Malaysia, Kota Damansara inndawl 17 panin naupangno kum 3 khat kiasuk in si

Malaysia, Kota Damansara inndawl 17 panin naupangno kum 3 khat kiasuk in si

Malaysia, Kota Damansara vengsung aom innsang mahmahkhat ii inndawl 17 panin naupangno kum 3 khat kiasuk a, sisuakpah cih NST pan kiza hi. Tuni Thursday zingsanglam in thupiang hi a, tua naupangno akiatsukna Flat pen gamdangmite saapdingin akiphallo, Malaysian gammi mizawng te omnading in akivaihawmsak PPR akici “Projek Perumahan Rakyat” Flat innte ahihi.

Athu akikanna ah tua naupang pen numeino khat hi a, Plastic Chair tutna khattawh innmailam aom Balcony ah kahto in, tuapanin innnuai ah akiasuk hiding kici hi.

Tuahsiatna apianhun pen zingsang 7:10am hunpawl kici a, tualaitak in tua naupangno pen amahguak innsung ah aom ahihi. Anu leh apa tepen zingsangin Nasi Lamek zuakdingin 6am hunpawl in akuankhiakhin uh ahihi.

A sanggam numei kum 14 aphakhin khatzong zingsang 7am hunpawl in anaute innvengnai aom Kindergarten naupangsang ah sangkahding in akhapak in apai ahihi. Tuabangin apaikhait laitak in atuahsia numeino pen a ihmutsan laitak ahihi.

Hihvai tawh kisai in thunei ahi District police chief Assistant Commissioner Mohd Zani Che Din in agenna ah kum 14 aphakhin asanggamnu in anaute sangkhading in apaiding ciangin aneuzaw atuahsia pen ihmulai ahih manin, phongngamlo in innsung ah amahguak anutsiat cihi. Tuaban ah acidamlo, acisa ahih manin, a ihmut ciangin aphong ngamlo cihi.

Sanginn panin anaute sangkha aciahkik ciangin innveng te’n tuahsiatna apianlam genpah uhhi.

Naupang akiatsukna Balcony ah Plastic Chair khat kimu in, Balcony zong atunglam ki umlo ahih manin, tuapanin akiasuk hiding kici hi.

Naupangno pen athawh ciangin kuamah mulo ahih manin, Plastic Chair tungah kahto in innmai Balcony ah adakkhiatsawm laitak in akiasuk hiding kici hi.

Naupangno ii aluanghawm pen Sungai Buloh Hospital Forensic Unit ah kipuak in, tualai ah Postmortem kibawlding cihi. PPR Safety Supervisor khatin agenkhiatna ah zingsanglam in ama omna tawh akinai Block khatpan agin ngaihmahmah kaza hi. Tuaciangin naupangno khat inntungpan kiasuk cih hongkigen ciangin amanlang in kadelhpah hi. Tua vengsung aom pawlkhatte’n agenna ah innpualam Balcony ah puan akipho omin tuate aletsawmna panin akiasuk hiding acizong om uhhi ci’n genkhia hi.

More: Singapore ah innteeng nasemin aom Lhai Nei Kim inntungpan kia in si

Naupangno tawh akithuah te’n hih thuthang tungtawn in lungngaihhuai hi. Naupangno khatguak innsung ah a ihmu ahiphial zongin nutsiatkhakloh limlimding thupi dinghi. Sawltak #zomidaily