Ih kaal ah guam thuukpi… (Part 3) ~ Zomi Quavadis

Ih kaal ah guam thuukpi… (Part 3) ~ Zomi Quavadis

Laisiangtholui sungah David in “ Topa aw nang kiang panin ka taimang thei kei a, ka bu thei kei hi” anacih mah bangin keizong ka tuntunna munah ka lungsim vangik in hong zui den a, England kumpinu tenna Buckingham Palace kiim tengah ka lawmpa tawh sunsiah ka nek laitak nangon inzong ka lawmnu ka mangngilh thei tuan kei hi. London khuapi in a minthanpih ahi “London Bridge” tungah lam ka siauh hangin ka mitkha ah ka lawmnu luaiden veve a, Paris khuapi sunga zusai leh ansai minthangte ah sunlezan ka tutcip hangin zong kilamdang tuan lo hi.

Minamkim phial kimna mun “Eiffel Tower” omna tualpi nihvei khe tawh ka kiimkot liang hangin bangmah in ka vei tuan kei a, ka kiim ka paam a nungak melhoih vaak hialhialte tung naleng ah zong ka mit sawtpi tu thei tuan lo hi. David in “Tuipi thukpen tawphah tungah giahphual saat in omcip mah taleng Topa aw tualai ah nang na om hi” acih pen hi kasa mahmah hi. Koikoi ka tung zongin ka lawmnu in hong nusia tuan lo hi, bang hang hiam cileh amah pen ka lungsim leh ka lungtang sung tawngah a om himawk hi. Ka lungsim leh ka ngaihsutna in ka nuntak laiteng hong taisan thei ngei lo ahihman zong hikha ding hi.

Tuabang teng tawh khakhat dek tak phial hun hong bei to hi. Zan khat ka lawmpa tawh muiciai takin ka giahna Hotel ah ka ciah uh hi. Hotel nasempa in lai-ip khat hong pia a “ Nang aa ding hi” cia hong piak zong ka sang zo kei hi. Room sung ka lut ciangin tutna nip tungah ka bok pah pikpek hi. Tua laitakin ka lawmpa in ka lai-ip ong hawnsak a, ka maiah sim dingin hong zalh khia hi. Tua laikhak sungah tomcing takin hibang danin na kigelh hi “Na lawmnu mel na muhnop lai leh nawh tak in hong ciahkik in.

Nithum zong sawt lua kha thei hi” cih thu hi. Tua ka sim khit phet in ka mit-hah hong siang pah seisai a, ka lungsim hong khanglo pah leklak hi. Ka vanteng khempeuh ka kithawi pah a, zing phalvak phet mah in ka lawmnu omna khuapi lam zuanin ka ding kheh pah uh hi. Lamkaal hamsatna tuamtuam hangin kaalkhat khit ciangin ka lawmnu omna khuapi sung ka lut zo pan bek uh hi.

Khuapi sunga ka lawmnu innsapna zong angei na bang nawn lo a, colour zong na kilaih khin in, anuai ah vansai lian pian khat na om ta hi. Lung-am mang bangin vansai maiah ka din dildel laitakin vanzuaknu in ong hopih a ka deih hong dong hi. Na vansai tunga innsapnu a omlai hiam cia ka dot leh “A sih zawh kaal khat val khin e” hong cihsan ziau mawk hi. Awhoi le! Bangcih ding? Tawmvei sung tua vansai maiah suangmilim bangin gongaw in ka ding cip hi. Khua ka phawkkik ciangin ka zawlpa inn sung mah ka kidenna leuleu uh hi. Nithum sung ding mihai bangin ka om a, hong kiho lezong mumal om mello in dawng den hileng kilawm hi.

Ka nul ding khitui teng zong hong kang ta a, ka kapkap zongin khiatna nei nawn het lo cih ka phawk ciangin ka lupna tungpan tho khia in ka kipuah siang hi. Samsai ah ka sam metsak in, ka mukmul leh ka khamul teng zong ka kiat siang sak kiuhkeuh hi. Tua khit ciangin ka zawlpa innsung a lengla khanah tang takin ka tut kawmin Coffee ka dawn a, tualai takin ka lawmpa in “Zawl aw na lawmnu in a sihma diak in nang kong piak dingin hih ama Diary tuan vilvel in hong pia hi. Na sim dih ve” hong ci hi. Coffee kha sitset kampi khat ka dawnkik khit ciangin “Sim leng aive maw” ciin a tuamna teng lakhia in sim ka kipan pah hi.

Tua Diary sungah ka lawmnu in hong it hong ngaihna thu bekbek gelh hi. Ahizongin ….”17/7/1865- kei mailam ding bek a khual hileng na pianna Pa hong cihna teng nial in ka ut bangin, nuam i sak bangin in om suak lel ding hanga kong taisan kei ding hi. keizong lah nong theihsa mah bangin sawtpi a nungta ding ka hinawn tuan kei hi. Ahizongin nang kong it luat man in leh na innkuan min uh asiat ding ka deih loh manin, na naunu in a it a lawmngaihpa a tenpih theihna dingin …thu tampi ka khual manin nang kiangpan a kihem khia ka hi a, cikmah hun a nong it kik theih nawn lohna ding ciin kamkha pen tawh khenna thu hong gelh ka hihi.

Na pianna pa inzong ” ka tapa na it takpi leh ama mailam ding na khualsak kul a, na khen ngam loh phamawh hi” hong cigiap hi. Nungak dangte banga siangtho leh iplah huai hilo ka hihman in ….. Itna hanga Itpente zong a khen ngam numei khat ka hihna na telni ciangin kei tungah na khasiatna, na hehna teng bei ding a, nong itna kiam thei ngei nawn lo ding hi. Hih kong itna hangin kei tungah zong na lungdam tawntung ding hi……..”

Itpen tezong Itna mah hanga hong khen ngam ka lawmnu pen pumpi tawh a nuntak sungin hih leitungah bangzah takin sia in mawhna tawh kidim hiphial mah taleh Mawhsuut in siangthopumpi sang a, sathau siangtho nilhna angah khit ciangin tawntung nopsakna Pasian angsung zuanin nuihmai takin a leitung nuntakna tawh kikhen a, tawlnga hi. Kei aa dingin thungen in hong ngak gige hi cihzong ka mangngilh ngei kei hi. (based on Alexander dumas’ story “Camellia”) …Zomi Quavadis…