Innkuan Hoih Thupi ~ Hau Za Cin

Innkuan Hoih Thupi ~ Hau Za Cin

Pasian in Ama innkuan hidingin hong bawl hi. A ngimna bulpi in Jesu Khris hangin eite Ama mite ihih ding a sehkholhsa ahi hi. Tua pen Ama tupna leh lunggulh lianpen hi a, a lungdamna pen zong ahi hi. Efesa 1:5

Pasian pen itna Pasian ahih manin kizopna, kikholhna thupisak mahmah hi. Ama mizia limlim pen kizop, kipawl, kikholhkhop hi a, tua mah a thupibawl pen ahi hi. Tua manin Amah zong Pa, Tapa, leh Kha Siangho in kiciamteh hi. Pasian khat ah mi thum (trinity) zong Amah leh Amah a kizopna a kilatna ahi hi. Kilem dimdiam a kizopzia ding hong lahna ahih manin a thupina leh a manphatna i theihtelpih ding a thupi mahmah ahi hi.

Jesu Christ ah muanna upna i neih tak ciangin Pasian pen eite Pa ahi pah hi. Eite zong Ama tapa tanu te ihi pah hi. Thu-ummi khempeuh zong i sanggam u leh naute ahi pah uh hi. Biakinn leh Pawlpi pen i kha lam nuntakna dingin i innkuan ahi pah hi. Pasian innkuan sungah Amah a um mi khempeuh kihel ahih manin a paisa mite, tuhun leh mailam ah hong pai lai ding mite zong kihel ahi hi.

Na leitung innkuanpih zah mah in na khantawn innkuanpih ding zong thupi mahmah hi; banghang hiam cih leh ‘tawntung’ kimang ding ahih man hi. I leitung innkuanpihte pen Pasian hong piak thupha hi a, ahi zongin kiplo hi. Khang khat bek kikhom dinga, kha nuntakna lamah na innkuanpihte bel ‘tawntung’ kikhom ding hi. Leitung innkuan sungah nawngkaina tuamtuam – nupa kikhen, pata kitawng, omna kigamla, khua khat ah tengkhawmlo, khangcing in tek leh huai, a tawpna ah akipelh theilo ‘sihna’ i tuak lai ding hi. Ahi zongin kha lam ah na innkuanpihte pen ‘sihna’ khen lam ah zong innkuan khat na hisuak ding uh a, tawntung pan tawntung in Pasian innkuan sungah na kip ding uh hi.

Tuhun leitung kilumlet manlang mahmah sungah innkuan mah bulphuh a nuntakna pen a thupi pen hilai hi. Innkuan kip leh innkuan ki it, kituakte pen leitungah mi hampha leh Pasian thupha ngah mite ahi uh hi. Khang khat nungta ding ciatciat lak ah hampha diak uh a, enhuai mahmah uh hi. Nang zong tua bang innkuan na ut hiam? Na haksat ni in hong uap, tha hong pia innkuan hi a; na lungdam ni in na lungdamna a bucingsak na innkuanpihte mah hi. Khuasung pawlpi sung leh minam sung a nuamsak mahmah zong hihbang innkuan nuam omna mun ahi hi. Tua bang innkuan nuam omna sungah mailam nuntakna zong nuam toto ding cih kigalmuh khol thei hi.

Leitung kilumletna sungah innkuan paizia leh kivaipuakzia tawmtawm in kilamdang hiaihiai a, nasepna mun kilaih hang leh nasep hauh luat mana innkuana hun zang khawm man nawnlo kitam deuhdeuh hi. Tuate hangin kizopna leh kihona, kikholhna te kiam deuhdeuh a, ki itna leh kingaihna kiamsak semsem hi. Mel kimulo a tong kisang thei ihih zong kinaihna a dausak nam khat ahi hi. Telephone leh internet te in innkuan sung kizopzia nakpi in lamdangsak hi. Tua ahih manin innkuan pan a inntuan (zi leh pasal nei lah hinai samlo) kibehlap in, koppih neih hun nangawn kisuangsawnto a – a neilo kiuhkeuh zong kitam semsem hi. Innkuan tampipi inn khat sungah tengkhawm cihte hong tawm hiaihiai a, nupa kikhen kibehlap in angsung theihna leh ki-elna lungsim hong tam tektek hi. Angsung theihluatna hangin “kei bek” kikhualna hong tam semsem hi.

Tua bang innkuante panpih leh thapiak kisam mahmah a, tawsawn den zong a kul om thei hi. Christian innkuante mawhpuakna lian semsem tawh kibang hi. Biakinn ah i pai ciang tua banga haksatna nei innkuan i muh leh i panpih ding ahi hi. Thungetsak bek hilo in a haksatna uh dong in holimpih a, annekpih, niangtui dawnpih cih bangin kikholhna neihpih in i huh ding akilawm hi. Biakinn ah lungnopna leh lungdamna mite in a muh ding a manpha khat hi a, tua zong Christian te nuntakzia ding ahi hi.

Leitung huihnung tawh kituaka gamtat theih ding a kilawm leh a kituak ahih mah bangin Christian ngeina hoihte leh kikhualnate mangngilhlo a i kalsuan siam ding zong a thupi mahmah ahi hi. Tua in haksat ni in hong domsang dinga, dahni in hong hehnem ding hi. Ni, gang, pi, pu, sanggam, u leh nau cihte hunlui sangin kikhiam hiaihiai tawh kibang hi. Akisapna leh innkuan tanau meltheih hauh ding ka’n-a thupi innkuan vai ah a tam kei ding hi.

Ei bek ciat in i dingzo phial zong in “nekkhop lim” a kicih mah bangin i nop i dah hunte zangkhawm liailiai leng leitung i nuntak hunsung pen a nuam, a manpha hilel a, tua teng bek mah i lawhtak ding hipah hi. I sih khit ciang vantunggam pen tua bang khempeuh a kisap nawnlohna gam ahih manin! Tua manin tha kipia in kitawsawn in kihuhtuah, kikhawl liailiai ni. Tuate khempeuh sungah ki itna, kingaihna, kideihsakna, kihuhtuahna te a bucingin om hi.

Pate Ni hong naih ciangin innkuan sungah Nu leh Pa bek a thupi hilo in innkuan mibup a thupi a hihna leh innkuan khat leh khat i kizop diudeu a thupina i gen kikkik nuam hi. Hau Za Cin (Phuitong Liim)