Indonesia ah meimual khat puakkham dekdek ci’n ki patau mahmah

Indonesia ah meimual khat puakkham dekdek ci’n ki patau mahmah

Indonesia, Bali tuikulhtung aom meimual pen puakkhamding kithawikik leuleu cih AFP pan kiza hi. Hih meimual pen gamdangmi khualzin alimpai mahmahna, Indonesia gam ii “Tourist Destination” minthang mahmah khat ahi Bali Island kici tuikulhtung ah aom ahihi.

Tuni Tuesday (Nov 21) ni in Mount Agung Volcano kici tua meimualdawn panin vutsa leh meikhu pawlkhat ki phitkhiathak leuleu hi. Hih Mount Agung meimual ii asanpenna munpen Pi 2300 (700 Meter) hi a, tuadan ah meikhu viauviau pen tuni in aki galmuhkik ahihi.

Hih Mount Agung meimual pen abeisa tuma kum 50 val hunlai puakkham ngeikhin a, tuazawh adaicip himahleh tunaiteng apuakkhamding in kithawikik zelzel ahih manin khuasung mipi tezong lunghimawh in patau mahmah uhhi.

Nungkhasung inzong hih Volcano puakkham dekdek kici in, tuakiimnai aom khuasung mipi te leh khuazinmi akigawm in mi 140,000 valbang thunei te’n ki hemkhiasak uhhi.

Anunung penpen hih Mount Agung Volcano apuakkhap pen 1963 kumpek ahihi. Tuahunlai in meimual puakkham pen huaisia mahmah a, mi 1600 takin sihlawh uh cimawk hi.

Bali’s Disaster Mitigation Agency te ii genkhiatna ah hih meimual lunghimawhna tawh kisai in Alert Level pen ki khanto nailo hi ci’n Made Indra te tungtawn in agenkhiat uh kiza hi. Apuakkham taktakding hileh meimualdawn panin kiphitkhia zuahzuahding a, ahi zongin tulaitak Mount Agung Volcano ii dinmun pen meikhu ciangbek hiphot hi ci’n genkhia uhhi.

Ahi zongin meimual lamtawh kisai in pilna anei Local Volcanologist Gede Suantika in agenna ah hihpen lauhuai ahih manin, meimualdawn panin Kilometer 6 ki gamlatna kuamsung aomteng in aki hepkhiatding ahihi ci’n genkhia hi.

Hih meimual patauhna pen tukum August khapek panin akipan litlit ahihi. Hih Bali Island pen leitung ah khualzinna, Vacation tawlngak nadingin aminthang mahmahkhat hi a, ahi zongin hih meimual patauhna aomkhitzawh akipan khualzinmi zong tawmtuampah hi.

Indonesia Officials te genkhiatna ah abeisa tawlkhatsung akipan hih meimual patauhna hangin khualzinmi kiamgawp in, Tourism panin sumlutding US$110 Million bang kikhiamtuam hi ci’n genkhia uhhi.

Indonesia gampen “Ring of Fire” kici meimual puakkhamte akizopna tungah omkha citciat ahih manin, Indonesia gamsung bekbek ahzong Volcano akigawm in 130 bang om cimawk hi.

2010 kuminzong Indonesia gamsung aom Mount Merapi kici meimual Volcano khat puakkham a, mi 300 val in sihlawh hi. Tuaban ah tua meimual puakkhapna hangin ageinai aom mi 280,000 valbang ki hemkhia uhhi. Hih Mount Merapi meimual pen leitung ah ahuaisia penpen, alauhuai penpen Volcano khatin aki ciamteh ahihi.

More: “Mount Etna Volcano” meimual puakkham in ageinai aom mi 10 liam

Indonesia gamsung mah ahi Sumatra Island tung aom Mount Sinabung kici meimual zong abeisa 2013 kum akipan apuak khamkikding in kithawi “Active” kik kici a, tulaitak “Highest Alert Level” in akikoih, aki ciamteh leh aki encik khat ahihi.

Myanmar, Bagan khuageinai aom Mount Popa akici meimual zong nungsungteng apuakkham theiding dinmun in omkik kici a, ki patau mahmah cih kiza hi. Meimual pen asi leh ahing cihbangdan in kikhen, kiciamteh a, ahi zongin meimual apuakkhamngei limlim pen lauhuaiden veveleh kilawm hi. Sawltak #zomidaily