Japan Company khatin Mandalay Beer Company leisawm

Japan Company khatin Mandalay Beer Company leisawm

Japan gampan Beer abawl Company “Japanese Brewer Kirin” kici te’n Kawlgamsung aom Beer abawl Company khatmah ahi “Mandalay Brewery” te Company leisawm uh cih AFP in genkhia hi. Company pen khatlehkhat akileisawn kawikawizel hi a, hih Mandalay Brewery pen bangzahtawh kileiding cih akician in pulak khianailo uhhi.

Kirin Company pen nidangin “Japan Brewery” zong kici ngei a, 1885 kumin akipankhia Company khat ahihi. Company aki patkhiatzawh kum 132 bang aphakhin hita a, hih hunsung ah sumzonna Business namtampitak nei uhhi. Tu’n Kawlgamsung aom Mandalay Brewery leikhin uh hileh Asia – Oceania Region sungah Kirin Company nasep khansawm mahmah uh kici hi.

Mandalay Beer zong Kawlgam sung 1886 kumpek panin akipankhia Kawlgamsung adingin Beer Brand masa penpen ahihi. Tulaitak Mandalay Beer pen Myanma Economic Holdings Limited (MEHL) te ii khutnuai aom Company khat ahihi.

2015 kumsung inzong hih Kirin Company te mahin “Myanmar Beer” abawlkhia “Myanmar Brewery Limited” te $560 Million tawh leingeikhin uhhi. Kawlgam sungah Myanmar Beer leh Mandalay Beer cihte minthang phadiak a, tua Brand nihte Kirin Company te khutsung ah atungding hita hi.

Hihvai tawh kisai in Myanmar Brewery Limited ah Resident Director asem laitak ahi Hiroshi Fujikawa kicipa ii genna ah Mandalay Brewery pen Kirin Company in avekin leisiangloding a, ahi zongin sumzian US$4.3 Million tawh Investment bawlding uh cihi. Tua hileh Joint-venture hiding a, Kirin Company in Mandalay Brewery pen 51% anei suakding uh cih Myanmar Times te’n Wednesday ni in suahkhia leuleu uhhi.

Hih Joint Venture kipsak nadingin ngetna laizong Myanmar Investment Commission (MIC) te tungah 2017 January khasung in kipiakhin cihi. MIC te ii phalna Approval apiak hunhun in Joint Venture akipanding uh cih kiza hi.

Hiroshi Fujikawa ii genbehna ah hihvai alemtheih leh Myanmar Beer leh Mandalay Beer tegel gawmkhopding kasawm masakei uh a, anihin Brand khattuakmah in sepsuakding kageelzaw uh cihi. Tuaban ah gamdang muntuamtuam ahzong aki lunggulhtuak leh Mandalay Beer pen Export bawldingzong ki ngaihsun cihi.

Heineken Beer pen Netherlands gampan hongki bawlkhia hi a, Carlsberg Beer pen Denmark gampan hongki pankhia hi in, Tiger Beer ahihleh Singapore gampan aki pankhia ahihi. Kawlgamsung ah hih gamdang Brands tuamtuam te in mun ngahzawpianta ahih manin, tua Beer Brands tepen Kawlgamsung pan akipankhia Myanmar Beer leh Mandalay Beer tawh demsawm uh kici hi.

Gamdang Company atamtheithei Kawlgamsung honglutleh nasep tamtuamding ahih manin, hoihveve hi. ZD Sawltak #zomidaily

Thuthak tuamtuam natheihnop leh Zomi Daily Page facebook.com/ZomiDaily ah Like napia inla, Follow namek khitciang “See First” acihpen namek ve lawm…..