Itna i nei takpi hiam?

Itna i nei takpi hiam?

Leitung nuntakna ka ngaih sutsut ciang lamdang kasa hi. Ni hong suak zel in hong tum zel in kikhel ngeilo in ama suah hun leh tum hun in ong suakzel hong tumzel hi. Tua nate sang a bawl Pasian lamdang zawkan lai hi. Pasian pen na khempeuh piangsak Pa hi’n tua a piansak nate pianghen cih tawh a piang ziau ahihi. A lamdanna ngaihsunsun leng kihai zo phial ding hi. Pasian a neikha eite pen mihampha mahmah i hihi.

Pasian hong itna pen a dang bangmah ngaihsut kullo in i mawhnate sang Ama hong itna lianzaw lai hi cih i phawk ding bek kisam hi. Tua ahih leh eite Pasian thu-um Pasian tate i hih leh itna i nei taktak hiam cih ki ngaih sun pha ni. Tuhun ah Pasian thu-um pawlkhatte bang itna neilolua kisa amaitai zo ngeilo uh hi.

Mikhat in a tungah khialhna neileh maisak cih thadah thuk kik nuam tentan thei mawk uh hi. Sia minpuak upa min puak ciang tawh lungkimin ahihhang mikhempeuh it kimzo tuanlo Ama nai huaiteng khawng leh sum ngahna ding omte khawng tung bek ah itna nei cih Pasian nasem sia leh upa pawlkhat om mawk uh hi.

A diakdiak in Gamdang a om ei Zomite sungah Pawlpi tampi kigawm khawpna Zomi Christian Fellowship (ZCF) pawlpi a vengvengah om hi. Tua pawlpite pen Pawlpi tuamtuam khuatuam pan a ki gawmkhawm vive ahihi. Fellowship ci napi’n Pawl khat sia upaten pawlpi deidan thei mawk uh hi.

Fellowship min i puak nop taktak leh RC, ZBC, SDA, AG, UPC.. cbt khentuam neilo a i kipawl theih ding ahihi. Tua ahih kei leh Fellowship zat ding hilo in AG na hih leh AG pawlpi cih ding hipah hi. Bangbang ahizongin Fellowship mah civeve ni i cih leh Pawlpi kim i it ding akisam hipah hi.

A taktak in i biak Pasian pen Itna a nei Pa hi’n mawh neite hong it manin sihna dong hong thuak Agape itna tawh hong it a nungta Pasian ahihi. Tua Itna a nei Pa um in Ama nungzui taktak i hih leh Itna neih ding hipah hi. Itna in lungduai in thumaan hi. Sanggam nang/Kei zong Itna i nei takpi hiam? Zam Suan Langh (Suanno) Malaysia