Malaysia Prime Minister thakdingin Dr. Mahathir kiciamna neitading

Malaysia Prime Minister thakdingin Dr. Mahathir kiciamna neitading

Malaysia General Election ah gualzawhna angah ahi Tun Dr Mahathir Mohamad pen Malaysia gam ii Prime Minister thak dingin kiciamna neitading cih Bernama pan kiza hi. Tuni Thursday (May 10) nitak 9:30pm hunin kumpi innpi ahi Istana Negara ah kiciamna neiding cihi.

Dr. Mahathir pen Malaysia gam ii a 7 veina Prime Minister hiding a, tuaban ah Malaysai gamsung ah Prime Minister nihvei akiteelkik pen amahbek hipan hi. Abeisa Prime Minister asep masakpen 1981 kum panin 2003 kumdong hi a, kum 22 sungtak Malaysia Prime Minister asemkhin ahihi. Malaysia Prime Minister khempeuh lakahzong sawtvei ngei penpen ahihi.

Tuaban ah Dr. Mahathir pen kum 92 aphakhin hi a, leitung gambup Prime Minister khempeuh lakahzong akum atampenpen “World’s oldest Prime Minister” hiding hi.

Istana Negara Officer khatin Twitter tungah agelhkhiatna ah Prime Minister athak kiciamna pen tunitak 9:30pm in kinei tading hi ci’n gelhkhia hi.

Dr. Mahathir pen Istana Negara ah nitaklam 4:40pm in tungkhinta a, Yang di-Pertuan Agong Sultan Muhammad V tawh kimuhna neikhin uhhi.

Malaysia kumpipa omna Istana Negara kongkhak Gate maiteng ah tuni nitaklam 3pm hunpawl akipan Media leh Reporter tuamtuam te dimzihziah khinta uh a, Dr. Mahathir apanpih Supporters tezong dialkhai tawikawm in kigual zihziah uhhi.

Dr. Mahathir pen nitaklam 4:40pm hunin Istana Negara tungkhin a, Prime Minister kiciamna pen nitak 5pm hunin kineiding ci’n ki tangkokhia masa hi. Ahi zongin kisotto leuleu in, nitak 9:30pm ah neiding kici leuleu hi.

Istana Negara aom Gate 1 leh Gate 3 tepen ki khakcip in, mipi kuamah kilutsak vetlo hi. Tuaban ah kongcingding in Police te athuapthuap in dimzihziah uh cih kiza hi.

More: 2017 UK General Election ah Vote kipia ziahziah ta ~ Nantalsuan

Malaysia gamsung ah abeisa in kum 9 sung Prime Minister asem ahi Najib Razak zong Dr. Mahathir ii amakaih, apattahsa mah ahihi. Kawlte’n ih uikhawlsa in hong petkikthei acih bangdanin, apattahsa in petkik a, utbangin gamta ahih manin, Malaysia gamsung ah “Rule of Law” aomkik nadingin hanciamning ci’n Dr. Mahathir in Prime Minister atuh, akidem ahihi.

Dr. Mahathir ii kammal ahoih, athupi mahmahkhat ahihleh “thuhkik nopna, aphu lakkik nopna omlo hi, gamsung ah Rule of Law aomkik nadingin ahanciamnuam kahizaw uhhi ci’n genkhia hi. Christian te’n thuhkikna pen Pasian aa hi ihcihcihpen….. Sawltak #zomidaily