Israel in a uk khumna West Bank a teennading inn 3000 lamsawm

Israel in a uk khumna West Bank a teennading inn 3000 lamsawm

Feb. 1, 2017: Obama’ hunin Israel ten teen ding a inn lam ding a dal den hangin, Trump in President a letna ni 11 bek hi pan a, Israel in Trump in Israel a gupna hunpha la-in West Bank sungah teen ding inn 3,000 lam beh sawm hi. Tua dingin Israel Defence Minister Avigdor Lieberman leh Prime Minister Benjamin Netanyahu in Judea-Samaria kiim-ah teena ding 3,000 a kibawl behna ding thukimna pia ta hi ci-in defence ministry in zan in pulak hi. Israel in West Bank pen 1967 in Middle East war kici ah a lak ahi hi.

Trump in January 20 in US President a let a kipanin East Jerusalem a inn 566 leh West Bank ah inn 2,502 Israel in lam beh theihna ding na thukimpih ta hi. Hih thu hangin nung Thursday in Israel ulian ten East Jerusalem ah inn 153 a kilamna dingin thukimna na pia ta hi.

President Barack Obama hun in bel Israel in tua bangin teenna ding inn lam leh gam nih bawlna ding thu tawh kithukimna (two-state solution) tu kham a kamkupna nawngkaisak ding hi ci-in na dal den hi. Ahih hangin Trump in Israel a gupna thu hangsan takin a pulak manin Israel in tua hun hoih hamphatpih theihna dingin hong gamtang hi.

Nung kalin Prime Minister Netanyahu in teenna ding inn kilam kik dinga, kilam beh lai ding hi na ci hi. Israel in teenna ding inn a lam beh ding pen Obama leh Iran in na langpang den hi. Israel in a teena ding a bawl behna ding pen leitung thukham (international law) in zong thukham palsatna hi na ci hi.

More: UN Youth Forum 2030 kamkupna tomkim ~ Bob Tuangpi

West Bank, East Jerusalem sungah Israelte mi million kim khat teng uh hi ci-in Israeli rights group B’Tselem in ci hi. Obama’ administration in West Bank leh East Jerusalem ah Israel in teenna ding a bawl manin na mawhpaih napi Trump’ administration in mawhpaih lo hi. Source: News agencies/ Thang Khan Lian