Itna ii dai sung

Itna ii dai sung

Ka kiteen zawh uh ni 2555 ni hong cin ciang amah tawh ka kizopdan uh hong nuam nawn hetlo hi. Aki-um dai sung khat pan apankhia numei pasal te zong hici bang vive hi inteh ci-in ka bangkua vang pan mipai suk paito te ka etkawm in ka ngaihsun kha hi. Aman bel kei them cilik mahmah zong aleh-et in hong en nuam nawnlo hi.

Azingciang aman vanteng amah mah in hong la kik hi. Avanteng aguan gaih khit ciang paikhia pahlo in khansung ah khuadak kawikawi lai hi. Thakhat thu in agei aa om lawh sung aa apple pum 3,4 khawng sawk in a ip sungah aguang hi. Tua apple te zanhal khat mah aa amah mah in ahong lei ahi hi.

Kei zong ka etkawm in ka nuih hong za sim pian pong hi.
Kiteenna cihpen anuihzak huai thu khat hisam ding maw?

Amah tawh ka omkhop lai in ahihleh ama aading ka awm khei in ka lungtang nangawng ama aading ka pia khia nuam hi. Kilem nawnlo in kikhen taktak ciang apple nangawng suakta saklo liang. Ama vanteng aveksiat phial aa aguan khit nangawng innsung khan teng ah khuadak kawikawi lai mawk hi.

Thakhat thu in akhuadak zuaktung pan hong khawl hi. Tua mun ah letmat 40 apha bawm akibawlsak amah tawh ka kiteenna marn omhi cih ka phawk lian hi. Tua marn zong aguan ding ka umlahkei hi. Bang hang acihleh tua marn agol in bawl ni hong cih lai in ken sum pialo ka hihman ahi hi. Hi bang te “khang khat ah khatvei bek aom ding hi. Pammaih sa se dah oo. Eh nih in alangtuak sik ni” ci in hong gen ngei hi.

Ka tutna pan dingto in tua marn ka la khia hi. Abawm phel in amarn lakhia ding in ka kithawi hi. Banghang hiam cihleh kei zong asumbei alang sik ka hihman in alang pen kei aa ahi hi. Aman adieh leh alang bek ngah ding.

Ahihang tua marn bawm tung aa akikilhna sik tang 12 te avek in kekseu gai in ka phelzo vet kei hi. Sing-at vala in ci in aman hong sawl bakbak lai hi.

“Kiphel theilo ahihteh heh oo nang man tang mai oo”
Ama thugen ka zakciang kei zong puambak in “Ikk … kisam kei. Nang man tang in”

Ki suang lungtang sakin tua marn amawtaw nung ah ka hehsuk hi. Ka lungsim sung ah bel kei le kei tha kingah zezen ing. Ahihang inn sung ka lut kik leh tua marn omna ah a awng heuhau indeina zuak ka muhciang amin ka gentheihloh natna khat la awm sung ah hong lut hi.

Tua khit zawh bel sunlam zum kah nitaklam bar kah cih bangin ka ni te nuamtak in ka zang hi. Ahihang inn ka tunsim tua inndeina zuaktung aa a awng pen in ka mit hong la den keei hi. Tua bang hunciang natna lomtang te ka awm sungah hong kidenna uh hi.

Kha bei ni ciang in ka lawm dang te akop in akop in paikhia uh aa kei hong nusia uh hi. Akop nei lo kei ka hihleh inn lam ka mahnawh khiankhian lel hi. Inn ka tun ciang computer ka hong hi. Home page pan amah ii blog hong kidawk hi.

Hi blog pen amah kum 30 acin ni aa asuahni letsong ding aa ka bawlsak ahi hi. Lunglenna namkhat mah hiding hiven ama nisim thuciaptehna ka hong kha hi. Agelh tawpna pen kei le amah ka kikhen ni ahi hi.

“Amah zum pan hong ciah ciang amaduh mehbawl sakin wine thawl khat tawh ama hong tun ding ka ngak hi. Ahihang tua nitak ama hong tun ding ka ngak kawm in sabuai tung ah ka ihmu ka hi.”

“Zuak tung aa marn bawm aphel lai in zong amah atal ah akhua-ul nel te kai hi. Akilhna sik te kekseu mah sam tazong tua marn bawm kip sak zawsawp hi. Azenzen in itna ah zong hidan hileh bangzah in ahoihzen tam …”

Ka awm sung ah akitam zai aw khat kaza hi. Computer screen bek ka en gige kha hi. Ka khut tun ah ka khitui te hong tuksuk ciang khua ka phawk kikpan hi. Ka mit sung ah khitui te nadim khinta hiven.

Tua ama post nuai ah comment khat ka gelh suk kha hi.
“Inn ah navan khat omlai. Hong la o.”
Azin ciang amah inn ah hong tung hi. A umphalo dan khat in hong dong hi.
“Bang van maw ka mangngilh”

Kei zong amah hoihtak en gige in bang mah ka pau kei hi. Aman thu khat athei bangin amai hek in zuaktung aa marn omna a-awng pen hong en hi.

“Ka van bang ahia a omlai”
Gam daihna hong susia hi. A liangko pan len in mal khat ta in ka gen hi.
“Hi lai ah … hi mihing zong nang neih van ai ve”

Tua mun ah amah zong cih nading theilo in ding dide hi. Tua kacih khit ciang ka kampan kammal te mal khat zong hong zuankhia zo nawnlo hi. Asawtlo in amit pan khitui te zokhi tang khau kitat bangin hong pulh zaizai hi. Amah ka awm sungah ka kawi cip kha hi. Aman zong ka liang pan akhut nih in hong pom hi.

Hun bang tan sawt khin cih zong ka thei man kei hi. Aman damdam in kei hong sawnkhia hi. Tua khitciang plastic tawh akitun na khat amawtaw sungpan hong lakhia hi. Athoh hong kheh in tua marn pen tua a awng zuaktung ah hong suang kik hi. Damtak in aliangko pan kakawi kawm in tua marn ka nih un ka en khawm uh hi.

Khat le khat ka lu uh kisai sak in ka khut te uh kiptak ki len in tua marn mai ah ka nih un lungdam mai taktakin ka ki enen uh hi.

Ataktak in nupa cihpen marnbawm tawh kibang hi. Akilhna sikte kekseu in akiphelzawh kei leh cikmah in kiphelzo nawnlo ding hi. Ko ii ki-itna zong ka mai uh aa marnbawm tawh kibang in ka nuntakna uh ii ahoihpen hunte bawm sung ah ka guan mah bang un ko zong atawntung in ka kipta ding uh hi.

Peter Suumpi
2.9.2014
Sr: Unknown Auther (London Global Times sung pan)