Individualism i pom pak diam? ~ Hau Za Cin

Individualism i pom pak diam? ~ Hau Za Cin

Zomi te pen nop ni dah ni in a ki uap te hi hang (tu ciangciang ah). Ahi zongin mun pawlkhat ah a mi let leh neu in a uap tam in tawm hiaihiai tawh kibang hi. Ki pahtawina leh kidahpihna zong a mi let leh neu ah kinga pianpian ta tawh kibang hi. Social Stratification namkhat in Zomi sung zong hong nawk, kua hong khuat panpan ta, bu hong sep panpanta cihna hi a, gakna khat a om kei leh hong inteek mahmah ding cih kimu khol thei hi. Nungak leh tangval kikholhdan pan, tate kikholhpih ding nu leh pa in a teelsak dan uh pan, zin leh lengla do dan pan, hawhnopna deuh leh pelhnop deuh inn pawlkhat i neihna panin khuabupa nasepkhawm cihte kiam hiai hiai in, eima inkuan bek kikhual hi pianpianta hi.

Leitung khantoh hang i ci khin thei diam? Nuntak hamsat man i ci khin thei diam? Mihing lungsim paidan peuhpeuh hizaw i ci diam? A sum neizaw leh khangto masa gamte in tua bang na manawh ciat ahih ciangin mihing ultimate idea ahi (a ngaihsut tawp) ici suk mai diam???

Khanglui hun ah meigong khat a ki dopkang teitei lai in tulai ciang ama tan ding hamphatna natawm a chethei khat in luaksak khin ngam hi. A kisam khat panpih sangin milian khat ki maiet zaw tek ta tawh kibang hi. Sum hau leh power nei officer te ki biangbiak in ki hoih ho a, meigong leh daipam te amau leh amau ki en dingin ki nusia hiai hiai ta tawh kibang hi. A inkuanpih te mahmah in zong kep ding sangin kimangngilh bawl hiaihiai hi leh kilawm hi. Mi khempeuh in amah bek ki ngaihsun, ama mailam ding bek khualta hiam (individualism mindset) cih nop huai hi.

I pom suk pak diam? Liando Thangho taang tang phel hawm hi nawnlo in, a nunungnung thankik in cilphih i ci suk mai diam?

Mizogam in a buaipih pen guaktang in a vak a om nawnloh liang hangin a nei leh neilo kikal ki gamla luata a, revolt a om khak ding a guk in Social Scientist te in lau uh hi. A neite kisuam ding, a neite kilaksak in a neilo te kipia ding, Robinhood, The Prince of Thieves cih dan a om khak ding aki lau hita hi. Banghang ahi tam??

Eima angsung ciat kikhuat lua ta cihna hi. Christmas hi dinga, mi khempeuh lungdamna ding hi mah leh a nei leh neilo kikal gamla lua hangin biakinn mahmah ah zong maingal dan kibanglo thei hi. I khuadak kei leh a kidaangkoih utzaw mihing om theih hi. Biakinn ah a kiteeng ngamlo tampi te pen a ut loh man hilo in, mi mai ah maizum sese sang cih ngaihsut man hih tuak hi. Mi hih bangin thupi zo kei leh maizum huai sa uh hih tuak hi. A tua maizum behlap dingin Pawlpi upa te ki kum in a coat hoih pen uh tawh kizem in khut lam in thukim uh a, Pawlpi dan sung pan hawlkhia in hencip lai uh hi. Laitui paudan hi leh ‘zawsop aw’ cih ding hi.

Politics play khial i hi diam? Thu khempeuh ah politics tawh bulh khin lua ihi kha diam? Humanity kalkaak kha i hi diam? Kumpi utna, thuneih utna, let utna hangin i dignity zuak kha i hi diam? Is it worth sacrifying our basic rights or humanity for material gain?? Biakinn nasan ah politics lungsim a lut kha ding cih lauhuai hi. I inkuan ah, pawlpi ah khuasung leh mimal nuntakna ah politics in hong tuam lua kha hiam?? Hih lungsim in mimal bek hamphatna ding hong ngaihsun sak kha hiam???

I vek in pumkhat in kipawlkhawm lo i hih manin a thu in minam khat i hih hang, ki society pen a siam hetlo, a zang hetlo, a zawngkeu phel langkhat bek bang hi a, a langkhat pen individualism mah kizang tawh kibang hi. Kawlgam Zomi te diak diak pen amau mimal ciat ki ngaihsun zaw tawh kibanga, biakinn leh pawi thu ah akipawl cih man bek hileh kilawm (gen khial leh hong maisak henla). Amau pen ki society ding a ut uh hangin hi thei taktak nailo ahi tam maw, India pen ki society ding a kiphal hangin ut zo taktak lo i hi tam maw??

Mizogam pen a minam bup, a gam bup in inkuan khat bangin kihuai in khangto khawm uh a, tua sungah tua liah ah amau inkuan ciat kikhhual uh hi. Vai te pen amau insung ciat kikhual masa uh a, tua zawh ciang amau insung status tek tawh pawlsungah kipawlna nei uh hi. Vaite kipawl dan pen a kisap ciat uh kihu tuah ding kipawlna hi a, UNO tawh kibang hi. Mizogam kipawlna pen Nation State tawh kibang hi. UNO memberte in a UNO sangin amau gam thupi masak uh hi.

Ei zong i minam sangin innkuan sung bek, mimal bek i thupi sim zaw pak diam? Individualism pen i pompak diam? I minam kipawlna te thusim loin omthei ta ing, lianta ing, kikem zo ta ing cih manin i tangtat tuam diam?? Hau Za Cin