I kizat theihna kibanglo hizaw ~ Dong Mung

I kizat theihna kibanglo hizaw ~ Dong Mung

Khatvei Heipi (Singphuk, Sing-eh/ekna kizang) in Teempan (Muukmul, Khamul kiatna kizang) kiangah, “Lawm Tempan aw, nang bel hiam mahmah diildeel napi ci’n kei zahin kizang thei lua kei maive teh aw,” a va ci hi.

“Kei kizang theilo ka hihleh nang bangteng in kizang na hia lawm,” ci-in Tempan in a dawng kik hi.

Heipi in, “En ve…Kei pen Singkung lianpipite phukna, Singkhuah, Singtumte ehkhapna cih dan a tuamtuam tampi om! Tua ka septe lah mihingte ading phattuamna a pia vive hilai,” a ci hi.

Tua ciangin Tempan in zong, “Lawm aw, kei zong ka septheihna hong gen ning maw… Kei pen nang danin Singkung, Singkhuah phukna, ehkhapna cih danin hong kizatloh hangin mihingte maitang tungah a po a mel uh a siasak zo phial muukmul, khamul cihte kiatna in hong kizang hiven. Kei hong zangin a muukmul khamulte hong kiatkhiat uh ciang mi pawlkhat bang hong melhoih tuam phial aive. Hong genbeh laileng muukmul, khamul bek hilo in pawlkhatte bangin a pumpi mun tuamtuam a multe kiatna khawngin hong zang thei lai hi ei,” ci-in a dawng hi.

Tua ciangin Heipi in, “Himah mawk ei mate lawm Tempan, nang pen na hiam mahmah hangin sing phukna, sing-ehna in hong kizanglo a, kei zong khauh mahmah in ka om gemgam hangin mukmul, khamul kiatna in hong kizang theilo… Ei mun tekah kimanna le thupitna lianpi a nei tuak hihang ei mataw,” a ci hi.

Tempan in zong, “Himah ei lawm Heipi aw, ei hihna ciat pan mite phattuam nading sem toto ni. Kei a lian, a thahat ci-in a thanem, bangmah theilote va neumuh nawnlo in nungta kalsuan ni ei,” a ci hi.

Lungngaih ding

Makai ihih manin nautangte va mawk neumuh ding hilo hi. Mi khempeuh in amau mun ciat ah thupitna nei hi.

I hauh manin mizawngte va simmawh pah kei ni. Mi khempeuh in amau mun ciat ah thupitna nei hi.

Na siam manin a siamlote va simmawh kha ken. Mi khempeuh in amau mun ciat ah thupitna nei hi.

Na ginat manin a ginalo mite va neumuh kha kei in. Mihing khempeuh in eimau mun tekah thupitna kinei hi.

Heipi khauh in a tak mahmah hangin mukmul, khamul kiatna in kizang theilo-a, Tempan a hiam mahmah deeldaal hangin singphukna le sing-eh/ekna in kizang theilo hi.

I kizat theihna, i thahatna, i siamna, i hoihna kibanglo bek hi-a, mi khempeuh in eimau mun ciat ah thupitna kinei hi.

Tua ahih manin Heipi bangin a thupi a nasia mahmah a khauhpai munte ah hong kizang kha kei phial zongin Tempan bangin kuama phawk khakpih khollohna mun ah a thupi mahmah nasep a sem na hih manin lungneu, thanem kenla, maitai takin mainawt lel in… Lungdam, Dong Mung