India ah naungek suakcil khat ahingtangpi in leisung ah kiphum

India ah naungek suakcil khat ahingtangpi in leisung ah kiphum

India gamsung aom khuaneu khatah naungek asuakcil akipai, ahingtang in leisung ah akiphum khat ki mukhia cih Dail Mail pan kiza hi. Tua naungek suakcil pen numeino hi a, sehnellak leisung ki thuktawhlo in akiphum ahihi.

Ageinai ah naupangno te kimawl in aom laitak naungek pen leisung panin akhe adawto mu uh ahih manin tuapan in aki theikhia ahihi.

Nung Saturday ni in Odisha State, Jajpur District sungah thupiang hi a, hih mizawngdiak atamna State te ah tapasal bek deih uh a, tanumei pen kemnuamlo uhhi.

Hih naungek pen cidam in, naungek ngeina te mahbang in agihna zong 2.5 kg pha hi ci’n Chief medical officer Jajpur district Fanindra Kumar Panigrahi in genkhia hi.

Alaigui zong kitan nailo in leisung ah ahingtangpi in aki phumsukziau himawk hi. Hih naungek leisungpan in ahonkhia Alok Rout kicipa ii genna ah naupangno khatin leisung panin khe adawtto mu ahih manin hong zaksak uhciangin aphual ah amanlang in kataipah uh a, ka phongkhia uh cihi.

Leisung pan alakkhiat uhciang in amai ah puansia khat kikhuhbek ci a, naungek pen asuahzawh nai 6 bang phakhinding in ki ummawh hi.

Zato ah kipuakpah in, Hospital Staff te’n aminding in Dharitri ci’n phuak uhhi. Dharitri pen Sanskrit Word hi a, akhiatna pen “Leitang” acihna ahihi.

Video na etnopleh: Miraculous moment newborn baby rescued after ‘buried alive’

Hih naungek pen tulaitak Dharmasala Hospital ah aki keplaitak hi a, zato pan atuah ciangin Child Welfare Committee ah ki apding cih kiza hi.

Local Police Officers te genkhiatna ah hih naungek pen anu leh apa in numei ahih manin, apai uhzong hithei. Tua ahih keileh anupen pasal kician neilo in agaaikha ahih manin apaizong hithei ci’n AFP te tungah genkhia hi.

Police Inspector te’n hih naungek pen kuapaih hiam cih kankhiading uh ci a, numei ahih manin anu apa te’n athahlupsawm uh hizawding in ummawhzaw uhhi.

India gamsung ah numei pen kideihlo mawk hi. Tukha kipatlam inzong Maharashtra State sungah Police te’n numeino in apiangding naungek Fetus 19 hawkguam sungah akipai mukhia uhhi. Numei deihlo uh ahih manin, nauphiat “Abortion” akibawl kici hi.

Monday ni mahmah inzong New Delhi aom leisung khatpan ui khatin nau kiphiat akiphum luhkhia kici hi.

British Medical Journal minthang khat ahi “The Lancet” kici te’n 2011 kumin Study bawlkhia uh a, abeisa kum 30 sungin India gamsung ah numei in apiangding naungek aki susia, nauphiat “Abortion” bekbek 12 Million phading cimawk uhhi.

More: Malaysia, Penang ah naungek suakcil khat ekbuk sungah ki nusia

Numei deihlo cihmawk, numei te omkeileh pasal tezong koipan suakkhiathei tuanding. Numei te aomman mahin pasal te suakthei a, tumthei hi 🙂 ZD Sawltak #zomidaily