IS tawh kizom thautawi te’n Hostage in amat uh Malaysia gammi 5 ki honkhia

IS tawh kizom thautawi te’n Hostage in amat uh Malaysia gammi 5 ki honkhia

Philippines gamsung aom IS migilo tetawh akizom Abu Sayyaf Militants kicite’n kha 8 sungbang akepcip uh Malaysia gammi 3 te khahkhia kikta uh cih theStar pan kiza hi. Sumtawh tatsak kikding in Hostage in amat uh hi a, zanni Sunday (Mar 26) ni in Filipino Military te’n Sulu Province sung aom Jolo khua panin ahot khiat uh ahihi.

Thunei te genkhiatna ah tua Hostage in akiman, aki khahkik tepen Fandy Bakran (kum 27), Mohd Jumadil Rahim (kum 24), Mohd Ridzuan Ismail (kum 33) te ahi uh cihi. Tulaitak athum un Philippines Military te’n kemlaiphot uh cihi.

Eastern Sabah Security Command (Esscom) commander Datuk Wan Bari Bari Wan Abd Khalid kicipa in agenkhiatna ah hih Malaysia gammi 3 tepen ki honkhiazo cih Philippines Military te’n hong zasak uh cihi. Ahi zongin bangci bangin ki honkhia cihpen Filipino Operations in genkhiat kicianna neinailo uhhi.

Hih mi 3 te banah nungkal inzong Filipino Military Operations te’n Malaysia gammi 2 honkhiakhin uhhi. Tua tezong Abu Sayyaf Militants te’n Hostage in amatcip mah uh hi a, Abd Rahim Summas (kum 62) leh Tayudin Anjut (kum 45) te ahi uhhi.

Nungkal aki honkhia mi 2 tepen Philippines pan anih un Malaysia, Kuala Lumpur ah puakkhin uh a, tulaitak zatui zaha tuamtuam Medical Treatment akibawl laitak ahihi.

Hih akiman mi 5 tepen nungkum July 18 ni in aki mankhawm uh ahihi.

Abu Sayyaf Militants kici thautawi migilo te’n sumtawh ki tatsakkik dingin Hostage in mi manzelzel uh a, sum tampipi tawh ki tansakkik uhhi.

Nungdiak mahmah in Germany gammi Jurgen Kantner kici puteek kum 70 aphakhin khat $600,000 tawh hongtankhia un ci’n tangkokhia uh a, February 27 ni aciangtan pen kitanlo ahih manin thatlum takpimawk uhhi.

More: Philippines ah IS migilo tetawh akizom te’n Germany gammi khat a ngawng tansak

Germany gammi zong azi tawh amatkhop uh hi a, azi pen amatcilni uh kaplumkha uhhi. Hih Malaysia gammi 5 tepen sumtawh kitat cihlah kizalo in, biakna kibatpih ahih manin ki maisakmai uhhiam cihnop huai dektak hi. ZD Sawltak #zomidaily