Zomi leh UN, Zomi leh Haksatna
Malaysia UN Refugee thuthang hangin mi tampi lungsim sukha hi. Gamdang
apai sawm, a ut khempeuh mabingta ding aive maw cih ngaihsutna tampi
lutman hi. Hih thu hangin mun tuamtuam panin thungetna zong nidang
sangin khauh semsem zaw tawh ki bang hi. Haksatna tampi ki tuak in ih
om laitak in bang teng ih lungsim ah hong lut man hiam
cihleh…Malaysia Zomite sungah…
1. Sum hoih tak in thalawh ding, hanciam ding
2. Sum khol kihkeih ding
3. Kawlgam, Zogam ciah ding
4. Zogam puah ding, zuun ding
5. Sum mawk zat nawnlo ding
6. Sum cil bawlta ding
…..cih bang tuamtuam ih lungsim ah hong lut zangh zangh hi. Haksatna
in ih lungsim hong phong suak ahih manin eite adingin ahoihzaw Pasian
in hong geelsakna thu ging khat in ngaihsun ing.
Gamdang a tungsa Zomiten zong hih Malaysia UN thuging hangin kei, ko
innkuan USA a mawk tun hi kei ve ung ee. Pasian hong angvanna taktak
hi veh ee ci-in Pasian hoihna muhlawh kha thei hi. Gamdang khat
peuhpeuh ih tun theih khawng a ngeina bangin mi tampi in ngaihsun
mawkmawk ihih manin Pasian in hong vikzek hi kha ding hi.Zomite thupha
ih ngahteh a sawtna ah a ngeina bangin ki ngaihsun kha thei hi. Ei bek
hikei Israel te zong Pasian in om pih in Thupha a ngah ziahziah laitak
in tua Thupha a piapa phawk kha nawnlo in a ngeina dan khat ngaihsutna
hong lutteh Pasian in na vikzek zel hi.
Sumkhol ding, ka ciah kikleh sum hausa in ciah kik ning cih lungsim
ih neih teng zong manpha sa ing. Tua ahih manin Haksatna zong Thupha
khat in ngaihsun ing. Haksatna awging hangin gamdang atungsa leh a
tung nailo ten thu khat peuhpeuh ah Pasian geelna ahih lam ih tel
semsem nang thuging vat zong hi thei hi. Tua sangin haksatna awnging
hong gin ngaihzaw leh bang zahtak in Pasian phatna awging ngaihzaw
ding ahihiam cih ngaihsun ing.
Malaysia aom Zomi khempeuh USA nong tun kimzo kei phial zongun gam
thupi khat peuhpeuh a tung pelmawh dingin kong um hi. Ahi zongin
gamdang tunding tupna a neih takpi kua teng cih tuteng thupiang hangin
ki tel kha thei hi. Thu ging vat hangin ciah ding a khensat vat teng,
na ciah kha thei hi. Thu haksa om mahta leh Pasian in ka tupna hong
tung sak ding hi cih up ngamna a neih teng tung takpi dingin ka lam-en
hi.
Bangbang hileh ih vai khempeuh ih tang tung sak ding ei khut sungah
omlo aa, ih sep zawh tantan lung kialo in ih sep nakleh ei te adingin
hong lung hih mawh den, hong it Pasian in hong a hoih penpen ding hong
geelsak den hi cih phawk semsem ing. Lungdam.
Thawn Tuang
April 28,2015
Comment piaknop aomleh...