IS te’n Iraq Police te Checkpoint suamsak in 7 that

IS te’n Iraq Police te Checkpoint suamsak in 7 that

Jan. 2, 2016: Mosul khuapi panin km. 500 gamla leh Baghdad panin km. 180 gamla a om Najaf kianga Iraq police checkpoint IS ten va suam uh a, police leh galkap kigawm 7 a thah ban uh-ah 29 kapliam uh hi. Police checkpoint a kisuamna mun lian pen al-Qasisiya kiang hi a, sehnel gam (desert) panin ISte mawtaw nih in hong tai uh a, police ten a checkpoint uh-ah a na khawlsak uh leh hong suam uh hi ci-in local police sources in pulak hi.

ISte mawtaw hawl khatna pen in a mawtaw sunga bomb puaksak a, a mawtaw nihna hawlpa a mawtaw tawh tai a, police ten delh in tua mawtaw nihna sunga tuang mi nih kaplum uh a, a mawtaw (car) zong bomb tawh kapzan sak uh hi. Iraq interior ministry spokesman Saad Maan in hih police checkpoint ah kidal zo lo hi leh hih mun panin km. 40 gamla a om Shia Muslimte khuapi siangtho Najaf ah sihpih bomb puaksak dinga kuan uh hi ci hi. IS ten hih police checkpoint pen ko suam hi a, liamna tuak mi 17te lakah nautang zong kihel a, sihpih bomb a puahsak ma-un thau tawi nga in police checkpoint kap uh a, a ngana pa-in sihpih bomb puaksak hi ci hi.

Najaf pen Iraq gam-a Muslim tam pen Shia kicite adingin biakna khuapi (religious capital) bangin kingaihsun a, IS ten suam mun mahmah ta uh hi. IS ten Shia Muslimte pen biakna panin a lampialte (heretics) hi ci uh hi.

Oct. 17 pek panin Iraq galkapte leh a pawlte US ten tung lam panin huh in ISte ukna Mosul khuapi lak kik ding a hanciam hangun tu dong kila zo nai lo a, Iraq elite force kici ten Mosul khuapi seh li suah seh khat bek la zo pan uh hi. Prime Minister Haidar al-Abadi in Mosul khuapi elite force ten April kha ciangin la zo ta ding uh hi ci kik leuleu hi. Mosul khuapi lak kikna ding tawl khat khawl leuleu uh a, a second phase dingin nung kal Laithai (Thursday) in kipan kik uh a, tua khit ni li sungin Iraq galkap leh a pawlte mainawt zel uh hi kici hi.

More: Banghang in kumkhatsung in kumthakni misi tampen citciat hiam?

IS te pen USte meetna leh phattuamna ding (interest) hi kei leh lim takin ISte kido leh kha nih sungin kinuaitum khin ding hi ci-in military strategist leh political experts ten ci uh hi.
Federal police officer in Iraq galkap ten Intisar leh Siha neighbourhoods kicihna teng la khin ta uh a, tu-in Salam siansuahna (clearing) nei lai uh hi ci hi. Sources: New Agencies/ Thang Khan Lian