Update: Indonesia gamsung ah zinling hangin misi 321 phakhinta

Update: Indonesia gamsung ah zinling hangin misi 321 phakhinta

Indonesia gamsung ah beisa kalsung in zinling huaisia mahmah a, zinlinna hangin misi bekbek akigawm in 321 bang phakhinta cih Reuters pan kiza hi. Indonesia, Lombok Island kici tuikulh tungah Magnitude 6.9 thahatna tawh nasiatak in zinling ahih manin mitampitak in asihlawh hi ci’n tuni Friday ni in kumpi thunei Officials te’n genkhia uhhi.

Hihvai tawh kisai in thuvaihawm ahi National Disaster Mitigation Agency te’n agenkhiatna ah misi bekbek pen 321 phakhinta a, tuaban ah mipi akigawm in 270,000 valbang aomna, ateenna inntek panin ki hemkhiasak khinhi ci’n genkhia uhhi.

Adiakdiak in Northern Lombok kuamsung aom innte pen hoihtak in kilamlo, kiplo hi. Zin alin ciangin innkhempeuh lakpan 75% bangpen kipzolo, zinling nangzolo in kicim hi ci’n Agency te’n Statement ah genkhia uhhi.

Mobile Kitchens kici te’n zinling hangin atuahsia, acimawh te akisap phadiak uh ahi dawnding tuisiang leh nekding an cihte ahawm apuak in vakkawikawi uhhi. Thukizakna hamsa, kikawmna haksa cihbang tuamtuam hangin cimawh dongtuakte ahunlap in ki phazolo cisawnsawn hi.

Indonesia President Joko Widodo zong hih zinling tuahsiatna apianna Lombok ah a ending, avanding in akuankhiatsawm himahleh patuahhuailai ahih manin maikal sungah ka paipanding hi ci’n tuni Friday ni in genkhia cihi.

Hih tuahsiatna Emergency Period teng avensiang, abeisiang ciangin khuasung innsia te, Public Facilities te akisam khempeuh kumpi vaihawmna tawh ki lamthaksak kikding hi ci’n kumpi thunei te’n genkhia uhhi. Sawltak #zomidaily

Video: The national disaster mitigation agency said it had verified 321 deaths and that more than 270,000 people had been forced to flee their homes because of a series of tremors over the past two weeks. A supermarket in Lombok collapsed on Thursday (Aug 9) after a magnitude-6.2 aftershock rattled the area. The aftershock came days after a powerful earthquake rocked the island.

Indonesia, Lombok ah zin lingkik leuleu, mi 91 sikhin in 209 liam

Indonesia gamsung aom Resort Island minthangkhat ahi Lombok ah magnitude 6.9 hatna tawh zin linggawp in, mi 91 takin sihlawhkhin cih Reuters pan kiza hi. Nungdiak nungkalsung inzong hih Lombok Island sungah zin khatvei aling ngeikhinsa hi a, hihpen kalkhat huamsung ah nihvei alinna ahihi.

National Disaster Mitigation Agency (BNPB) te genkhiatna ah zinling pen huaisia mahmah ahih manin, misi sazian pen kibehlap totothei khading hi ci’n genkhia sawnsawn uhhi.

Zinlinna hangin inn akicim tultampi pha in, adiakdiak in leilu (North) lamsang ah Epicenter tawh akinaidiak munte pen limsiat phadiak kici hi.

Zin alin ciangin Lombok Area pawlkhat ah Electric Power te kisia in, khatlekhat ki thuzakna Communication tezong kitat sawnsawn hi. Indonesia galkap te’n tua Lombok Island ah zatui “Medical Aid” honkhat leh nektheih honkhat apuakding ki paikhiasak khinta cihi.

Indonesian Red Cross te’nzong zin alinlian laitak in nupi naupaai khat nausuakding in ki panpihthei hi ci’n Twitter tungah gelhkhia uhhi. Tua naungek pen pasal hi a, aminding in “Gempa” kiphuak hi. Gempa cih Indonesia min ii akhiatna pen zinling “Earthquake” acihnopna ahihi.

Abeisa kalsung July 29 ni in hih Lombok Island sungmah ah Magnitude 6.4 thahatna tawh khatvei zin alingkhinsa hi a, tuahun in mi 17 takin sihlawhkhin in, aliam bekbekzong zavalbang pha kici hi.

Zanni Sunday nitaklam in khatvei alingkik leuleu hi a, tua anihveina zinling pen khauhmahmah, thahat mahmah hi ci’n Indonesian Agency for Meteorology, Climatology and Geophysics (BMKG) te’n genkhia uhhi.

U.S. Geological Survey te genkhiatna ah tua anihveina zinling pen Magnitude 7.0 tawh kipanin tuakhit ciangin 6.9 ah kiamsuk cihi. Zinling pen khauhlua mahmah ahih manin, Tsunami Warning zong ki tangko khiaman cih kiza hi.

Asi bekbek pen mi 91 phakhin in, tua asite lakah gamdangmi kuamah kihelkhalo uhhi. Aliam bekbekzong mi 209 bang phahi ci’n BNPB Spokesman Sutopo Purwo Nugroho in News Conference ah genkhia hi.

More: Asian Tsunami pianzawh kum 12 cingkhin himahleh misi luang 400 anei kitheinailo

Indonesia gampen Pacific “Ring of Fire” kici meimual puakkhamte akizopna tungah omkha citciat ahih manin zinling in nawkkha pahpah hi. 2004 kumsung Indian Ocean Tsunami hunlai in gamtuamtuam akigawm gam 13 panin mi 226,000 bangin sihlawh uhhi. Tualak ah Indonesia gampanin asi bekbekzong mi 120,000 valbang pha kiciliang hi. Sawltak #zomidaily