I Lungtang/sim Sang Lian Zaw ~ Rev. Zam Khat Kham

I Lungtang/sim Sang Lian Zaw (Greater Than Our Hearts)

Thu-ummite, Pasian i up khit, Zeisu Honpa leh Topa-a i san khit nangawn mah zong tamveipi tak, ei leh ei kimuang lo, cih bangin om thei a i lungsim khawng kisitteltel zel-in, i lung khawng kia huaihuai thei mawk hi. “Kei bel ahi takpi mah ka hi tam? Zeisu um ing, ka cih, ahi takpi mah ahi tam? Pasian’ ta takpi mah ka hi tam? Tu laitak Topa hong pai vat leh kei hong kila tam? Hong kinusia mai tam?” I kisitit hangin kitel thei tuan lo thei hi hang. I ungsim tawng i sittel hangin dotnate siang thei tuan lo thei hi.

Khamuanna i ngah nadingin i lungsim i kisittel leh bel mawhnei mi taktak i hih lam peuh kitel semsem lel ding hi hang. I lungsim in eimah hong mahsak/mawhpaih mai ding hi. I mawhna tampite khawng hong kiphawksakin i lung khawng kia huaihuai mai ding hi. A tawpna ah: Piangthak taktak ngap lo hi mai ni cia! cih ciang dong hong tun kha thei ding hi.

Tua bang hun ciangin Sawltak John in Khasiangtho humuapna tawh hong khamuansakna kammal khat i phawk ding kisam hi: “A hang in, i lungtang sangin Pasian lianzaw a, na khempeuh a thei hi” (I John 3:20 ZIV). I lungsim in sawm vei za vei a hong mawhsak phial zongin, i lungsim sung i kisitsit hangin khamuanna i ngah thei kei phial zongin, “i lungtang sangin Pasian lianzaw a, na khempeuh a thei hi” cih phawk gige ni.

Pasian in na khempeuh a thei hi, cih mawk bel a piangthak lo mi khat adingin patauhhuai peuhmah hi. Bangteng thei ahi mawk tam? A kisim zo lo i mawhnate khempeuh thei hi. Tua mawhnate mai nai lo ahih manin kiciamteh gige den laimawk hi.

A piangthak khin Pasian tate’ adingin in bel, “Ama’n na khempeuh a thei hi” cih thu bel lungnophuai mahmah hi. Pasian in bangteng thei ahi tam leh?

Pasian upna man taktak leh mihingte’ bawltawm biaknate a kilamdanna hih thu mah ahi hi. Pasian upna man taktak biakna ah Pasian in eite hong et ciangin singlamteh tung ah si-a sihna zo-a thokik Zeisu tungtawnin hong en-in hong mu hi. Mawhnei i hih lam hong thei lua mahmah, hong tel lua mahmah hi. Tua zah khat mah-in, tua i mawhnate Zeisu’ tung ah kisuan khin (Isiah. 53:6: I Pet:2:24; II Cor. 5:21) a, Zeisu’ sisan in i mawhna khempeuh hong sawpsiangsak khin hi (I John 1:7) ci-in hong mu hi. Zeisu’ sung ah i mawhnate kisiangsak khin-a, eite mi dik-in hong kiciamteh khin, cih hong thei hi (II Cor. 5:21: Isaiah 53:11; Gal. 2:16; Romans 1:17; 3:21,22:3,6,11; 5:1, 18; Eph. 2:8,9; ICor. 1:30).

Pasian in a theih hih thute hi. Pasian in a theih loh khak hun cih bang om lo hi. Eite in bel mangngilh pak thei zel hi hang; Pasian in mangngilh ngei lo hi. Meiivom kaii khatpeuh in nitang a liah pak bangin uplahna leh muanlahna khatpeuh in i lungsim hong buaisak thei kha ding hi. Ahi zongin tua meiivom kaiite in a tang tawntung Pasian’ itna nitang khuavak liah zo den lo ding hi.

I lungsim in hong mawhsak ciangin Pasian kammal mah ah khamuanna la tangtang ni. I mawhnate khawngin hong lungkiasak-in hong lungkhamsak mah hi. Ahi zongin Amah i up i muan nak leh cina mi khat tung ah i Topa mahmah in: “Ka tapa aw, lungkhauh in; na mawhnate kimaisak zo hi,” (Matthew 9:2) ci-a lungnopna a piak mahbangin, upna tawh amah muang ding hi hang.

Tua ahih manin, ka lungsim ahi a, ka ngaihsutna ahi zongin, bangkhat peuhpeuh in, “Nang bel a mangthang hi lel teh, a piangthak takpi zong hi kei niteh” hong cih ciangin, na khempeuh a thei Pasian in kei hong thei lua hi, cih thu ah lungnuam in. Amah na up takpi nak leh Amah sanga lian zaw om nawn lo hi. Dik hong tangsak Amah ahih nak leh eite’ lang ah hong mawhsak zo ding kuamah om lo hi. “Pasian in a telsate kua in mawhmat ding ahi hiam? Dik a tangsak Pasian ahi hi. 34A mawhpaihpa kua ahi hiam? Si bek tham loin nungta-a, a tho kik pa Christ Jesu, tu-in Pasian taklamah tu-a eite adingin hong thumsak hi. 35Christ hong itna panin eite kua in hong khenkhia zo ding hiam? Lungmanna, haksatna, bawlsiatna, kialna, silh ding kisapna, lauhuaina, namsaute in hong khenkhia zo ding ahi hiam? 36″Nangma hangin kote in ni thapai-in sihna ka maituah uh hi; gawh ding tuute bangin kote hong kiseh hi,” ci-a kigelhsa bangin, 37hong khenkhia zo kei ding hi. Hihte khempeuh ah eite hong it ama tungtawnin gualzote sang i gualzo zaw hi. 38Ahang in, sihna le hinna ahi zong in, vansawltakte le dawite ahi zongin, tu hun le tu nung ciang ahi zongin, vangliatna khatpeuh ahi zongin, 39a thukna le a sanna ahi zongin, a kipiangsak nate khat beek in i Topa Christ Jesu sunga om Pasian hong itna panin hong khenkhia zo kei ding hi, cih ka kipsan takpi hi” (Romans 8:33-39 ZIV).

I lungsim in a tawntung Suangpi ahi Zeisu Khazih man kha khin, lenkip khin-a Amah “i lungtang sangin lian zaw” ahih manin lungmuang takin om ni. Ama’n na khempeuh thei hi. “Keima’ a hi teh, hotkhiatsa hi teh” hong cih khit nak leh lunghian nading om nawn kei!

Rev. Zam Khat Kham