Itna, itna (Love) ~ Lengtong Pauno

Itna, itna (Love, ချစ်) ~ Lengtong Pauno

Keipen, Tuiphum Tapidaw (ABM) innkuan sungpan akhangkhia kahi a, Nipi Sang (Sunday school) pan ka khanglian hi. Ka neu tuungpanin, itna, ngaihna, hehpihna, khualna cih thute ka zaden hi. Kum 56 ka phata a, itna akici thu tawmcilik bang ka theipan hi.

Kum 27 in zi kanei a, hongit mahmah ing kacih kazi pen, a it ka hihlohlam tu’n ka phawk hi. A limciitna leh ameelhoihna bek a thupisak kahi gige hi. Itna sungah aki seelsim khiinkhian thu tampitak naom ahihmanin, hong it ing khawng, pheengpau’ ngam ding nahi hetlo hi.

Itna taktak hongnei pen, ”Agape Pasian” bek ahi hi. Pian’na nulepa in bel, tate’ tungah itna nei hi. Atelsiamding’n Topa’n thupha hongpia hen.

Khangno momno tuailai (Youth)

Amoi ahaam, ateek akhang, ahau azawng, apil ahai, alian aneu aapat, mi khempeuhin a ut alunggulh ciat uhpen, “khangno” nungak tangval (lenlai) cih ahi hi.

Ateek ahaam atul mahmahkhin pite pute’ kiangah, “Nungaklai tangvallai mahmah mawk uhciai” vaci lecin, lungdam mahmah ding uha, naupang neunote’ kiangah zong, ”Nungak mahmah tangval mahmah uhciai” vaci lecin lungdam mahmah zelding uhi.

LIVE: Lengtong Pauno “A Tamzaan Lungtang” Kum 50 cin Album (1962 – 2012)

Kuala Lumpur

Tulaitak a ka tawlngakna mun, Malaysia gam, Kuala Lumpur khuapi min pen adeihna akhiatna acihnopna ka ngaihsutsut leh, Khuapisung ka vakciangin, Kotaraya kiim, innkawmlak, leiinuai (under the bridge) cihkhawngah, mi honkhat alumlum akualkual pawlkhat ka mu hi.

Tua akualkual te’ lakah ka vakkik sialsialin apul asi khat le nih na omden tawntung ahihmanin, Oh!… Lumlum a si pen, Lumpul. Kualkual pongmah uh ai’ve maw… theita ing ei’. Kuala Lumpul ai’ve maw… kaci hi.

Ka thungetna

Nuntakna (hin’na, damna) abawl auk anei Pasian ahih hangin, khatveivei ka ngaihsut teh, sihna’ tungah aap hileh kilawm kasakhun om hi. Thu kangen a: “Sihna in ka nuntakna hong neih mah bangin, Itna aw, ka nuntakna hong nei in” ci in thu kangen hi.

Gulpiludin’ kammal pawlkhat

• Kahleii tungah suktuah.
• A sikkeu plastic hi.
• Muksanza akaangkhat deih si’ng e.
• India CRP te’ san, kaang hiven.
• Tua ka sik singkuang.
• Vokan tawhna buhteii.
• Zasanmeh athaklo khat duh ing cipakni.

Ka thusuak ciamnuih

Keipen guhletaang (Gout) natna anei khat kahihmanin, khuavotna munah omhaksa kasa mahmah hi. Tu zingsangin kaki ngaihsun kha dihdih a, ”Zomi kahi hi”, ka kicih lala pong hang, Zodawn Zolak taamlak khawngah, ka omngap hetkei hi.

Tedimmi zong ngap tuankeng. Khalkhami ngapkei zawlai ing. Russian nak ngapkeng. Ka kingaihsunkik a, ”Oh!… Zomi kahihna kasi kasa aive leh. Kaguh kataang himasa lopi” kaci hi. Hahahaha!!! Ka lungdam, Munkhai’pa