Itna leh Deihsakna tawh Thuhilhna zui in kithawi ni

Itna leh Deihsakna tawh Thuhilhna zui in kithawi ni

Tate a itlo omlo hi. It ahihman in nu le pate in tate ading ahoih kici khempeuh deihsak hi. Pianuam hi. Pilsak nuam hi. Mi thupi leh mi nuamsa, cidam lungnuam ban ah gualtung tuang ding deihsak hi. Lamsang nuam den hi. Tate a gualzawh ciang, a lawhcin’ ciang, ma a-tut ciang a lungdam lo, a nuamlo kuamah omlo hi.

Tate a siatkhak ding ki patau ciat hi. A mindai ding ki deihsak hetlo hi. A lawhsapna uh, a guallelhna uh, midangte’ nuainet simmawhna cihte a lungdam kuamah omlo hi. Tate’ maizumna a angtang kuamah omlo hi.

Tua ahihman in nu le pa khempeuh in a hihtheih tawp uh leh apil asiam tawp uh tawh tate thuhilh in pantah ciat hi. Ei’ tate zah in i vengte’ tate khawng thu va kihilh dihdih khollo hi. Bangzahtak in apil asiam a, alian agol zong in midangte leh deihsaklohpi khawng thu va banhilh gawp cihbang omlo hi.

Tate i hihleh zong, i nu i pa zah in i vengte ahi zong in, i tanaute ahi zong in, kuama’n thu ong hilhlo, ong pantah dihdih lo uh hi. Khatveivei ong it leh ong deihsak pen ding a i lam-ette nangawn in ong haza pen thei zawzek laimawk hi.

Zomite i Minam nu le pa kua hiding hiam? Apil asiam tateu zong in ak gulmu bang a ong en gualgual lel a ong hilh ong pantah lo, ong tai ong makaih lo, ong gal-et lel a a-dai khekha, ama’ mimal metna ding a om kei leh ong theilo bang a a-om lelte, i veng i pam, meltheih tanau, khuapih tuipih ahi phial zong in, tuate’ tung pan bang lam-en lai ding i hi hiam?

Ong awlmawh keeilote’ tung pan bang lam-en a, ngakngak lai ding, i luzang ah tuang a azun a-ek ong pek leldingte, i manban ah lumlum ihmumu a i ma akhak niloh leldingte banghang a pahtawi a, tawisang luailuai lai ding i hiam?

Zomite, khanglo ta ni. Kalsuan ta ni. Mainawtta ni. Mipilpa’ ihmut cim mateng ngakngak laiding maw? Mi thahatpa’ thawh mateng mainawt ngamlo ding maw?Amau a tawldam, a ihmit cim dong na tawlnga in na ihmu mai le uh hilo ding maw?

Itna leh deihsakna tawh thu hong hilh, ong makaih kua om ahia? I nu i pa ding a acing( qualify ) kua om ahia? Khuadak ni.

Khai!… kithawi ta ni….. Pau Khat Suan