Hunhoih (Appointed Time or Opportunity)

Leitungah mikim in khangkhat nuntakna ah nuntakna dingin hong lamdang sak hunhoih (chance) thumvei tek kingah hamtang hi. Tua thumvei sungah khatvei bekbek namat khak leh mi thupi nasuak zo dinghi. Tua banah thumvei bupin namat khak leh mi thupi mahmah nasuakzo dinghi.

I gentheih zel aom mah bangin, hun in mihingte hongngaklo a, mihingte in hun kingak theizel hi. Mihing tektek sung panin gualtung vabang atuang zaw deuhte ih et tak teh, hun zatsiam mite ahi uhhi. Hunhoih pomsiam in, zangsiamte pen midangte’ nuai ah om ngeilo limlim uh cih dinghi.

Kawl ten paunak nanei uh a,

1) Khangno lai pilna zong,
2) Pilna dawntuai tunteh hauhna zong,
3) Pilna leh hauhna zon khitteh Pasian ading piak khiatna tawh sem ci-in paunak nanei uh a, tua tawh kipantah ngiat uh ahih manin, Kawlte tampi pen hih vision lianpi tawh hong sangkah toto semsem uh a, ei Zomi te bangin Kawlte iphak zawhna aom sam hangin, mun tampi ah etteh huai mahmah uhhi.

Kum 32 ciang peuhmah Sang kah in pilna sin tinten lehang hoih kasa hi. Kum 20 ma peuhmah in Tan 10 kizo limlim dinga, Kum 4 sungin Bachelor, Kum 3 sungin Master, kum 5 sungin Ph.D kitung man hi. Tua hileh kum 32 bang kiphato ta hi. Hih pen aziakai pawl dinga kasansat hilai hi.

Kum 33 panin kum 60 kikal sum zonna (kumpi nasep, private nasep, sum khuambul tawh nasep) tuamtuam kizongto henla, kum 60 ih cinkhit ciangin, bangmah sem nawnlo in, utna peuhpeuh, ut bangbang in tawldamna tuamtuam ah kitawldam sak ding, ki lungnuam sak hithiat dinghi.

Zi le Pasal:

Pilna sin a maban neite in, Master level peuhmah atun masiah zi neih huailo hi. Ahi zongin, numeite inbel Bachelor a tunzawh ciangin pasal neih ding hoih hi. I minam sungah Personal Time Management ih neih loh man or ih ki lamlah loh manin, nam dangte nungah kipai dialdial hi.

Minam nasepna pen ih om muan muntek panin kisem theilua hi. Kumpi nasem khat nahi a, biakna nasem khat nahi a, political party, bussiness leh ih ankuang ading nasep kawmkawm in Minam kipawlnate tawh khut kilen in kisem kawmkawm to thei lua hi.

Gentehna in,

I ngah sum (income) sung panin, minam ading mapanna ah ih lunglutna panmun khat ah minam adingin, % hiam khat kipia thei hi. Education lam maw? Nopna dahna lam maw? Political Party lam maw? Nang lungtun zawkzawk na ah ki mapang thei lua hi.

I minam sungah kipattahna leh kithapiakna lamah pilsinna pen kinelh siahlua mahmah ahih manin, Zomite pilna lamah kituantual lua in, mi nuai ah General Worker in ki om hi. General Worker panin General Management ih tuntoh zawh nading lampi leh mapankhopzia pawlkhat mailam ah aban zomto lai ni.

I khan sungah Chance hoih 3 tengzong goal tunzo nailo ihih manin, mailam ah zoptoh pehtoh laidingin koih phot ni.

Dal Sian Hung
Kuala Lumpur, Malaysia.