Indonesia aom Myanmar Embassy leh President tanu mopawi ah buaina abawlsawmpa kiman

Indonesia aom Myanmar Embassy leh President tanu mopawi ah buaina abawlsawmpa kiman

Indonesia gamsung aom Myanmar Embassy sungah akapsawm, asukbuaisawm migilo khat kiman cih SCMP pan kiza hi. Indonesian Counterterrorism Police te’n amankhiat uh hi a, hihpa pen Myanmar Embassy sungbek thamlo, Indonesia President ii tanu mopawi ahzong abuai saksawm hi ci’n Police Spokesman khatin Wednesday ni n genkhia hi.

Jakarta Police spokesman Raden Argo Yuwono in apulak khiatna ah tua migilo a ngongtatsawmpa minpen Rizky Anggara Putra ci a, kum 25 aphakhin khat ahihi.

Indonesia gam ii khuapi Jakarta City panin agamlalo Bekasi Town sungah akiman ci a, ama innsaapna innsung panin Police te’n buluh in amatkhiat uh ahihi.

Hih migilopa pen tua a innsaapna ah kum 44 aphakhin anutawh asaapzawh sawtnailo ci a, IS migilo te apanpih tha apiamahmah khat cihi.

Hihpa in Jakarta khuapisung aom Myanmar Embassy sungah ngongtatsawm “Attack” bawlsawm cihi. Tuabek thamlo, Indonesia gam ii President Widodo ii tanu mopawi “Wedding Ceremory” hunsung ahzong buaina apiangsakding in akigingsa cihi.

President tanu ii mopawi pen Central Java Province sung aom Solo Town sungah Wednesday ni in akibawl ahihi. Tua Wedding Ceremony sungah mopawisim bekbek mi 8000 bang pha ci a, Foreign Ambasadors tampizong kihel uh cih kiza hi.

More: Indonesia gamsung aom ‘Myanmar Embassy’ sungah meikuang kilot

Indonesia gampen ihtheihsa mahbangin leitung ah Muslim biaknazui atampenpenna gamkhat ahihi. Tuamah bangin gitloh ngongtatna zong kiza zelzel a, nungdiak inzong Myanmar Embassy sung mahah meikuang Petrol Bomb kilot ngei hi. Rakhine State sung aom Rohingya te buaina akipatzawhzong Myanmar Embassy mai ah agammi te’n abiakna kibatpih te uh panpihna in lungphona tamveipi ki neikhin hi. Sawltak #zomidaily