Interview with Lengtong Pauno

Interview with Lengtong Pauno

Ni khat Minuamsa Video Studio neipa Babu (Paupu) innah hawhin ka holim laitakun 1981 pawlin lasa minthang Zomi bupin i theih ciat lasiam Lengtong Pauno zong hong hawh a, a ma kiang pan theih nop honpi dongin ka kiholim uh hi. Tuate Zomi bup sim theih ding leh khantoh pih ding lunggulhna tawh lai-in kong suaksak hi.

1. Na minpi le neulai thu? Nu le pa?

Ka minpi Cin Za Hu Pau hi. Kapu min Khai Cin hi. Ka pa Zel Khua Kai, Tunglut beh, Tuithang khua hia, ka nu Ciang Khua Niang Songput beh, Lailo khua hi. Kanu le ka pain tanu tapa (11) hong neih na sungpan a nautumpen pa, a kongkhakpa hi ing.

2. Pian’na khua leh tulaitak teen na?

Keipen ka khua Tuithang hi a, katangval khiatna Tonzang hi-in, kapian’na Tedim hi. 1962, August 23rd ni-in Sakollam kapa’ innpi sungah kasuak hi. Tulai takin bel kapu kapa’ leitang, Tuithang khua mahah ka zi ka tate tawh teeng ing.

3. Innkuanpih ee leh?

Nu le pa’n hong nusia khin hi. Ka zi neih pen 1990 June 25th ni-in kawlpi khua ateeng Vangteh liapaalno Lia Goih Khan Dim (Vangaw)beh tawh Tonzang khua ka u pi’pa Sia Cin Go Kap innpi sungah Rev.Thawng Khua Nang in siangtho kiteenna hong pia hi. Tulai takin tapa 3 ko innkuan 5 pha ung.

4. Bang hanga Lengtong Pauno hong kici?

Ka nu le ka pa’ hong sapna “Pauno” ahih manin amau hong sihsan khit Lengtong khui ka bawl uteh Tg. Pauno mintawh la hong sa ing. Tua khit nungah Pauno min mah zanga lakhum / lasa hong kibeh lap ciangin keimin hong gennuam te’n… Lengtong khuisunga lasapa Pauno hong kicihcih napan “Lengtong Pauno” cihmin khat hong piangkhia hi le kilawm. Kei lungsim ah bel, ka nu ka pa ka pi ka puin sasi taaka, sasin salung tawh hong phuah min leh pawlpi siapa’n Pasian tunga hong ap khit nasa kamin mai khawngah atuamtuam thuah sawm khol keng. Vantung laibupi sunga ka min tawh a kitel khialh khaak ding lau ing.

5. Kum bang zah naphak cianga laphuak? Bangkum in khum? Studio ee?

Kum (8) khawng kaphak ciangin keiphuah tawm Pasian phatna latom nonote Sunday Schoolah sasata ing. Love song pen ka khial kei leh kum (11) ka phakin nungak talpi khat ama theihloh kalin “Na min theibang lolo nuam ing” cih la khat phuah tazen ing ei, ka ngaihsut kikteh ka maizum. Ka lakhum kipat kum bel 1981, Studio bel Lynn Studio, Yangon hi.

6. Ladawng bangzah phuak? Dawng bang zah sa? Khui bangzah khum / hawm?

Ka laphuak pongpong la namkim kigawm in bel dawng 200 pawl khawng hi-in teh. Studio ah dawng (60) khawng kisa khin hi. Khui pen lawmte tawh kigawma ka sakkhop uh Lengtong No 1,2,3, leh mi dang kihel-lo keiguak sak khui 3 khawng bek hipan ee.

7. Zomi sungah nang mai-ah lasa/ lakhum masa a om hiam?

Ko mai a lakhum masa pen ka theih khialh keileh, Sia Lianbawi makaih “Agape ltna late”,T.S.Khai’ makaih“Sihna kigozo” khui leh U Lamh Cin te ‘ khum “Kumpi te’ Kumpi” ….etc

8. Na laphuah sa sungpan hoih na sak pen?

Hoih kasak penpen ci-a khat lian ka telkhiat ding theikei mai-ing. Gamla pan khat, Nu’ la pan khat, Zawl la pan khat cihbanga a teel hileeng akoici tam? Ama mun leh ahun tawh kituaka hoih pen kasak vive hi. Nupi te-in asungpana piang tate mi’n hoihsak pih takeileh hoih asaklel bangdan mah hilo ding ahia’… Aphuak phuakte sang’ aphuak ngeilo te’n ahoih ahoihlo theizaw bilbel hilo maw.

9. Khui hawmsateng sungpan bangkhui tha ngah pen na hia?

Khui hawmsateng sungpan Lengtong 5 na “Zogam hongpaal ding” acih khui mah thangah kei pen ing…

10. Naphuaksa late sungpan nang’ phalna omlo pi-a hong kikhumsak a om ngei hia?

Eimite’ sungah aphuak te’theihloh kal-a la kikhumh simsak pen AD 2000 cin” ma hun beka kizang kasak leh nahi het kei mawk ei. Kum 2000 khit-a akihawm Zola Pasian phatna lakhui khatah 1985, April lai-a kaphuah lakhat pen Pasian nasem pasal khatin nasa in-ah, alaphuak zong Pasian nasem numei khat mah na hi mawk. Ken bel, Aw… ka it mahmah kasung pan apiang ka tanu… nang’ pasal vakthap khat-tawh na lumkhawm maw’…. ka heh ka khasiat mahmah hsngin ke’n, nang kong pai theikei hi, banghang hiam cih leh ka si ka sa nahi hi, ka cihsan lelbek hi.

11. Lengtong Series No 1. sunga, Tunsung khat pan ….. acih lapen, pawlkhat in Vum Nang’ phuah hi / T.S. Khai hi / Lengtong Pauno hi kici pawl khat le khat kiseel ngeiingaii thei zeel uh ai teh, aphuak taktak nong genthei dia?

Hee’… genthei e. Hi la hong pian ‘ khiatnapen, Lengtong No.1 khum ding U Sua Mang tawh Zangkong paisuk ung. Nitak khat Kamayuat / Tadaphyu a khadawmee Cia Pau” inn sapna sungah kei, T.S. Khai leh Sua Mang tawh koteng thum ka omlai takun T.S. Khai in laikung le laidal hong tawi-in.. tunitak, Tunsung khat pan piang hing ngeigei hang e, cih thulu zangin lakhat phuak khawm dihni ei hong cihna tawh, ka kikupkhopna uh pan hong piang khia la ahi hi.

Hila pen Lynn Studio ah ka khum uh teh lawm Vum Nang apaisuak (Sprano) zuisakin groupsong in ka sa uh hi. Tuahun laitakin a phuak kithupi ngaih sut masa khollo napi, ala hong mintang bilbel ahih manin aphuakpa ahi ding pen hong kikhuanung ut ciat hileh kilawm hi.. Tuahun lai-in zong Laphuak, Lengtong ciziau ni kacih sa uh ahi hi.

12. Na late a tamzaw lungzuan’ ladan vive hi a bang hang hiam? Zomi lasiam dangteh’n zong lungzuan’ ladam vive sazaw a bang hang hiam?

Ei’mite pen abeisa hunlui sunga i tuahkhak gentheih haksat nate bekbek agengen, aphuakphuak, asasa minam i hi-a, naumin phuak lehang zong i lungzuan’ i khuangaih nateng mahtawh a lolote ihi hi. Tuamah bangin kei-a kipan, abeisa i nung lehlam ngakawmsa a laphuak ihihmanin lungzuan’ la vive hongsuak na na hi hi. I mailam kalsuan nading nangawn-ah zong nunglehpai (imai lamah nungkiin) ihih manin i khan’toh ding zahin khangto theiloin i zekai hi. Tua ahih manin tuni pan kipanin i mailam ngakawmsa leh tunglam en kawmsa-in khalsuan tading hi hang. Tua hileh i kamvang panin lungnopna leh gualzawhna thu le late hongging khia dinga, i nuntakna zong hong kilamdang taktak ding hi cih ka um hi.

13. Tuhun Zomite’ sungah lalam, tumging (music) lam khan’tohna bangci muh nahia?

Nakpi takin khangto hi ci-in mu ing Phuah siamna, sak siamna, tum siam nate akhangto bek hilo-in, asiam mimal mahmah zong khangto ka sa mahmah hi. Gamdang pan Music Degree ngah te i neita a i gamah sin theihna sangte nei ta ihih manin tulai khangnote hampha kasa mahmah hi. Banghang hiam cihleh ko’ hunlai banga phuahdan, sakdan, tumdante tualsiam hinawn lo-in modern style tuam tuam tawh kiphuak, kisa, kitumta cih kamuh ka zaktak cingin ka lungdam lua kisa in kei le kei bang zumhuai ka kisa liang hi.

14. Zomi lasiamte’ sungah Lengtong Pauno ci a na minthan’ deuhna banghang hidingin na um mawh a?

Minthang deuh tuanding kahia! Na thusiam man hin’cia.. he he.. Mi’ adingin bangmah ahikei zongin keitawh kituakin bel tu-a ciang katum’ zong alung damhuai phadiak mah hi. Siam a minthang ding hilang kei kekkek kidawk khain ki um keng. Ahi zongin ka nu ka pa’ tungtawna hong luang Pasian thupha letsong taktak hi cih pen up cihtak um ing.

15. Zomite’sungah na laphuah na lasakte midang’ a tawh kibanglo a atul theih loh phadiak pen, nang’ bangci phuaha, bangcisak tuandeuh na hia?

Kei zong theituan kenge. Topa thupha mah hilo dia… maw! Ke’n bel atam zawin la kaphuah teh a Aw (Tune) zong masa ing. Tua la aw pen tamveipi sasa in maumanuleeng … tua aw tawh kilawm kituak ding lathu / lamal hong piang khia hi. Tua la pen tamveipi takmah sasa, sasa kawmin la leh lamal gualh dan te puahpha toto ing. Adiak diakin zingsang i thawh tung phet, i lungsim ah thudamg ladang honglut ma-in enkik lehang hoih pen hi. Ka kam mal zatte zong Zo lakam a maan hiam?

Midangte thangpaih / khasiat theihna ding aom kha hiam? Ka la kammal te’ hangin zumkong mangk ong hong kitun’..ding hileh ka dawng thei diam? Ahih keileh ka thuak ngam diam? cihbang danin ka la ii akhialhna amawhna ka zonga ka sittel hi. Tua bang teng khit ciangin Studio ah khum theih dingin ka kipsak hi. Hi banga lungsim siangtho taktawh phuaka ka lung sim khempeuh tawh sa kahih manin a khanto, a tulhak deuh hi dingin ngaihsun ing. Angai aza te’n khitui aluan’lawh ka late pen khitui mahtawh ka phuah khop late mah hi pah hi.

16. Lasak cil, Lakhum cil a natuak haksatnate……..?

Uukna bekmah hia, neih sa-in hong pia khollo ahih manin haksatna bel tam hi. Lasak pawi (Show) khat nei ding hi le hang zong apat pan atawp dong mah, vaai khempeuhah eimah mahin innteek tawh, bangkua tawh, tanu tawh a kithuah khawm hi. Tua banah i sumneih teng na ngawn bei lai ahih manin a sawt loin sum tha lawh a paitoh kul cih khawng dan din mun hi. La khum ding cileeng zong lah tu hun bang a Kawlpi khawngah Studio om nai lo…. Zangkong pai kul….. tua Zangkong khua acih pen, sunsiah tuna khe tawh tunzawhna lah hilo lai… a tawm bei thei pen tawh pai suk…. Zangkong tung mah leeng zong, tuhun banga eimi tam nailo… ei lah tual talo, hai lailai ihih man in, sum tampi a nei himah leengzong a haksa veve ding dan hih tuak.

17. Mailamah lakhui thak bawlding nanei hiam?

Lakhum ka kipatzawh kum 25 cin Silver Jubilee muakna-in, ka khumsa laluite’ sung pan selected khui khat, Sunflower music production pan Tape, CD, VCD, DVD(Live Show,Karaoke) bawl ding geelna nei ing.

18. La le music hanga supna (siatna) le meetna (hoihna) koici bangin na mu hiam?

Kei ngaihsutna-ah, siamna i cih limlim pen supna hiloin meetna hi. La le music ah siatna a om hilo napi, a sia mitein zang leh … a zang mite a sia-in kimu pah hi. Cih nopna-ah, tangval akgugute leh kong laka zukham kilai laite pawlin guiter hong tawi masa, la hong sa masa uh ahih manin nu le pa tampite’ lungsim-ah la le music pen mi ginalo, mi thadah uisante’ uukna leh mi hoihlote’ vanzatin ngaihsun pah uh hi. A tateuh la le music hong uuk leh mi hoihlo asuak dingin ngaihsun pah uh ahih mamin awilo uh hi. Khaam uh hi.

Tua hi-a , hibang ngaihsutdan muhdan manlo anei, Zomite’ sungah tampi om lai mawk ihih manin ei tulai khangthak monotein la le music pen supna (siatna) hong tun’ satan vanzat hizen zenlo-a, meetna (hoihna) mun hongpuak Pasian thupha ahih zawklam pen i gamtatna leh i nuntakna mahmah tawh lakkhia ding hi hang. Na uukna-in nang hong uk ding hilo a nang’… na uukna na uk ding hizaw hi.

19. Mailamah la tungtawnin Zomi sungah khantohna om dingin na lamen hiam?

Lamen mah ing. Zomite’ sungah khantohna a om theihna dingin lungsim kikhata ma i pan khop theih ding kisama tua bang a lungsim kipumkhat theihna dingin pau le haamin thu tampi gen hi. Akibanglo pau le haam azang kam le muukte nangawn pen la dawng khat sungah kigawm khawm thei hi. Lai le pau puahphatna-ah zong la pen tanubul khat nahi dingin ka um hi. Thu tawh i gen sangin la-in salehang a ngai a zate’n valhnop sazaw a, a lungtang sung uah munla baih zaw hi. Mai lam hunah Kawlgam vaigam bek hilo, mivom mikang mieng gampan hong khangkhia ding Zovontawite’ kam le muk (leii) te zong La mahtawh i kepsak (control) kul ding hi.

I taang ngeina paunak le Zola kam te zong, La sung mahah keemcianga khangthak momnote’ zaktheih le lunglut theih dingin la le music aw ngaihte tawh i zulhsuah kul ding hi. Banghang hiam cihleh la aw ngaih leh music akilawm taktawh akisa Zola kammal pen minam dangte nangawnin hong saknop nitak ciangin Zomi min puanuam phalo a, Zopau nangawn athei nawn meelo, ahihna aman suahta Zomite pen La-in hong kaikhawm kik ding hi. Tua ahih manin La tungtawnin lungsim kipum khatna, mapan’ khawpna pan khantohna hong piang takpi ding hi cih pen lamen pha mahmah ing.

20. Mailamah nuntak nading bang sep sawm, Lamah phuakphuak, sasa lai ding maw? a dang ee?

Mailam nuntak nading, sepding bawlding tawh kisai-in, ka hihtheihna bangbang ah, ka hunneih laite khempeuh Topa’ min le gam adingin piakhin khahih man in, kei hong nei pa’n kul leh kitaangsam asak bangin hong piak talent meetsak nadingkeh ama minthan’ nadingin ka nuntak zawhkei zong amin daina dingin nungta nawn kei ning. A mangthang khate ka mat zawh kei le zong thu umsa mite’ kisuih khak nadingin gamta nawn kei ning. Agam zai nadingin kasep zawh kei le zong, a omsa pawlpite thapiain hanthawn ning. Bang ka bawla bang ka sem zongin ka hihna khempeuhah Pasiam minthan’na ding hita hen.

21. Kalay University a pilnasin Zomite’ tung ah hanthotna tawm hong gen ve.

Kei.., pilna siamna anei hetlo mikhat pen pilna siamna asin anei note tungah hanthotna gen dinga nong ngetuh ciangin mipil mi picing nahihna uh leh nasin uh pilna siamnate bek hiloin na sinloh uh ciimna citnate nangawn na neih lamuh kong muh manin thupi hong sa ing, zong hong zakta ing, kei zong angtang kisa mahmah ing.

Kong vaikhak nopah, pilna siamna asin na hih mah bangun hong “Hai” kei un la, hong siam un. No’ a dinga napil mah bangun i gam i lei a ding hong siam un. No’ adinga na ciim mah bang un i mi i sa’ tungah hong ciim taun cih hong vaikha nuam hi ing. Ka lungdam. Deihpi (Zomi Siamsin Magazine 2006)