Ih mangngilh khak, a thupi pawlkhat ~ Esther Niang Theih Kim

Ih mangngilh khak, a thupi pawlkhat ~ Esther Niang Theih Kim

Tulai tak in leitungbup in, ih tuahkhak hih pulnatna Covid – 19 in bang teng hong hilh hiam?

1. Leitung nuntakna ah a sang pen gualzawh minthangna nei, sum hau, nasep hoih nei in, ih biakna upna te khuah a, ngeina thupi te zui zo mahmah ta leng, hih natna pen deidan a nei lo bek tham lo, mi khempeuh tung ah a kibang lian in, tungthei hi cih kisin kha hi. Ih up kei leh kineih siam minthang Tom Hanks leh England kumpi nu’ tapa Prince Charles en ni.

2. Ih vekpi in khat leh khat, a ki peel thei lo te ih hi a, mi dang khat ii kidop lohna pen a dang te tung ah zong sukha a hih lam zong hong thei sak hi. Khat le khat ih ki daikaihna cih te in zong khiatna hong nei nawn lo hi. Banghang hiam cih leh hih virus in mun khat pan, mun khat a pai na ding visa kisam lo hi. Hih bang in gentheihna ih thuak ciang in, a khantawn un gentheihna a thuak mite ii, nuntakna zong hong phawktheih sak kik hi.

3. Pum pi a ding tha a hongpia zo lo, hoih tak in ki bawl a hi lo neek theih te ihneek na leh cidamna a susia thei chemical kihel dawn theih te dawn a, a kidop huai ahi, ih cidamna mangngilh kha ih hih lam zong, hih natna in hong hilh hi. Ih cidamna ih kikep kei leh, a cina takpi ding ih hi ta hi.

4. A diakdiak in ah, kumham te a hih kei leh cidamna hoih lo kum tam te huh in, a tom mahmah leitung nuntak sung, khat leh khat ih ki huh ding zong hong thei sak semsem hi. Ih ngimna in ekbuk a ih zat ding laidalte leina ding ciang bek hi lo mawk hi ven. Manphatna a nei nuntakna ih hih ding zong kisam hi.

5. Ih nisim nuntakna taktak pen muhtheih van te tung ah kinga mahmah a hih lam hong theisak a, haksatna ih tuah taktak ciang in,a tamman kiphatsak pih theih van te in,kiman na hong nei nawn lo a, nisim vanzat a hi neek leh dawn, tui leh zatui te mah, a thupi zaw a hih lam hong thei sak semsem hi.

6. Innkuan pih te tawh inn ah om khopna ii thupitna te zong hong tel sak a, ih nisim buaina te hang in, ih innkuan pih te bang zah tak in nusia kha khin ta ih hi hiam cih zong hong phawk kik sak hi. Innsung a om,innkuan pih te tawh itna khanna ding in, innsung ah ei hong ki puak kik na hi zaw gige hi.

7. Ih nuntakna ah ih sep taktak ding pen, sum ngah na ding nasep bek cih sang in, khat leh khat hamphatna ngahna ding sepkhopna ii thupitna zong hong thei sak hi.

8. Ei leh ei bang zah tak in lian kisa, midang te in ei bang dan in hong pimuh cih ei leh ei ih kiphatsakna te khat leh khat kisit tel kik na ding hun hong pia a, kua kua na hi zong in hih virus in hong ban zo a hih lam zong hong thei sak hi.

9. Mimal khensatna pen suakta tak in ih ngah a hih na hong lak hi. Tua teng ah khat leh khat ki huh, ki hawm leh tha kipia ding maw? A hih kei leh ei a ding bek ultung sak in, ei neih te sel cip a, ei hoih na ding bek hih ding maw cih pen ih teel siam ding hun hong hi ta hi. A hih hang in, tua bang gamtatna in a tawpna ah hamphatna a om tuan lohna hong tel sak semsem a, ki huh khop,sepkhopna ii thupitna zong hong tel sak hi.

10. Hih hun pen picing tak in kantan ding maw? A hih kei leh linglawng sa den a nisim nungta ding maw cih zong hong thei sak hi.Leitung tangthu ah zong pulnatna tam veipi a ki thuak khin hi . Tua a hih man in, hih hunsia pen picing tak in kikemcing a kantan ding maw , a hih kei leh lungsim linglawng den a, leitung bei ta hi ci-in lunglau den a nungta ding maw cih khensat kul ta hi. Tua dan a sia lam in ih muh leh a hoih sang in, a hoih lo lam hongtung zaw ding hi.

11. Hih bang thupiang te in, a tawpna a hih kei leh a kipat kikna zong hi thei cih hong thei sak hi. Tu laitak in, nidang in ih sep khialh te kisik kik in, tua te tung pan sin kik ding kisam ta hi. Tua a hih kei leh a beisiang thei lo, hih thusia pi te hong tung kik kik ding a hih lam zong theihhuai hi.

12. Ih omna leitung pen cina mahmah ta a hih lam zong hong thei sak hi. Hih bang in, ih nisim nuntakna te hong kikhel ciang in, mihing te cidamna ding a lauhuai a hi nasepna pan leh set van te pan in huih nin te khahkhiatna, hong tawm na hang in, huih te hong siangtho a, kim leh pam zong hong cidam huai zaw cih pen ki mukhia hi. Ei mihing te cidam nawn lo ih cih pen, ih teen na leitung zong a ci dam loh man na hi gige hi.

13. Haksatna ih tuak khit ciang in, a hoih te zong hong pai kik ding a hih lam hong phawk sak hi. Nuntakna pen leitung paizia tawh kizui in, a siat khit ciang a hoih hong pai kik ding hi. Lunghih mawh luat ding kisam lo hi. Hong hoih kik ding hi.

14. Corona/ Covid virus pen gentheihna lianpi tawh a kibat hang in, ken ka hih leh lampi man hong hilh kik ding in, ahoih lam in lam en ing. Ih mangnghilh khak a thupi te hong phawk sak kik a, tua te tungtawn pan in, pil gamtat ding maw a hih kei leh a thei lo kineih in om paisuak ding maw cih pen ei mimal kim ciat khat tung ah kinga zaw hi.

Theihding: Hih laipen a masa in Bill Gate at dan in kigen a, a taktak in, mi khat in minseel tawh a at na hi zaw hi. Tua tung tawn pan in puahpha leh behlapna tawmkhat tawh kong let kik hi. Lungdam! Esther Niang Theih Kim