Innbuk mual Falam in lanuam ~ Dr. Dongno

Innbuk mual Falam in lanuam ~ Dr. Dongno

Kua mapeuh… Na NGAI VOU! Khatvei kiphawngkik leuleu niei! FALAMTE’N, LENNUPA KIHEL, INNBUK MUAL DUNG TAAM SINGPONA KHEMPEUH LAAK SAWM

Zomipi-in ong muan, ZCD Party Upate, . GZA Makai Upate, . Leitungbup Zomi Innkuan Makaite, . ZYA Kipawlna Upate, . Tedim CSO-Makaite, . Tedim Nu leh Pate, . Biakna lam Makaite, . A vei mimal khat ciat, . Muan leh Suante aw,

July 7, 2018 ni-in Falam te-in “Falam gam sung aa om Buannel (LenNupa)” mun pen Falam gam Forest dingin bawl ding thu kikupna nei uh hi. “ Buannel acih uh, LenNupa leh akiim aa 12,000 acre azai gammaang tulak pen, Tedim gam ahi hi” ci-in, khotakin tangthu tuanthu leh lai thupite tawh akileisa Tedim gam ahihna thu akizak sak kik tak ciangin, amau ong dawn kikna uah:

a) “Ko Falam gam lam aa a om singpona pawl khat teng bek agen ka hi uh hi” ci uh hi. Hih pen kikhemna ahi hi. Reserved Forest , Community Forest akibawl ciangin, gammaang tulak ii khen khat bek kibawl cih om ngei lo hi. Avekpi-in kibawl hi.

b) Tun Inn Buk Mual aa singpona pen acre 12,000 (18.75 sq. miles) ci leuleu uh hi. Hih acre 12,000 pen singpi pona avekpi mah ahi hi.

Tua ahih ciangin amaan lo thu tawh khem ong sawm uh hi. Falam lam teng bek ah singpona taampi tua cia om lo hi.

Tu-in, tua zawh kha sawm khit ciangin, tunglam pan sawlna tawh Tedim Forest Dept. zum panin 2.5.2019 ni -in ‘Falam gam Inn Buk Mual ‘Cu Pyin’ kepcing nading’ ci-in, Inn Buk Mual taamsing pona acre 12,000 ( 18.75 sq miles) Falam gam aa ciapteh nading Tedim Subdivision zum ah ngaihsutna kidong ta hi.

Tedim AD zum ah 14.5.2019 ni-in kikupna kinei aa, “tua kiim aa om khua, Kapteel, Heilei, Suangzang, Tuitawh khuamite ngaihsutna hausate kiangpan ngah khit ciangin atung lam thu zasak kik ding” ci-in khentatna kinei hi. Tua zawh ni sawm val, tuni 26.5.2019 ni dong ngaihsutna AD pa tung kipuak nai lo hi. Hausa pawlkhatin lai zong ngah nai lo lai uh hi.

Tua khuate ngaihsut nading pen siangtakin, theihsa ahi hi. Tedim gam sung aa om mun hoih LenNupa kihel, Inn Buk Mual aa singpi pona gammaang acre 12,000 pen Falam gam ah kiciapteh ding kuamahin deih lo ding hi hang. Zogam’ neihsa ahi hi. Taanglai pekin Zogam, Tedim gam sung aa om ahi hi.

Hih bangin, lampi atuamtuam zangin suh ong sawm uh hi. Buanneel (LenNupa) ci le uh i phal loh ding thei uh aa, tu-in Inn Buk Mual” adang khat in amin laih uh hi. Ahih hangin, tua mun aa gammaang singpona pen LenNupa omna mun mah ahi hi. Kibang hi.

Hih pen gamkeek gamtat zia ahi hi. Power nei thahatte-in a thaneemte hibangin ong zawhthawh bawl uh ahi hi. Tu democracy hun tawh kituak lo hi.

Atuung lai-in (July, 2018 sawngin) khauhtakin, mimalin lai tawh ahi zongin, GZA leh Tedim CSO-kipawlnate-in, kyi-nya chiat ahi zongin, Yangon Kapteel kipawlna-in kankwet-na ahi zongin, aki piak hangin, tuate bangmah thusim lo-in tu-in hih bangin ong hih toto veve uh hi. Power neihna tawh ong kizothawh lua hi.

Tua ahih ciangin, atung aa Zomi kipawlnate-in, Zomi adding sep ding hun hi ta hi. I Zogam, tong khat hi lo, laam khat zong hi lo, acre 12,000 (18.75 Sq miles) takpi ong ki sut ding ahi hi. “Zogam adding” a ci vive kipawlnate-in hibang hun ciangin tha saan lo-in i om ding hiam? Tu hunin pau kei leng cikciangin pau ding ihi hiam? Bang ngak lai ihi hiam? Mi zawhthawh athuak ding Zomi ihi hiam?

Atung aa kong koh Kawlgam aa om muan leh suan kipawlnate aw “Zogam adding” i cihcih, tu-in Zogamin ong ngak hi. Muan ding dang nei nawn lo hi.

Gampua aa om, Leitung bup Zomi Innkuan Kipawlna, US, in zong om mawk sam dingin ong ki um lo hi? I Zogam dinmun ong en un. I Zogam it takpi ni. I Zogam tua cia-pi i khahsuah nuam ding hiam? Na aw uh mipi-in ong za nuam ta uh hi. Dr. Dong No (May 26, 2019)