Interview: Lian (Li Anh) ~ The Band “Illuxion Of Death” Sxf

Interview: Lian (Li Anh) ~ The Band “Illuxion Of Death” Sxf

Tutung Zomi Daily Celebrity Column ah suahsakding in aki selsim khinkhian lasak leh laphuahsiam ei Zomi khattawh dotna leh dawnna kong neithei uhhi. Tuaban ah Zomi te’n ih thapiakding khat hong kibehlap ahihna thuzong hong pulakkawm kahipah uhhi.

Tukum 2017 September kha in England khuapi London ah lasa ding, “leitung gambup ah a siamna lakkhiat theih nading” lampi omin akisam himahleh, gambeel mikhat ahihna tawh gamdang zintheihna laibu (Passport) ngah theilo ahih manin, ahamphatna ataanlawh khatzong hi a, Zomi te supna lianpikhat ahih banah ama ading ih ngaihsut sakciang in hong khasiat huai phialmawk hi.

Tutung Zomi Daily tawh hun hongpiathei ahih manin, amah kua hi a, atup angimna leh a lasak, laphuah tezong dotna tawm ihnei nuamhi.

ZD: Hi… Lian, Zomi Daily hun nongpiak manin lungdam eimaw.

Lian: Keizong lungdamsem ingei.

ZD: Na min hong koici sapding kaivua? Na behmin eleh?

Lian: Lian inzong hongsamthei, Lianpu zong kingah. Tulaitak India gamah la kasak ciangbel “Li Anh” ci’n hongsam uh, kabeh minpen Naulak hi.

ZD: Na innkuanpih te kua hi a, unau bangzah pha naivua? (Family Background)

Lian: Kapa Lian Khan Suan, kanu Sian Kim hi’n, pianpih unau 4 pha ung. Keipen a ulampan a 2 na hi ing.

ZD: Na pianna khua? Na sangkahna leh na teenna e leh?

Lian: Kasuahna munpen India gamsung Phai hi’n, tulaitak ka innkuan un Delhi ah om ung. Ka sangkahna cileng St. Paul Institute (Siapi Hau Khen Pau) sangleh Blue State Academy (Dr. Dal Lian) sangah kah ing.

ZD: Bangkum akipan lasak, laphuah kipan? Tuaciang banghang in hihdan in ukna nei nahitam? (cihnopna ah nanu, napa la uk, lasiam ahih keileh behleh phungsung ah la leh siamna kivakna cihdan)

Lian: Atung a kagensa mahbangin kapa pen Suanno hi’n, amahpen la uk leh laphuak khatmah hi. Tulai khangthak te’nbel theikholkei mai inci’n, kapa laphuah ei Zomi sungah aki theizawdeuh a ka upmawh pen “Denciang cise ken zekai niteh” acihla hi. Tuaciang kapa pen U Lengtong Pauno, U Lengtong Go Hau, U Lengtong Pau Thawng te lawm it khat hi. Ka neulai in kapa te lawmtateng ka innvuah lasin, lalem cihdan hidenpian in, tua tungtawn in la uk khat asuak hi’ng. La kasak asawt hang, ka laphuahbel 2015 khawng pan hi.

ZD: Na laphuah te bangla hi a, bang Style dan te ahia?
Lian: Mangla (Mikangla) hi’n, ka la khempeuh pen zawlla (Love Song) pavetlo, Gospel la lah hilo, a Style cilengbel Rock leh Thrash Metal lam hi.

ZD: Zola na phuah leh nasak aom limlimhia?

Lian: Zola kaphuah zong ommah, Pasian la (Gospel) la vive hi’n, biakinn sungah kasak cihloh khui khawngah kasak omnailo.

ZD: La naphuah, na gelh khempeuh dawng bangzah phata?

Lian: La dawng 19 kiim hi.

ZD: La naphuahciang nang ii lungsim sungpan hong piangkhia lamal ahia? Ahih keileh kiim leh paam pan a na ngah lamal te hizaw ahia?

Lian: A tamzaw pen kei lungsim sungpan ahong piangkhia lamala te hi’n, pawlkhatbel cileng kiim leh paam a thupiang te awlmawhna khatneileng tua ka awlmawhna dan gelhziau cihdan hi.

ZD: Tulaitak na Band min uhleh kuateng nahi uhhiam cihzong hong genve?

Lian: Ka Band min uhpen “Illuxion of Death” hi in, kei minvawh ahih banah, a Owner & Manager zong hipah ing. Vocal pen keimah, Lead Guitar pen Khupboih, Bass pen Alfred Zomi, Drummer pen Sangpi hi. Khatveivei bel alem bangbang, Band khatpeuhpeuh, Vaite, Nepali tetawh cihbang, Philippines sangnaupang Delhi ah sang hongkah te pawlkhattawh cihbang in la kasak hunzong om, ka Show tamzawbel Full Band sangin Solo maw, Duo in lazaw ing.

ZD: Kua in na Show ding hong vaihawmsak in, munbangzah ah Show bawl ngeikhin?

Lian: India gamsung muntuamtuam ah Show bel 20 veibang neikhin ung. Ka Show dinguh hong vaihawmsak cileng Event Company tuamtuam hi. Giglue, Gigstart, Starclinch, KS Event, Karyakrum, Skillboxes cihte hi’n, India Company tuamtuam hi uh. Adang munahzongbel Show neuneu neiden ing. Tuate pen Hotel, Bar, Cafe’ ah hi’n, tuadan lasaknading aomciang keibek hongsamzaw uh cihding hi.

ZD: Show nabawl uhciang haksatna tuahkhak cibang aomhia?

Lian: Haksakna lianbel tuakkha ngeilo, hong vaihawmsak tezong kician ahihman hikha ve. Ahihang kolampan lemtheilo in ka Cancel uh tamzawpian.

ZD: Show nabawl uhciang hong guaihna uh bangdan in hongpia ahia?

Lian: Hong guaihna uhbel India lasak te khatmah bangin hongpia uhin, atammah suakve.

ZD: No Band pen London ah hongkisam ngei cihkhat? Bangkum hi a, bangcidan in hongsam uh? No Band pen bangcidan in hong theikha uh ahia?

Lian: Ummm… hongsam mah uh, tukum 2017 September khasung hi. Ka Facebook Friend tepen atamzaw mikang vive ahih banah Musician, Producer, Promoter, Event Company pan cihdan vive uhhi. Tuate in hong Contact in Ka Facebook lawmte’n “na lasak te naza ungin, Asian Band Online Music Selection omding hi, tua ah na Submit sak nuam ung, alemdiam” cih hongdot uhteh kenzong lungdamlua in Sure, Yes nacipah ziau. Tua Selection abawlna pan ko Band kiteelna lakah apakha suakve.

ZD: Tua hongsam te bang Company pan hilimlim ahileh?

Lian: London Events, Tour, Concert, Parties kici Event Company khat hi. Website, Source leh akicianzaw atheinuam te’n ka Page pan unzong ki muthei inteh.

ZD: London ah naki heltheih lohna atomkimcing in nong gentheidia?

Lian: Passport leh Visa hang hi. India Identity Card neilo in, kibawl theilo hipah. Bawltheih nading lampi omsunpen Kawlgam paikul cihteng hi. Ka vekpi un Passport nei khatzong omlo. Selection ka ngahkhakding uh lamenlo kawmkal ah ka Photo uhpen Poster vuah hong suahkhiat ciangbel ahimah aive maw ci’n kalung uh dammahmah napi, paitheilo deuhse cihdan himai ei.

ZD: Tulaitak hih nasiamna tawh kisai bang buaipih laitak nahia?

Lian: Tulaitak bel lasa hongki sapciang sazel, tualo la mah gelh, phuak cihbangtawh hunbeipian.

ZD: Mailam ah bang tupna nanei a?

Lian: Ka laphuah khempeuh Video Album ahoih mahmah, Quality anei simkhat bawlnuamlua, ka hanciam mahmah laitak leh, tua hong Sponsor ding azongzong hi’ng.

ZD: Zomi leh Music nang muhdan?

Lian: Ei Zomi tepen Music tawh asuakkhia ngiatdan in mumai ing. Pasian inzong Zomi leh Music atonkhawm, kizui totoding ahongsiam hinteh ci’ng. Enpakleng tunai ih Idol te, i khangno te lasiam aki selsim tampi na ommawk hilomaw mate, tha apiading kisam cih kei muhna hi.

ZD: Zomi lasa, tumging siamte leh a thapiading Zomi mipi te kikal nang muhdan?

Lian: Atung a kagensa mahbangin ei Zomi lasa leh tumging siamtebel siamtheilua, tha piading te’n tha piazolo hizaw. A thapiading Zomi milip aneu, alian ii mawhpuak ahihlam ki mangngilh hiam? Tha kipia nuamlo ihhiam? cihpen kei leh kei kakidot ngei zelkhat hi. Tuaban ah i theihsa bangin ei Zomi tebel khatsiamna (Talent) khat neita leh siam ei, hoih hi cihsangpeuh gensiatlam ki hatzawpian theizel mawkin, tuapen khasiat huai banah hoihsa hetkeng.

ZD: A zenzen in leitung gambup Level aminthang khat hilecin, tua minthanna Title pen koicidan in kemcing in, nang leh nangzong koici kikepsawm nahia?

Lian: Hahaha… hih lianbel ki lamen ngamkeilua ingin, aihhang nongdot uh himawk ahihciang ka lungsim aom bangin hongdawng ningei. Leitung gambup Level in aminthang khat hi zezen lengzongpen Pasian tawh kinaina pen kibang veve ding hi, cihnopna ah ka Pasian mangngilh sawm limlim keng. Kikep cihciang tep leh muam, zu le sa lamsangah tunzong siangtho kik bilbel ing. Kei adingin zu le sa, khamtheih, guihtheih hihding kisam lolua mai. Tua leitung nopna tesang ka la gelh, ka la sak mite deihtheih honghihding buaipihzaw ing. Zudawnding cileng Show khatpeuh aom ciang a mawkna in ki ngah hi, ahihhang ke’n theitui nadawnzaw ing.

• Band Page: https://www.facebook.com/IlluxionOfDeathSxf
• Commercial Video: https://www.facebook.com/pg/IlluxionOfDeathSxf/videos
• Audio Original Music: https://www.musicwhim.com/band/theiod
• London hong kisapna: https://www.facebook.com/events/147643332487319
• Sweden pan Interview na: http://ghgumman.blogg.se/interview
• Online Radio pan hongna khahsak te: INDIE SCENE RADIO (Boston USA), Rock Rage Radio(Australia/USA/UK

ZD: Zomi khangthak lasiam, laphuak te ading na deihsak, thapiaknop?

Lian: La i gelh, i sak ciang veinakhat neih mahmahna tawh gelh in sading, hongki gensia dikdek theihi. Ahihhang phamawh sase kei in, na la gelh athu hongki kosak in, hong nuihsan pawl omkhading hi. Phamawh savet kei in, a thupi penpen cileng laphuak tungah ka gennop mahmah thu pen i Zola lamal te zong thupi mahmah hi, tuasang a thupi zaw kasak khatah i la aw (Melody) mahmah ahoih ding kisampen sa ingei guai.

ZD: Atawpna pen nagennop khatpeuhpeuh?

Lian: Ka Zomi pih te’n hong phawk khalo uh aitam maw kacih laitak, lamet lohpi in Zomi Daily in hihbang in nong thapiakna uhleh Interview nong neihtheih uhbel nakpitak ka lungdam hi. Mailam ahzong Zomi sungah Talent nei tampi ki om ahihna dungzui in, hihdan Interview te hong hanciam totolai un. Zomi Daily ah asem agim atawl khempeuh ih Topa Pasian in thupha hongpia kimtek tahen. by: Sawltak & alawmte #zomidaily