I tanh Khasiangtho ahl khanin hong makaihna zui-in Pasian tawh kizopna hoih/hoihlo ki nei!

Zomi netters laisim u le nau sanggamte aw,
Mihing khempeuh Pasian in a kibang in hong it-a, Pasian itna sungah a omsa thu um mi sungah Khasiangtho nuntakna hong nguan hi. Tua Pasian Khasiangtho vaangliatna zia tawh kimakaih sak leng, khanin-dawi nasepna/khemna tuamtuamte a ki zo thei pan hi-a, Pasian thu um leh thu umlo mitampi in a kibangin Pasian Khasiangtho nasepna tello in khanin-dawi nasep/huzaapna sungah atheihloh kalin saltang in om uh ahih manin, kha sungah i dinmun ei le ei i kisittel theih nading leh taksa kha cidamna, thahatna thupha i ngah kim theih ding deihsakna tawh kong gelh i kihawpsawn hi a, laisim mi tulkhat sungpan mikhat in nuntakpih thei leng zong a lawhcing in i kingaihsun hi. Kuama dang mitsuan lo-a ei le ei i mimal ki et na dinga i gelh bek ahi hi.

Khanin nasepna leh huzaap sunga om lai mite nisim nuntakzia pawlkhat

· Pianna nu le pate tawh i kikal ah kizopna hoih muh/et ding a omloh man-a Pasian itna muh/up ding haksa asa mi te.
· A beisa hun-a sepkhialh bawlkhialh sa te phawk thapai-a, amah leh amah mawh kimai sak zolo a Pasian in zong a maisak zo nonlo dinga akituat te.
· A beisa hun-a thuakna haksatna, hong ki natsak/liamsakna te hanga midangte tawh siangtho taka kizopna hoih bawlding haksa asa mahmah te.
· Lungneu kha thei tawntung a, khat veivei ciang amah le amah hehpihhuai akisa te.
· Mawhna akl. a hoihlo zongsatna tawh a nungta mi pawlkhat om a, khawl ding hanciam zel ta leh a lawhcing zo ngiatlo a khawl thei lo mi te.
· Numei le pasal hihna vai ah huukna-lanna tawh a buai phadiak mi om a, tua zongsatna a nawlkhin/nusia zo mahmah lo mi te.
· Mihing nuntakna ahi ding bangtak leh a hun tak-a a zang theilo mi te. (Gtn. an khamluat-a neekna, laithaikapna, a kisam zah val-a lupna/ihmutna, teep le muam zatna, zukhamna, zatuikhamna, thu uang geenna, uang sep uang hihna,…. cih tuamtuamte.)
· Sum ahl. neihsa leh vante deihluat/lungngulh luat mana a buai mi te.
· A lungsim sung hehna tawh so vengvang ahih mamin, buaina piangsak-a a puahkhap mateng hehna lungsim a kem zolo/kikem theilo mi te.
· Na khat peuhpeuh lung himawhin patauhna lungsim tawh a kidim tawntung mi om a, khat veivei a lung hihmawhna bang hiam cih nangawn gen ding a theilo mi te.
· Ama nuntakna lungsim sungah a lau thei mahmah phadiak mi te. (Gtn. khuazing sungah kihtakna launa, khattang beka om ngamlohna, nat ding, sih ding launa, nakhatpeuh lau mahmahna,…..cih tuamtuamte.)
· Amah le amah kithat-a sih ding a ngaihsun/a ut mi te.
· Pasian tawh kizopna hun ahi Pasian kiangah thungetna leh, Pasian kammal Laisiangtho simna hun ciangin a lungsim a piathei lo, a ihmut asuak ngaungau leh atawl ngaungau thei mi te.
· A beisa hunin, Pasian thu ahi lo Pasian deihna tawh a kituaklo thunguk/thusim, selsim nei-a nasepna, maalakna, dawibiakna, phuisamna khatpeuh ah a ki hel thei zelzel mi te.
· A beisa hunin, milim biakna nasepna khatpeuhpeuh ah kihel-in biak ding sep dinga khentatna lungsim a nei ngei mi te.
· A inn sungah phuisam sa thusim/thunguk selsim khatpeuhpeuh leh milim ahl. na/van khat peuh a kemsim khinkhian mi te.
· A nu le pa te in Pasian maanlo khat peuhpeuh tungah a ap ngei mi te.
· Nu le pa, pi le pute mahmah in phuisam sa thusim/thunguk selsim na/thu khatpeuhpeuh tawh teenna ding inn/taihinn lam ngei mi te .
· A nu le pa, a pi a pute mahmah in phuisam sa thusim/thunguk selsim na/thu khatpeuhpeuh leh milim khatpeuh na kemsim khinkhian-in, tua nate tawh na a sem ngei mi te.
· Nu le pate kikhenna kaallak pana khangkhia zong mi te.
· Nu le pa, pi le pute khatpeuhpeuh, numei-pasal mawhna ana bawl ngei te ii suan le khak te.
· Amahmah ahl. a nu le pa khatpeuhpeuh pan Pasian teeltuam minam Israel/Judah minamte mawhsak in gensia-a a langpan ngei, a bawlsia ngei mi te.
· Nu le pa, pi le pute, pusawn sawnte khatpeuhpeuh khangah tualthat ngei mi te.
· Amahmah ahl. a innkuan sungpan ci le nam vai tawh kilawmlo taka a gamtang mi te.
· Ama pumpi taksa tungah khuaktanna giittanna ciaptehna lim a bawl mi te.
· Pasian dang khatpeuhpeuh ahl. milim khatpeuhpeuh tap/tam-a min kiphuak te.
· Amaan lo Pasian dang, pasian/nusian, hamsiatna, kamsiatna tawh a kiphuak min te.
· Kineih khemna, gawhna khatpeuhpeuh tawh kipawlkhop, sepkhawpna a nei mi te.
· Naupan tawh kibang-a lungsim ngaihsutna kilamdanna khantohna mel a nei theilo mi te.
· Zan ihmut mumang sungah ciin/zia khatpeuh a nei thei den mi te.
· Inmut laitak-a an ne banga kamthai thuapthuap ahl. hangawi ngamngam thei den mi te.
· Zan ihmut mumang sungah midang khatpeuhpeuh tawh omkhawm-in, nu le pa hihna a zangkhawm thei mi te.