Itna Banzal ~ Sia Do Khup

Itna Banzal ~ Sia Do Khup

Lai Siangtho in “Tuhun pen hun hoih lo hun ahih manin na hun neih khempeuh uh a hoih lamin zang un.” EFESA 5:16 TDB Kong it lawmte aw, i mipihte pulnatna pan i hotkhiat zawh nadingin Topa kiangah thungen kawmin a vaihawm pawl, a kuankhia pawl, a piakhia pawl cih bangin i mun ciat panin ma i pang khawm ciat hi.

LAUHUAINA TUAMTUAM LAKAH

I theihsa ciat mah bangin i nasep pen lauhuaina nam nih nam thum kigawm hi a, Topa hehpihna tawh i cinat lawh khak hangin Topa in hong damsak kik a, lauhuaina dangte tawh zong hong kipelhsak hi. Haleluiah.

MIPHAK LITE BANGIN

Samaria khuapi anvak nadingin mi’ nawlkhin miphak li a kizat bangin tutung a, ei a mapang khawm teng pen mi minthang leh pawlpi minthang vangvang i om se kei hi. Israelte hotkhiat nadingin a kizang Jefthah zawlta hi a, a lawmte zong “bangmah man lo teng” ahih mah bangin tualniamte itna banzal zangin Topa in nasem hi.

BETHLEHEM KHUA AW KHUANEU NA HI KEI HI.

USA ka pai zel a, pawlpi minthang ahi hetlo, Zomi Christian Church, Amarillo, TX, pawlpi leh Zomi Baptist Church Marshalltown pawlpi gelin $ 10,000 (Tengh 140) tuak hong khak uh a, i mipihte pulnatna pan a hotkhiat nopna uh zahtak huai ka sa mahmah hi. Pulak ding pawlpi leh mimal tampi om lai, nidang ciang ci ni maw.

A KISAP MAHMAH HUN LAITAKIN

Ei lawmta teng, thingtheng thilthial geuh hita leng Topa in hong hehpih a, Zomi bup dongtuakin khitui a luan laitakin huhna nasep i sep khak pen manpha diak sese hi.
Yangon pan kipanin India gamgi, Ciau, Selbung, Vanglai, Tamu dongah Zomi, Zo, Thahdo, Kawl cih deidan om loin Kalaymyo, Tedim, Tonzang, Cikha i khuapite a kipan khuata tampi ah itna banzal kikha thei hi. Haleluiah.

ITNA VEINA TAKTAK TAWH KIPIAKHIA

Tampipi piakhia napi “Sia aw ka min ka pulak mahmah kei ou maw” a ci tenten vive hizaw ihih manin i veina siangtho ka sa mahmah hi. Nungak khat bangin ama ip sung panin Ks.7,000,000 (Tengh 70) hong pia a, “Sia aw FB ah hong post mahmah ken maw” ci-in thumvei bang hong gen phapha hi. I lungdam lua-in a min i gen loh bek mah hita ee mate, na upmawh khawng uh om inteh.

KIMUANNA IN HONG LAWHCINGSAK HI.

Pasian na muang masa uh a, tua khit ciangin kei banglel nong muang uh hi. Tua pen a hun lap takin na i septheihna ahi hi. Meeting kul loin na zek thei ka hih manin “Ken tua pia ning” ci-in lai nong khak nak uh leh na sum uh hong tunma-in na piak nopna mun uah a van na tung khin ta hi. Tua-in kiallap mahmah hi.

A PIL LO TENG NASEPNA MIPIL TEN NOPTUAM PIH

Kawlpi ah sih leh nat hong tam luat ciangin i fund neih khempeuh tawh oxygen vive ka na lei ziau hi. Tu-in a sem tampi a om hangin tua hun lai-in a sem eimi oxygen nei omlo phial ahih manin i mipih tampi leh mi minthang tampi, minam maikai, Father, Pastor, Ph.D tampi in zang kha man uh hi. Tuni a i vui ding i it, i zahtak mahmah Pu Cin Sian Thang zong oxygen concentrator khat hunciam omloin i zangsak hi.

Hih bangin i zek hangin nong paupih het kei uh a, tua pen hun lap takin khua tampi, mun tampi, na tampi i septheihna hizaw hi. Tu in bel “Oxygen na lei na in maw” ci a nong piak teng uh tawh kituak oxygen bung siit (ciansak)in a dang fund tawh i lei teng i zuak kik sawm ta hi. Zatui leh antang tha dipna lam leina-in kizang kik ding hi.

THUMNA LEH ZAKSAKNA

Ei thingtheng teng pen khua khat, pawlpi khat, veng khat ading bek sem hiloin i minambup huam ihih manin fund tawmno i neih pen Zogam khua khempeuh huh nadingin kicing zo vetlo hi. Covid 19 positive leh lockdown-na khuate kimasak zawdeuh bek ahi hi.

I fund zong a bei kuankuan lam hita ahih manin ei khua ei pawlpi adingin eimau mah in thasan a hanciam ding i kihanthawn hi.

More: Oxygen kikawm theita ~ Sia Do Khup

Tu a hong piakhia ten zong neihval lamval hipeuhmah loin a nek tang, a mopawi bawl nading nangawn hong pia uh hi. Ei Kawlgam sunga om ten zong i sep ding i piak ding ahi hi, cih kihanthawn kawmin hong kipha zolo khuate i khasiat loh ding kong thum hi. Pasian in Zomite a cidam a khansau dingin hong siam ta hen. Itna veina tawh; Evan. Langh Do Khup ( Khuata mipa)