Inn ah om in (Stay Home) ~ Jam Daniel

Inn ah om in (Stay Home) ~ Jam Daniel

Luka 15:11-24 I neulai in I nulepa te kiangpan I zak nop kholloh thu khat om a tua in, inn ah om in. vak khia kei in cih ahihi. Naupan lai, khangno lai hun ahih mah bangin inn sangin a pualam ah lawmte tawh kimawlna le kithuahnate nuam kisa zaw ahih man ahihi. Tua bang hun pen nuam I sak hun zong hi a, thalengal ah zong I kimuan mahmah hun zong ahihi. A taktak in bel I khuamuhna tom mahmah lai hun ahihi.

Sang bang I kah sungin I nulepate in sangtuah phet in inn hong ciah suak in. Koi mah ah vaklo ding, kimawl theilo ding, nong ciah pah kei le hong sat ding hong ci thei uhi. Ahizongin theipipi mah in sat ding lau phial talen’g sangtuah ciangin lawmlegualte tawh kimawl in tun hun dingin inn I tunloh hun tam mahmah hi.

Nulepate in banghangin inn ah om ding hong ci den uh hiam cihleh, Khatna ah, apualam ah lungmuamna taktak omlo ahihna thei uhi. Nihna ah, apualam cih pen migilo damiahte gamtatna mun ahihlam thei uhi.

Tuahangin, kitot kiselna khatpeuh gamlumna omleh inn sungah lut un hong ci uhi. Nulepaten inn sung pen kibukna mun (place of refuge), lungmuanna mun (place of comfort) le patauh omlohna mun (place of safety) in na zang uhi.

Inn cih pen bangzah in thupi hiam cihleh sepkhiatna a hoih a pha khempeuh inn sung vive pan a hong kipan ahihi. Inn sung pan vaikihawm a, inn sung pan geelna kinei hi. Kimlepam a I muh theih inn hoih pipite, mawtawh vanleng cihte hong piankhiat na dingin inn sung vive pan a hong kipan ahihi. Na hoih le amanpha taktak muh theih sepkhiatnate gam palak pan vaihawmna hipeuhmah lo hi. Inn sung vive pan hong kipankhia ahihi.

Tua ahih manin ngimna kician sepkhiatna kician anei peuhmah in inn nei hamtang uhi. I Lai Siangtho telna sungah, khangno tangval khat thu ahihi. A zawn man a pusuak nuam hilo hi. A huaiham man a pusuak nuam zong hilo hi. A omna inn sung- a pa’ inn cimtak himawk hi. A pa’ inn cihpen thukhun tawh kalsuanna inn sung zong hikha ding hi. Luphun, thawhhun, anneekhun, kikhophun cihte tawh nisim vaihawmna inn sung khat zong hikha ding ahih manin tua teng nuamsa lo in cimtak hikha thei hi.

Ni khat a pa kiang ah a ngah ding gamh hong ngen khia hi. Ngen ahih manin a pa’n piapah hi. Ama ngah ding a kilawmteng a ngah khitteh khualgamlapi ah vazin aa, a neihsa teng a ut bangin vazang hi. Sum a neih laisiah ama ut bang lian in nungta zo hi. Lawmlegual zong a deih zahzah ngah hi. Ama thu a nungta ahih mah bangin thunget kikhop cihte ngaihsut in nei kha nawn peuhmah lo hi.

Sum nei lai in cidam lel ahih manin biakinn pai ding cihte zong ngaihsut khak in nei nawnlo hi. Khangno khat sum hau ahih mah bangin adeih van khempeuh zong nei ding hi. A khialhnapi khat in, “a pa’ inn a nusiat” ahihi. Tualo khempeuh ok mahmah phot lel ding hi.

Ahizongin a sawtloin a neih khempeuh beisianga kialpi hongtun teh cimawh dongtuak in om hi. Ut bangbang a omna pen, utloh dan haksatna khatpeuh tuahkhak theih na ding hun zong hikha thei hi.

I phawk ding a thupi khat in, tangvaalpa pen a pa’ inn sungah a omlaisiah bangmah lungkhamna tuakse lo hi. A pa neih khempeuh ama a’mah ahih manin lungkham na ding omlo hi.

Tuni in hih tangthu bulphuh in mihingte in I kisap inn thum gen ding hanga, tua inn sung nam thumte nuam a salote a dingin khialhna lianpi hidinga, tua inn thum teng ah om in nuam a sa mite a dingin khantohna lampi a tawn ahihna thu ahihi.

INN MASA SANG INN (SCHOOL HOUSE)

Khatna ah inn masa pen in sang inn a hihi. Satan in khangnote thahatna mah zang nuam ahih manin sang inn ah pilna zong a mipil tampi a pian ding hong haza hi. Satan in zong pilna neite khemhak zaw ahihna tel mahmah hi. Tuamanin khangnote in pilna thupi sase lo a sang tawp pahpah ding cih pen ama ngimna bulpi ahihi. Leitung a migilo ngongtat tampite zong pilna nei a om sam hangin pilna neilo a tamzawthamte molhtum a kizang ahihi. Tua thu hangin Hosea 4:6 “My people are destroyed from lack of knowledge…” (Ka mite in pilna neilo uh ahih manin kisia hi) cih ahihi.

Tua ahih manin khangno mipil tampi kisam hihang.

• I minam in siavuan tampi kisam hihang.
• I minam in sitni tampi kisam hihang.
• I minam in sangsia tampi kisam hihang.
• I minam in thukan siam tampi kisam hihang.

Pasian’ nasep na dingin pilna-buaih thupi kei cikha kei in. Buaih lo tawh zong kisem thei cikha kei in. Pilna buaih ii manphatna niamkhoih kha kei in. Pasian’ gam nasep na dingin zong Pasian in pilna neite mah muibun le tangzai zaw in zang zaw veve hi. Pasian in zong a ma nasem ding pilna neilote bek deih hilo a, pilna nei zong a deih Pasian ahihi.

Mi a tamzaw phial ding I sang tawpna ahang taktak pen sum neihloh sangin lai zolo tamzaw kha ding hi. Inn lai hong kipia bawl nuamlo. Hong kipiak beh, hong kipiakbeh semsem teh vaisah luata ahih manin atawpna ah zozo nawnloin sang tawpna tawh kizom hi. Nasep khat pepeuh nai khat sung a zawh ding, nikhat sung a zawh ding cih dan om den hi. Tua bang hunte ah hun maan a zawh pahpah na in maban a ding tha thak hong guan ahihi.

Tua ahih manin, tu a na nasep, tu a na omna mun SANG INN a om-sangkah bangin na kisin theih le pilna ngah in na nasepna pan sum bek ngahloin pilna zong na ngah ding hi.

ANIHNA BIAK INN (CHURCH HOUSE)

Nulepate biakinn pai tangtang napi in tate a tunzolo tampi mah om hi. Nulepate biakinn a pai sungun tate amau ut bangin inn ah nusia in amau thu in I koih hi. Na tate in hong gol khit uhteh, ‘Ka nulepa in bangbang dinmun ahizongin biakinn pai ding pen anaa (composary) in hong paisak uhi’ ci a tecii hong pan theih ding uh pen thupi mahmah hi. Tunin nulepa tampitak tate hangin lungkhamna tuak zong om ding hihang.

Na tate na thuzawh lai in Sunday School na kahsak loh man ahihi. Na it luat manin ki-ukna sungah na koih ngamloh man ahihi. Lai Siangtho sinna cihte tawh na makaih khakloh man ahihi. Pasian thupitna le zahtakna thute na gen ngeiloh man ahihi. Tua ahihleh bang dinga tate hangin lungkham a om ding? A neulai un makaih na ding munte ah makaih ding ahihi.

Tua ahihmanin, kikhop hunte ah paulap zongin biakinn pai ding nuak kei in. Kihop hunte ah vai dang geel kei in. Biak inn sangin nangma vai thupi zaw a na koih khakleh na tun noploh na ding mun hong tun thei hi. Nang’ vai thupi sazaw maw Pasian vai?

Biakinn pai ding khatvei na pelh le nihvei na pelh nuam ding hi. Nihvei na pelh khit takteh biakinn zuat ding namai zum sim ta ding hi. Joshua in, kei le ka innkuanpihte in Topa na’ ka sem ding uh hi na ci hi. Biak Inn nuam a sa dente mah khangto zaw veve hi.

ATHUMNA NULEPA’ INN (OUR PARENTS HOUSE)

I nulepa’ inn sungah om ding hihang. Hih thu I gen ciangin innkuan a inn khat sungah I pumpi mahmah a om temtam ding cihna hilo hi. Tate in nulepa tawh kal kizopna (relationship) a gen nuam ihihi. Na inn pan in khasiatna khatpeuh tawh gamlapi a om na hizongin, launa khatpeuh tawh galtai na hizongin na omna mun mun pan na nulepa pen na nulepa mah ahihi.

I Lai Siangtho simna sungah nau zawpa in a PA’ INN nusia in khualgamlapi ah zinkhia hi. Satan in na pa’ inn sung ah hong khemzolo hi. Hong khem ngamlo hi. Tua hangin inn sung pan na pusuah khiat theih na dingin hong zol thapai hi. Na inn sung nopsakna pan in hong samkhia nuam hi. Na hihna hong zangkhialsak nuam hi. Na manphatna hong zang nuam hi. Na zahtak banna hong zang nuam hi. Kialpi hong nawk theih na dingin na neih khempeuh hong zangmangsak nuam hi.

Na nulepa’ inn sungah na omlai siah kialpi’n hong nawk zolo ding hi. Ahizongin Satan khemna ah puk in na INN na nusiatleh na neih khempeuh na bei lawh ding hi. Na neih khempeuh na zat le kialpi in hong zo ding ahihi.

Tuni in nulepate, khangno tampite kialpi in hong nawk ahihi. Kialpi I cih ciangin kisapna thu a gen ihihi. Nulepate itna I kisam hi. Kimlepam lungmuanna i kisam hi. Ngimletupna i kisam hi. Banghang hiam cihleh INN nusia, INN taisan I hihna hang ahihi.

Ahizongin tunin inn nusia a gamlapi a om na hihleh thu hoih khat omlai hi. Pa in a tapa ciah ding sunlezan in ngak hi. Na dinmun ki en inla, tuin tho in pa kiang ciah ning na cih nop le nangma khensatna ahihi.

I Lai Siangtho in, “A tawpna ah thu ngaihsun thei a,…Kei kithawi in ka pa kiang ah ka ciah ding” ci hi…” A pa in na galmuh a, hehpihhuai sa mahmah ahih manin va delh in, ngawngkawi in a nam hi”. (Luka 15:17, 20) A pualam sangin INN SUNG (Stay Home) mah nuam a sa ciat dingin Topa’n thupha hong pia hen! Jam Daniel