christmas i cih ciangin Christ mah phawk tawntung ni.
  Topa in tu kum 2010 Christmas sungah thupha hong pia in na innkuan un hong ompih, hong kem tawntung ta hen. Kumthak 2011 hong tung ding sungah zong na khut nasep gah a ne dingin thupha hong pia zom lai hen.

free translation by,
Hau Za Cin