Khitui Gospel hunsau cialpi zawhna leh lungdam kohna

Khitui Gospel hunsau cialpi zawhna leh lungdam kohna

1. Khitui Gospel Hun sau cialpi lawhcing takin hong zosak Topa’ hehpihna i phat masa hi.

2. A gamgam panin thungetna ah hong phawk khempeuh tungah lungdamna lianpi i ko hi.

3. Thatang tawh hong huh thugente, Siavuan, Siamate, zanhak khangnote, anhuante leh sum leh paai tawh hong huh khempeuh tungah lungdamna lianpi i ko hi.

THU PIANGTE

2023 November 23 ni pan 27 kikal zintunpi hun hi a, India Lamka leh Kalaymyo kikal khua 37 panin hong kipai ciat hi. Zatui kham, zu kham sa vive-in hong tung uh ahih manin vaitun phet mahin buai kipan pah hi. A kum tawm pen kum nih panin kum 70 ciang ki-om hi.

GIAHNA KICING ZOLO

Upmawhna sangin mi kitamzaw ahih manin vaitun ni a kipan maandat kilam beh toto hi. Guah hong zu sawnsawn ahih manin zanpuan pawlkhat kawt gawp hi. Cina gim sia ki-omlo ahih manin Topa in hong kem mahmah hi.

SIBUP LEU’LEU’ UH

Zatui leh zu kingawlsak ahih manin tukin sibup lianlian mawk uh hi. A leei uh pettan kha leh cih launa tawh a tuk peuhpeuh a kam ah sikkeu kiguang pahpah ahih manin sikkeu hon khat kisia hi.

Papi khat, a ding kimlai thakhatin kipei-in leitang kisatna ahih manin a kam leh a nakvang ah si luang, sauveipi a mit kuam dupin bawk niiuniau mawk hi.

Zingsang nai 4:00AM hunin Singlamteh phungah khat na tuk mawk a, thungen ten na mu bilbel ahih manin Siavuante na sam uh hi. Topa hehpihna tawh i zawh kuan ciangin sibup nawn lo hi.

TUI KICING LO

Nasem teng tawh kigawmin mihing 200 kim kiom a, tui kicing zolo ahih manin mawtaw tawh tui kitawi zel hi.

ACCIDENT TAM SESE

1. Tui tawi dingin khuamial zulin ka pusuak a, Cikha a ka lawmte khat Tonzang lam pan a hong ciah tawh kinawk kha, a Cycle hekna teng kitan mang hita leh amah bangmah cilo ahih manin Topa hehpihna i phat hi. Lamkawi a kituak amah kawilo mawk ahih manin mawtaw nungpei hong taih kham zawzen hi. Ama mawhna ahih hangin a cycle lim takin a puahsak kik hi.

2. Behiang panin Itna innpi ah van kisam puak a hong paite a ciah lamun cycle leh cycle kiphu kha uh a, liam khol lo napi uh, a cycle uh kisat siatsak gawp ta leh thuk lo lel uh hi.

3. Behiang panin anhuan huh ding a hong kuante a ciah lam ciangun accident leuleu uh a, nak liam ahih manin ICU tung liang hi.

4. Tedim panin van kisam puak a hong paite mawtaw accident uh a, pi 100val kiasuk himah leh a si om lo hi. Hong kem Topa min i phat hi.

INDIA LAM KHA TATE HANGIN

India lam a kha tate hong hanciam mahmah uh a, kuang leh keu, um leh bel, niangtui hai cihte mi 200 zat ding hong leisak ziau uh ahih manin van zat kicing mahmah hi. Amau tungah lungdamna lianpi i ko hi.

PASIAN MIZATTE HONG PAI KIM THEILO

I gam buaina leh lam kikhakna hangin speaker dingte team 4 hong pai theilo uh ahih manin ngap lopipi mah ka awng kaikai teitei hi. Agape team – Evan. Gideon Thawnpite leh Emmanuel team – Evan. C K Khamte hong pai thei uh a, Pasian in zang mahmah hi. Evan. Khen Suan (Mualkawi), Rev. Haupu (Suanghoih) Evan. Mungsan (Taang sinlai) Evan. Niangleuhte in thugen hong huh thei uh ahih manin amau tungah lungdamna lianpi i ko hi. Music hong tumsak Cyi Mung leh a lawmte khempeuh tungah zong lungdamna lianpi i ko hi.

KILAWI NGEILO

Tedim, Tonzang, Cikha panin Siavuan Siamate kilawi ngeiloin Itna Innpi ah nih ta hong om den uh ahih manin amaute leh a vaihawmte tungah lungdamna lianpi i ko hi.

124 IN GUALZAWHNA LAIPI SANG UH

Camp lutte tampi in daikanin taisim uh a, mawtaw tawh delhin kila kik zel hi. A ciahsuak veve zong tam khop mah om hi. Mi 169 a lut hi a, mi 45 pen dam loh man a ciah leh dai kan a taisim uh ahi hi. Dai kante zong a hoih suak om dingin i lamen mahmah hi. Mi 124te tungah 2023 December 28 nitakin GUALZAWHNA LAIPI kipia thei hi. Khua ciatah kumthak zang nuam uh ahih manin December 29 ni-in a tamzaw ciah phot uh hi.

ITNA INNPI KIBEHLAP

I pankhopna Topa in thupha hong pia mahmah hi. Itna innpi ah kita zolo ahih manin tuin a lui cia lian kibehlap to hi. I lawmte mawtaw bawl siam, mawtaw hawl siam, lettama siam tampi om uh ahih manin a ciah ma-un mawtaw tawh ansing vial thum hong puaksak uh a, gamlak a sing atsa teng zong hong nawnsak khin uh hi. Itna innpi behlapna zong sikkang gual nih khen man uh hi.

KIPAT KIK HUN DING

Tuni-in nupa kop khat Itna Innpi ah hong hawh uh a, “Ka tapa hong koih nuam lua ung, banghun ciangin kipan kik ding ihi hiam?” hong ci uh hi. Mun tuamtuam panin zong online tawnin hong kidong ciat hi. Tulaitak a i lam innpi i zawh siang peuhpeuh ciangin Sia Do Khup Facebook panin kong tangko kik ding uh hi. Tulaitak bel inn kilam saan ahih manin kuamah kilutsak nawnlo phot hi.

UPNA GAH I MU HI

Bangmah om hetlopi, Topa’ sawlna tawh i kipan a, khuahun siat pen laitak van man tam pen laitak hita leh Topa in hong zawhpih ta hi. Bawng leh vok kigo ngitngetin meh lim tawh Topa in vak mawk hi. Cialpi sunga nasep hong huh i lawmte tuni ciah uh a, Itna Innpi pan Kalaymyo ciang mi khat mawtaw sap Ks.150,000 himawk hi. Hih zah a, van man a san laitakin nasem teng tawh mi 200 kim ii nek ding hong sik Topa hehpihna i phat hi. Sia Do Khup