India gamah gunkuang tuahsiatna hangin mi 24 sita

India gamah gunkuang tuahsiatna hangin mi 24 sita

Jan. 16, 2017: India gam-a om Bihar state ah zanhal in ni thum sung Laileng Lensakna/khah Kidemna Pawi (Kite Festival or ‘Makar Sankranti’) kici state tourism saina tawh kinei hi. Hih “Makar Sankranti” ah kihelte Patna panin Sandalpur khua zuan dinga gunkuang (buat) mi 60 valte tuanna NIT Ghat kicihna mun zuan dingin a manawh lai-in Ganga lui-ah a gunkuang tum (capsized) hi. Zan in tuahsiatna tuakte lakah si luang 4 kimuh beh a, tu dong sihna tuak mi 24 cing ta a, mi tampi mang lai hi.

Patna district magistrate Sanjay Agrawal in a genna ah hih gunkuang sungah mi tam tuang lua ahih manin Ganga lui-ah tum hi ci uh hi. Hih thupiang mit tawh a mu ten a genna uh-ah laileng khahna dinga kihel nuam a tam banah tua pawi-a kihelte puak kikna ding gunkuang kicing lo a, khuamui kuanin pawi a kihelte puak kikna ding gunkuang om nawn lo hi cih hong kipulak manin tutna kituh in buaina (commotation) piang a, tuahsiatna tuak uh hi ci uh hi.

Sihna tuakte innkuanpih ten State government in hih bang pawi sai napi-in geelna kician nei lo ahih manin State government in a thah hi ci-in nakpi takin mawhpaih uh hi. Hutkhiatna nasem (rescue operation) National Disaster Response Force and State Disaster Response Force teams ten zan in a kimu nai lote muh ngap mel nawn lo uh ahih manin hutkhiatna nasep khawlsan uh hi.

Prime Minister Narendra Modi in hih thuahsiatna tuakte a dahpih thu pulak in, sihna tuate innkuanpihte tungah a galna dingin ₹2 lakh piak ding leh liamna tuakte tungah ₹50,000 piak dingin ciam hi. Bihar government in zong sihna tuakte innkuanpihte tungah ₹4 lakh tek a galna (compensation) piak dingin ciam hi. Bihar Chief Minister Nitish Kumar in hih thupiang kanna nei dingin high-level probe kici a kibawlna dingin thupia a, Bihar state ah opposition BJP party in Chief Minister a kitawpna ding kalh uh hi. Source: The Hindu/ Thang Khan Lian