India gama Rs. 500 leh Rs. 1000 thu atheihhuai tomkhat

India gama Rs. 500 leh Rs. 1000 thu atheihhuai tomkhat

Nov. 9, 2016: India Prime Minister Modi in golhguk leh thuman lo sumvom (black money) dalna dingin Rs. 500 leh Rs.1000 pen kisisak ding a, ATM tuni leh pawl khat ATM ah zing ciangin kikhak cip ding hi ci-in pulak a, Rs. 100, Rs. 50, Rs. 20 leh Rs. 10 laite pen kizang thei ding hi ci-in pulak hi. Rs. 500 leh Rs. 1000 laite pen mimal bank leh post officete ah Nov. 10 panin Dec. 10 tan kizang thei ding a, Bank leh post officete panin Nov. 24 tan Rs. 4,000 government ID zangin kila khia thei ding hi ci hi.

Sumte bank-ah na lak khiat theiuhna dingin Aadhar Card leh PAN Card tawi mangngilh kei in. Zan nitak panin naikal 22 sung sum luite na la khia thei lai ding hi. Debit card, Credit cat card, cheque damand bawlte adingin buaina tuah ding om lo hi.

Nai kal 72 sung government hospitals, railway, vanlen leh bus ticket booking counterte ah Rs. 500 leh Rs. 1000 laite kizang thei lai ding a, Nov. 11 dong hih sum laite diesel, petrol leh gas stationte ah kizang thei lai ding hi. Hih sumte pen state governments, oil company kicite co-operative sector kicite ahih kul ding a, a sumbukte pen State leh Central Government, bawngnawi zuakna tawh kizopna neite hi ding hi.

Reserve Bank of India in Nov. 10 panin Rs. 500 leh Rs. 2,000 laidal thak suaksak ding hi. Rs. 500 laidal suakthakte ah Red Fort lim tuang ding a, Rs. 2000 laidal suakthakte ah Mangalayam lim kisuang ta ding hi ci-in Economic Affairs Secretary Shatikanda in zan nitak in pulak hi. ATMte a kihong kik ciangin Rs. 2000 lai kila khia thei ta ding a, mi khatin khatvei thu in Rs. 4000 ta la khia thei ding hi. Ni khatin Rs. 10,000 bek kila khia thei ding a, nipi kal khatin Rs. 20,000 ta bek kila khia thei a, nipi khat khit ciangin kikhangsak kik ding hi. Rs. 100, Rs. 50, Rs. 20 leh Rs. 10 laidalte pen kisisak lo ding hi.

THEIH HUAI: INDIA KUMPI SUM THAK – Rs.500 leh Rs.2000

India kumpi in Notification no. 2652, November 8, 2016 in Rs.500 leh Rs.1000 Legal Tender hihna pan beisak hi. Hih Rs.500 leh Rs.1000 pen Mahatma Gandhi Series hi a, Reserve Bank of India in November 8, 2016 tan a a bawl/khah-khiatte ahi hi.

Kumpi thusuahna ah hih pen sumlim (fake currency) leh sumthanghuai/sumvom (black money) siansuahna ding ci uh hi.

Kuapeuh in hih a nuai-a teng thei leng val lo ding hi:

1. Rs.500 leh Rs.1000 na kepte na Bank leh Post Office Account ah bikhiah omlo in koih/deposit theih hi. Na bitna dingin Rs.20000 sang a tamzaw na Account ah ni khat in koih/deposit kei in. Hih pen December 30, 2016 tan hun kihong hi.

2. 11th November pan in Ni 15 sung hih sumte na khek ding leh Rs.4000 bek sumtang (cash) in hong pia ding uh a, tua lo teng na Bank Account ah hong guan’ lut (deposit) sak ding uh hi.

3. Meileng (train), Vanleng phual (airport) ah letmat/ticket hih sumte tawh lei theih lai ding hi. Ahi zongin Delhi Metro, Mumbai Metro, Kolkata Metro cihte ah kisang non lo hi.

4. Zato Inn (hospital) ah kizang thei lai ding hi.

5. Na sum koih khempeuh Siahdong ten (Income Tax Deptt., GoI) hong na encik cihna hi pah hi. Na siah piakna tawh na sumkoih a kituah keileh daan/penalty hong pia thei uh hi.

6. 11th November a kipan, ATM ah Rs.2000 nisim in thohkhia/withdraw thei ding hi teh. Hih piazia pen November 18, 2016 tan a ding hi phot hi.

7. Bank ah Rs.10,000 kithohkhia/withdraw thei ding. Ahi zongin, kalkhat sungin Rs.20,000 sang a tamzaw ngah lo ding hi teh. Hih paizia pen 24th November 2016 tan a dingin ki bikhiah hi.

Hih sum thak vai suahsakna ding leh sum luite sihsakna ding pen Modi in PM a let ma-in PM ka let leh ni 100 sungin Black Money kici gamdang a kikoih khempeuh ka la/puak kik ding hi ci-in kamciamna na nei hi. Ahih hangin PM a let khit nung (26 May 2014 pan) tu dong Black Money (Kala Dhan a kici) khat beek puak/la kik zo nai lo a, kum kik ciangin India State sunga state gol pen Uttar Pradesh a kiteelna om ding a, na hoih sep mel nei lo ahih manin mi tawta tampi a khem nop man zong hi kha dingin ka um hi.

Tua banah hih sum kilaihna leh sihsakna hangin sumhaute tengin Debit card, Credit cat card, cheque damand bawl in zang uh ahih manin mihau ten haksatna thuak kha lo ding uh a, khualzin mite, sum tam lua lo tawh sumbawlte leh mi nautang teng bekin haksatna kithuak bek ding a, a ngimna kilehpei (boomerang) kha ding a, UP state ah a lawhsapna lianpi hong hi kik dingin ka ummawh zaw a, Black Money leh terrorism in buaina bangmah tuak kha dingin ka um kei hi

#Ngetna: India kumpi in a sihsak theih lohna dingin sumhau Zomite aw, na sumte cimawhte huhna ding, meigong tagahte huhna ding leh khawhsa an kham zo lo na Zomipih gilkial dangtakte huhna ading na zang mai ve maw? Ahih kei keh guta ten a guk theih lohna, ngette in a nek theih lohna, bawng leh sial ten a tuatcil theih lohna mun, zusa leh vasa ten a tuah mang theih lohna mun, zusa ten a cip mang theih lohna mun ah na sumte uh na khol zaw un. Tua ahih kei leh a nuai-a limte bangin na zat kul ding hi. Thucian zaw pen hih lai a nuai-a linkte ah ettheih hi – RBI website www.rbi.org.in leh Government web site www.gov.nic.in Thang Khan Lian