Iraq galkap te’n Mosul nisuahna lampan in nawkding hanciamsawm ta

Iraq galkap te’n Mosul nisuahna lampan in nawkding hanciamsawm ta

Nov. 5, 2016: Iraq galkap ten Mosul khuapi kianga om district guk ISte khut sung panin laksak zo beh uh a, tu-in Mosul khuapi nisuahna lam panin nawk dingin nasia takin hanciam uh a, kikaptuahna nasia mahmah hi kici hi. Iraq galkap ten thupulakna a bawlna uh-ah Counter Terrorism Service kici ten ISte khut sung panin district guk – Malayeen, Samah, Khadra, Karkukli, Quds leh Karama la ta uh a, IS ten supna lianpi tuak uh hi ci-in pulak uh hi.

Galdona mawtaw (armored vehicles) tampi zangin Iraq galkapte mainawt zom zel uh a, tung lam panin huhna ngen in, Iraq kumpi lui Saddam Hussein min tam a kiphuak Tahrir leh Zahara kicihna mun nasia takin kap uh hi. Iraq TV ten galdona nasia mahmah hi ci-in gen uh a, thau leh bomb kikapna hangin meikhum vom kaite suaksak uh hi.

Mosul khuapi lak kikna ding pen Iraq galkapte – Iraqi regular troops leh special forces kicite, Shia militias, Kurdish Peshmerga fighters kici kipawl khawm galkap 30,000 val hi a, tung lam panin US leh a pawl ten huhna pia in, Oct. 17 pek panin kipan ta uh a, tu dong Mosul lut zo nai lo uh hi. Galdona pen Mosul kiim teng bek hi lai a, Mosul pen a galkap uh leh tung lam panin a kap suk bek uh hi lai hi. Mosul khuapi pen mi 1.5 million kiim teenna mun, Iraq gam adingin khuapi lian pen nihna hi a, UN in hih khua lak kikna ding ngimna tawh galdona hangin dongtuahna lianpi (humanitarian crisis) leh galtai lompi piangsak ding hi ci-in a patauh thu gen hi.

ISte makaipipa al-Baghdadi in zanhal in audio message panin thupulakna tangko khia a, ISte kuamah taikeek lo ding leh IS commanderte’ thu a man’na dingun theisakna gen hi. Iraq galkap ten bel Baghdadi Mosul khuapi ah om lai hi a cih hangun British Foreign Minister Boris Johnson in bel Mosul khuapi panin Baghdadi tai khia ta ahih manin US leh a pawlte adingin galdona hamsa tuam mahmah ding hi ci-in gen hi.

Mosul khuami ten Reuters news agencyte kiangah telephone panin a genna uh-ah Mosul khuapi ah ISte kilim thawi mahmah uh, Mosul khuapi sung mun tuamtuam ah thaupi (artillery) leh rocket launchers koih dimdiam in, mipi teenna munte ah zong koih uh hi ci uh hi. Pawl khat ten IS ten hih bang galvante Wahda district leitaw lam ah zong koih uh a, Mosul airport kianga om Ghizlani district ah zong inn tung leh sing kungah koih kawikawi hi ci uh hi. Mosul khuami khatin IS ten vanleng kap khiatna dinga kizang anti-aircraft machinegun leh a kiangah rocket launchpad leh mortars zong koih uh hi ci-in gen hi.

ISte do dinga kipiakhia galkap Shia militias kicite zanhal nitak in district tuamtuam ah IS ten artillery shells leh rockets tawh na kap uh a, Mosul la kik dinga kuan galkapte zong IS ten suam kawikawi uh ahih manin thauging ten inn kiliingsak zo hi ci-in khuami ten gen uh hi. Mosul khuapi panin Km. 100 gamla a om Shia Muslimte teenna Shirqat khua-a biakinn (mosque) leh inn pawl khat zong IS ten halsak in, Shia Popular Mobilisation Forces (Hashid Shaabi zong a kici) galkapte mi sagih IS ten a thah ban uh-ah local police officer khat zong zan in that uh hi. Popular Mobilisation Forces kicite pen a tamzaw Shia vive hi a, nung Kiginni panin ISte dona ah hong kihel uh hi. Source: Al Jazeera News And Agencies Thang Khan Lian