Japan te’n Myanmar gamsung ah zatding meilengthak bawlsakding

Japan te’n Myanmar gamsung ah zatding meilengthak bawlsakding

Japan Company te’n Myanmar gamsung ah zatdingin meileng “Train Cars” athak bawlsakding cih NHK pan kiza hi. Tua meilengthak bawlsakding Railway Project pen $64 Million thukimna ci uhhi.

Tuabang in Myanmar gamsung ah zatding meileng athak abawlsakding Company tepen Marubeni Corporation leh Niigata Transys Company te ahi uhhi.

Hih Japanese Company 2 te’n Myanmar Railways te zatding in meileng “train cars” akigawm in 24 bawlsakding uh thukimna neikhinta cihi.

Myanmar gamsung ah sumzonzia Economy pen hongkilaih in, khantohlam manawh mahmah a, ahi zongin Myanmar gamsung ah akizang meileng “railway system” tepen luiluata, kumtamkhin luata hi.

Tua ahih manin Myanmar Railways panin thunei te’n Project thakkhat vaihawm uh a, aomsa Railway System te athakzaw, ahoihzaw, Modernizing kipatding ageelkhia uh ahihi.

Tuabangin Myanmar Railways te’n meileng athak azatdingte pen Yangon leh Mandalay khupihnih kikal ataiding ahihi.

Adiakdiak in Yangon leh Taungoo kikal atai meileng te ah tua meilengthak 24 te kizangding cihi. Tua Yangon leh Taungoo kikalpen aki gamlatna 270km bang asau ahihi.

Tua khuanih kikal pen tulaitak meileng tawh akipai ciangin nai 7 sungbang kipaikhop mahmah hi. Ahi zongin hih Project thak mansiangin hileh Yangon leh Taungoo khuanih kikalpen nai 3 leh Minute 20 bek kitaiziauding cihi. Tuahi in, Project thak mansiangthei mengmengleh khualzinhun tomtuam mahmahding hi.

More: Kawlgamsung meileng puahnading Germany pan US$5.3 million leitawisawm

Ahi zongin tua meilengthak “Train Cars” tepen Marubeni Corporation te’n 2020 kumciang in puakthei panding uh cihi. Tuaban ah hih meilengthak te Japan Company te’n apuak uhciangin azangding Engineers tezong apuahzia, akepzia Maintenance zong hoihtak sinsak pahding uh cih kiza hi. Sawltak #zomidaily