Innteek Hihna ~ Bob Tuangpi

Innteek Hihna ~ Bob Tuangpi

Minam citawmte’ satanh akicing ngah nading hanciamna (Ethnic Identity Political Movements) khempeuh leh gamvai thupomzia zui kidemna (Political Ideology Movement) vekpi ii mungtuppi ahih leh thukham leh thukhunpi nuai ah bitna ngah nading (Law and Constitutional Protection) vive hizaw hi.

Tua bang thukham leh thukhunpi nuai ah aangvanna/bitna ngah nading lampi zonna ah lampi sialdan tuamtuam akibanglo bek hi a, a mungtuppi uh ahih leh minam citam (Ethnic majority) ahi a, minam citawmte ahizongin (Ethnic minorities) thukham leh thukhunpi nuai ah bitna ngah nading ahihi.

Tua bang thukham leh thukhunpi nuai ah bitna (Law and Constitutional Protection) sung ah hamphatna leh liangko kikimna (Equality) ih cih ciangin gamvai ah minam lian leh minam neu hita leh hamphatna kikim ding cih ciangin gamvai ah liangko kikimna (Equality as political rights/ နိုင်ငံရေးအရတန်းတူညီမျှမှု) cihnopna hizaw diak hi.

Akibanglo nate avom pen kangsak ding, akang pen vomsak ding, asan pen kangsak ding, aneute agolte tawh kikimsak teitei ding cihna hizenzenlo-a, amau tawh kilawm kituak amau ciat in angah ding uh satanh ciat peelemlo kicingtak leh bulkiptak angah ciat nading uh (Equity/ သာတူညီမျှမှု) ahihi.

Minam lian/citamte ahizong, minam neu/citawmte ahizongin amau ciat in angah ding uh gamvai ah vaisaitheihna (Political Representation/ နိုင်ငံရေးအရကိုယ်စားပြုမှု) kimtak angah ding uh akilawm pen hi, cih sanzawhna a om masiah gamsung ah kilemna leh daihna omlo ding hi.

More: Pilvanghuai Thu ~ Bob Tuangpi

Tua hi a, gam khat ah kuakua kumpi akah zongin, minam kim ciat in amau’ nam leh gam/leitang tungah amau tawh kituak leh amau mailam ding amau mahmah in suaktatak vaihawmna leh inntek dinmun ah vaihawm theihna (Domestic Sovereign Power/ Self -determination) angah kim ciang bek un gamvai ah lungkimna leh kilemna om pan ding hi. Bob Tuangpi (002762021)