Ihmutna le Hauhna laibu sungpan a lian 4 sungteng

Ihmutna le Hauhna laibu sungpan a lian 4 sungteng

Ihmutna le Hauhna laibu sungpan a lian 4 sungteng hong kisuaksak hi. Saupian mahtaleh na sim hamtang in.

4. PILNA TOKHOM: Na hauhnop zah $50,000 million, $100,000 zongh hithei hi. Na deihzahzah ngahtheih nading vangliatna na nei hi. ‘Mihaute’n koi bangin sumngah uh hiam? A hangomlo pi in mihau hong suak uh hiam? Kaam hangmaw a hihkeileh vangliatnadang khat peuhpeuh a neihman uh hiam? Tua bang hilo hi. Mi ngualzo te in a sunglam vangliatna thei in hitaleh theilo in hitaleh zangkha uh ahihman a hihi. Nang ii neihloh a neihuh vangliatna dang om tuanlo hi. Ahizongin a mau in nalianpi kasemthei hi cih theihna khat nei uh hi. Tua bek a kilamdang i hihi.

Hunkhatlai in America gamah pilna bangmah neilo in khasum tawmno bek tawh sakol nungzui mikhat om hi. Ahizongin tua mipa in tu in taih inn sangpipi te leh hoihtak in a kizem a etlawm mahmah inn hoih nono te nei hi. A masungah pilna, septheihna leh hatna khempeuh a kikholna khat om hi cih hong theih ciangin a nuntakna kikhel to pah hi. Hih thupen hihlaibu sungah i gennop penpen thu a hihi.

Bangmah ma tutna mel neilo in mikhat kumtampi sung vakthap thei hi. A sunglam pan in tua mipa in thukhat hong zaleh thakhat thu in makai lianpi hong suak thei ziau hi. Sangkah pen thupi mahmah hi. A kisinthei pilna khempeuh sin in theihhuai mahmah hi. Ahizongin tua sintheih pilna te bek tawh leitungah ki lawhcing zonailo a hihlam theihhuai mahmah hi.

New York khuapi sungaa pilna nei leh sumhau a tam mahmahna munah vanzuak a siampenpen mi pa pilna nei lo (sang hoihtak a kahlo) khat hilel hi. A pauzong awk thei lai hi. Mipil te kiangah van zuakngamlo hi. Ahizongin nikhatni ciangin company lianpi a makaih dingin kisam mawk hi. Banghanghiamcihleh tua mipa in a pualam pilna ciangbek hilo in a sunglam pilna leh hatna tawh na sem hi.

Hunkhatlai in nasepna lianpi a nei mikhat a nasepna ah supna lianpi khat tuak kha hi. A nasemte khasum pia zo nawnlo hi. A company neihsa van teng beibei ta aa a neihkhempeuh $50,000 pha zo nawnlo hi. A leibat lakna te in sum siksik ta hi. Kumpi zumah thu kineih dingin samsam ta hi. Amah in zongh a company khakcip leh hoihzaw ding hi ci in ngaihsun hi. Zingsang a zumpai ding a thadah mahmah hi. Sum kisikna phone tamlua a hihman a hihi. Hongpia zo naikei ning cileh lungkim lohna khauhpai lua a hihman a hihi.

Zingsang khat meilengtung a tuankawm in news a sim leh a mahtawh a kibang mikhat supna lianpi sungpan in a gualzawhna simkha citciat hi. A sunglamah dotna nasia tak in hong kipan aa ‘nasepna kisia in sumin, a bei ding dinmun pan midangte inzongh gualzawhna ngahkik aa kei ngualzo kik theilo ding maw’ cih bekbek a sungah hong kilo hi.

A lungsim sungah zo ding cih bekbek ki muanna kidim ta hi. ‘Kei zongh ka hithei hi’ cih bek ngaihsun ta hi. Zum pai ding thadah nawnlo hi. Zingsang ciangin zingtung in a zumah paipah aa a nasem te kiangah ‘leibat laibu khempeuh hong pia un’ ci hi. A leibatna mi khempeuh phone tawh hopih pah aa ‘tawmcik na gak lai un, kongbat khempeuh a sawtlo in kimtak in kong pia kik ding hi’ ci in lawptak in hopih hi.

A leibatna mite khatin lamdang salua a hihman in ‘company lian dangpan in sumleitawi la na hiam?’ ci in dongh hi. Mipa in dawngkik aa ‘tuasangin a thupi zaw khat ka neita hi. Haksatna khempeuh ka zawhtheihna ding kasungah ka mu hi’ ci in gen hi. A leibatna pa in dawngkik aa ‘na thugen pen man taktak hi. Na awngingsungpan ka muthei hi. Mailam ah kipawl khawmin nalianpi semkhawm laiding hihang’ ci aa tua ni in sumtampi a bat manin a lauden mipa tawh lawmhoih in ki man uh hi.

A sungpan in a ngingkhia lawpna awnging in ‘thong hong khum nung’ ci aa a linphawnden mite tawh ki maigap sak hi. A lungsungah kimuanna a om ciangin a nasepna ah lawpsemsem hi. Thathak tawh nasem hong kipan hi. Koipan a ngahhiam cih a theihloh sepngamna te tawh nasem aa haksa cih thei nawnlo hi. Laituisan tawh a kiciamteh a sum sazian leh a nasepna khempeuh metna vive hong suak kik hi. Hihthupen thulamdang hi tuanlo hi. A nasepna leh a septe a kibang mah a hihi. A kikhel pen mihing sunglam ngaihsutna bek a kikhel a hihi.

Sunglampilna (Sunglam mi)

1800s kiimpan kipan lungsimtawh kisai pilna sin te in pualampilna nuai ah a lianmahmah sunglam pilna om laihi cih mukhia uh hi. Ngaihsut theihna, ngelkholh theihna, a hoih a hoihlo khinkhai theihna pen pualam pilna tawh a sem na hihi. A taktak in sunglam pilna pen na pilna khempeuh a kigakna khuambulpi a hihi. Leitungah mipil pente nangawn in na sunglam pilna zah a pualam pilna tawh theizo ngeilo ding uh hi.

Subconscious mind cihlaimal sub- cihpen a nuailam cihna a hihi. Gtn: Zumno pen a kikhen khiatna zumpi sangin lianzaw ngeilo hi. Tua ih sunglam pan in ih ngaihsutna leh gamtatna te hong ki makaih den a hihi. Gualzawhna leh lungdamna ah ahizongin nguallehna leh lungkiatna ah a hizongin hong tunpih hi. Gualzawhna ih sunglam ah hong om khit limlim nakleh tua ih sunglam panin ih pualam ah hong ki langh khia ding hilel hi. Sunglam aa omthu a pualam ah zawhna leh lungdamna hongsuak ding a hihi.

Sunglampilna innpi

1930 kum New York ah radio sungpan thu ka genlai in hih pualam leh sunglam kizopna gentehna khat kazangh ngei hi. Tua pen a ngai mi khempeuh in telnop sa mahmah uh hi. Company khat sungah company nei (boss) pa om hi. Boss pa khutnuai ah manager om hi. Boss pa pen company neipa a hihhangin sepdan ding, ngel dan ding khempeuh manager pa thu a hihi.

Manager pa in a utbangbangin gelna neiaa a hihhangin sepding khempeuh boss pa kiangah thukimna la masa hi. Boss pa thukimna omlo pileh boss kiangtungmasa lopi in na semthei lo hi. Tuapen pualam leh sunglam ki zopna dan a hihi. Pualam pilna pen manager hi aa sunglampilna pen boss a hihi. Ngaihsutna ngelna khempeuh pualam pilna tawh kisem aa sepkhiatna taktak pen sunglamtha in tavuan la hi.

Na lungkiat mahmah hunlaitak in ‘kei a ngualzo pa ka hihi. Lelhna tawh kei kisai lo’ na cihnak leh na boss pa a hi na sub in hong sangpah ding aa tuabangin hong piangsak pah ding hi. Sepding hoihtak in na boss pa kiang na tunnak leh boss pa in a kisam khempeuh hong vaihawm pah ding a hihi. Na manager pa nasepna kician sak mahmah in. Tua hipeuhleh na sunglam in zawhna ding lampi ah hong paipih ding hilel hi.

Mikhat ka zumah hongpai in bangci leng nasep ngahthei ding ka hihiam ci in hongdongh hi. Mi kicianlo ci in ciaptehna a ngahkhin sa mi a hihi. Tua mipa kiangah ‘I am a success’, ‘mi lawhcingpa ka hihi’ cih bekbek nai 24 sung pulak in ci in ka sawl hi. A diakdiak in nitak na lupding ciangin hanciam in ci in ka sawl hi. Hihpen a ma a’dingin a thupi lo tawh kibang khathei mah ding hi. A hizongin kongsawl bangin nasem dinghiam cih kamciam ka kipia sak hi.

Zingsang lupna tungpan hong thawhtoh ciangin ‘milawh cing ka hihi’ a cihpen a taktak a suahsak ding bekbek hong ngaihsun hi. A thadahna teng beisiang pah hi. Zing an a nekma in kimuanna tak tawh launa om vetlo in hong vak khia hi. Na sephoih penpen kasem dinghi cih upna tawh hong kalsuan hi. Hong pailai tak in upmawh hetlohna munkhat ah ‘vanzuak ding mi ki deih, Hardware Department’ ci in lai kisuang mu hi. Bangmah dang ngaihsun manlo in nasep a pia ding manager pa tawh a kimusa hong suak lian hi.

Na sep zong pa in ‘sia aw, hard ware tawh kisai kasem ngeikei aa ka thei ngeikei hi. Ahizongin na deihbangin hong zuaksak thei dingin ka ki um hi’ ci hi. Hih mipa i ki muanna leh hansanna in manager pa lungsim sukha mahmah hi. Dotna tuamtuam tawmkhat a kidot khit ciangin ‘zingciangin naseptheihna honglak dingin kazum ah hongpai in’ ci in sabuai nungpan in genkik hi.

Leitungah na deih taktak ngahlo in deihleh lungngulhna bektawh na hun hong beibei kha ding hi. A taktak in na boss pa kiangah thu tungnailo a hihman hilel hi. Sumlepai lawhcinna te na sunglam boss pa nasep mah a hihi. A vek in na boss pa in tavuan la hi.

Pasal te itna a ngahngeilo numei khat om hi. Pasalte peuhmah in a mah ngailo uh ahihman in a nuntaksung pasal neilo ding ci in a lungneu mikhat om hi. Tua numei kiangah ‘pasal te in kei hong it in hong ngai mahmah uh hi. Ka lungdam sak theihding pasal kamu ding aa tua mahbangin a mah in kei hong lungdam sak ding hi’ ci in a sungtawng dongah ka pulak sak hi.

A sawthetlo in tua numei in lawmngaih khat hong neipah aa kha li khitciangin ki tenna nei uh hi. A nuam mahmah innkuan khat hongpiang hi cih ka thei pah hi. Hihbang a piangkhinsa thu te kong gen ciangin ka deihna a tuntheihna dingin mitphial bangin ka phuahtawm nasa theikha mah ding hi. Na upkei leh na sunglam pilna tawh na nasem photphot in. Midangte tungah a piantheih mahbangin nang a’dingin zongh hong piang ding hi.

A beisa kum 15 sung radio ah thugen in na a sem ngiat ka hihi. San Franciso ah nikhat minute 30 sungta thugenna nei in kum 10 sung tuabang nasep a sem ka hihi. Mi atamzaw te in ni 7 sung mikhat bekbek in nailang sungta thu genleh cimtak uh hi. Ahizongin kei thugen hong kicimtak het lo in ‘ni sim in a siam semsem tawh kibang teh’ ci in lai hong ki khak ziahziah hi.

Kei le kei a siam mahmah in hong ki phat gawpnuam ka hi kei hi. Nang ii septheihloh kasep om tuanlo hi. Tuabang kaseptheihna pen ka sunglam pilna ka zat den man a hihi. Minute 30 sung thugen dingpen ki nginkholhna lai at leng a tawmpen mai 14 bang pha hi. A hizongin kei ka hihleh lai maikhat bek ka ki nging hi. Thu ka genciangin kitat vetlo in minute 30 ka gending hong phulkhia deudeu lel hi.

Nisim in thugenna radio maiah ka tutma in ‘tu ni aa ka thugen ding pen ka gen ngeisa khempeuh sangin hoihzaw hi’ ci in ka pulak den hi. Thu gen ding ka kipat lianpan kipan goodbye cihhun ta ci in khuamtung naipi in hong gen masiah ka gending hong paipai lel hi.

Laibu in a kingelh khiat ding ciangin puahphat ding tawm mahmah hi. Mi pawlkhat te pen laibu in a kingelh ding ciangin liahding leh phiatding tammahmah aa khat khat te bang a vek in laihsiat ding nangawn om hi. Kei a’ a hihleh laibu in a kibawl ding ciangin lai maikhat tangding nangawn bawlkik, zep kik kul nawnlo mawk hi.

Hih thu na simciangin ‘Ha! Hoih ey, keizongh nikhat niciang tuabang dan kisin ningey’ ci kei in. Tua pen kammal hoih hilo hi. Tua kammal pen a kicianlo kammal hi. Khatvei ciangh semding cihpen semlo in kum 10 dong na om zongin thuman gen mah na hihi. Sem ding na cih sangin tun sempah zaw in. Na sunglam thaleh pilna bangzah cianghiam cih na zat masiah na thei zo kei ding hi. Nanglenang ki to inla semkhia in. Na boss pa in thu hong piakding bek a ngak lai na hihi.

Nang a’dingin na piansaknop nahoihkhat ngaihsun in. Zingciangin a thupi mahmah khensatna khat a bawl ding ci ni. Bangci khensatding cih a theizo mahmah lo na hihi. Tuabanglaitak in ‘ka khensatna pen lamkhatpan in a hoihpen bek hilo in thukhempeuh ah a hoihpenpen dingin ka khensat theiding hi’ ci in tamveipi nalup ding ciangin pulak in. Zingsang ciangin na khensat dan ding a hoihpen na ngaihsutna sungah hong suak ding hi. Tuabang ngaihsutna hoih na neih man in lamdang na kisa dingaa na thukhensatna te hangin na lungkim mahmah ding hi.

Na sawlding bek honggak aa na sunglam nasepna in tawlgak hun, thadah hun cih neilo hi. Nang phattuam nading a hikeileh nangsiatna ding na khat teitei semden hi. Tua a hihmanin na phattuam nading na nasep sak ding kisam hi. Na simal sazang khempeuhsungah pilna om aa tuate pen na zat dingin a thupi mahmah te a hihi.

Na ngaihsutna hoihtaleh deihhuaitakei leh na ngaihsut bangbang sunglamtha in dotna hong dongnawn selo in tuatawh kituak dingin nasem pah lel hi.

Nanglenang a damlo in na ki ngaihsut leh nasunglam pan in tuabang dingin na sisung, sasung khempeuh ah na kisempah hi. Na sunglam pan in tuathu na pumtung nakhempeuh tungah na kizasak pah hi. Na lungsimsung aa a damlo aa na kingaihsut bangin hong piangpah hi. Na tha dah pah in na mitte hong tha zawngkhal pah dingaa tua ciangin kaci nuamkei na ci ding hi. Tua mahbangin a cidam a thahat in ki ngaihsun den lecin na kingaihsutna mahbangin na sunglam pan in tavuanla in na hong kisem pah ding a hihi.

Zato ah cina kilak 76% te ii natna pen lungsim damlohna hanghi ci in 1951 kum Outpatient Medical Department khat in tangko hi. Cidamlohna dingin lungsim in tuazah tak in nasem thei a hihleh cidam nadingin zongh bangzahtak in semthei ding hiam?

‘Ka sunglam panin ka cidam zawk theih nadingin ngaihsut dingleh sepding te hong ki makaih hi. Nisim in ka pumpi sungah damzawkna, hatzawkna, hoihzawkna tampi kamu hi’ ci in pulak in. Nitak na lupding ciangin tuathu lungngai in. Zingsang na thawh ciangin kilamdanna tampi na muding hi. Siamsin Library