Hun paisa Zomi, tuhun Zomi leh maban ~ B. Muan Ngaihte

Hun paisa Zomi, tuhun Zomi leh maban ~ B. Muan Ngaihte

A masa in Zomi te hiciang hong gualzawhpih leh hunhoih hunthak a hongdinpih Ibiak Pasian min kaphat masa hi. Zomi ka iitna leh Zomi maban ding kaveina tawh Article bangzahhiam kana aat ta hi. Keimah pilna leh siamna hang hilo in Pasian in Zomi leh Zogam iitna lungtang ahongpiakman ahi hi.

Tuamahbang in Tuni inzong hiai ah HUN PAISA ZOMI, TUHUN ZOMI LEH MABAAN cih Thulu pansan in kalungtang ah alian mahmah thu hong om ahihman in Zomi khempeuh te’n i simtheih ding in hong aat ingh. Vai khempeuh ah maban igenciang in ihun paisa zong genkul a, ih tuhun dinmun zong genkul ahihman in tuate tamlo kikum diing hihang.

1 . HUN PAISA

Nidang inzong kana gensa mahbang in Zomi tepen Gam 3 (Thum) Myanmar, India, leh Bangladesh ah khenzaak in Gamgi te in honghal in ina om uhhi. Ngeina kibang, Beh-le-Phung kibang himahlehang mituamsatuam kisakna lianpi ana om hi. Hun sawtpitak sung midang kisakna ilak ah om in, Gal kido aa kithat ihih buanglohhang, ki iit leh kingaihna ana om hetlo hi.

1960, 1970, 1980 cih kiim pawlbang India Zomite Kawlgam paileh kiheek in kimansak, Kawlgam Zomi te India hongpaileh Gamdangmi ci in heek in kimansak tangtang mawk hi. Ka ngaihsut ciang in ei pianma thu himahleh na kasa a, ka mittui aluang hi. Tuahun te in apil leh Unau hihang a cithei diakte bang in Laa tampi ana phuak uh a, ana sa ngeingai uhhi. Tuate lakpan kadeih mahmah khat ZOGAM VONTAWI TANGPA KAHI cih ahi a, Pu TS Khai in 1984 kum a ana phuah ahihi. Aphuahna san pen amahmah in honggen ahihman in nhonggen diing hi’ng.

Kum 1984 ahi a, Nuntak haksatna hang in Galkaap Boot (Khedap) gialte zuak diing in Kawlgam pan in Behiangzang hongtung hi. Himahleh aman Unau, Beh-le-Phung khat, Zomi suangtu khat ci a a ki innteksak mahmah lai in Sanggam pawlkhat in GAMDANGMI ci in heek in Police te namansak uhhi. Tuahun in Manipur Khuapi Imphal ah Jail (Suangkulh/ Thong) nakia hi.

Tuapan ahong pusuah ciang in a ngaihsutna ah “ Zomi hihang a, suangtu khat, Beh-le-phung khat hibuang, Saklam te Kawlgam hongpai leh kimansak, Kawlgam lam a te Saklam paito leh kimansak….. Zogam-Zomi I cihcih hang Zogamleitang ah Mun a kineilo himawklo hiam, Vasa in Bu nei, Ke’n Zogamlei ah Bu neilo, Zusa in kua nei, ke’n kua neilo….. Kuahiam a hongkhen tu…… ci in Khasia mahmah in ana phuak hi….

ZOGAM VONTAWI TAANGPA

1 . Zogam Vontawi Taangpa kahi, kei kadual ngeilo. Hongkuailo aw sengual tam aw, atan ngeilo diing hi’ng. Puanbang keeksa Zogam tunnu a kiphotkiik mateng…

Bu-aal zong khuangkhuang ta e, Taikhua vaaldek zong Zogam leitang ngahkiik mateng Khawllo ding Zogam Vontawi Lia-le-Tang

2. Van a leng Vasa’n zong Bu nei, Ke’n Bu nei nailo. Lei a tai Zusa’n zong Kua nei, ke’n Kua nei nailo. Tang kei sinlai ah nalua e, kua’n gibang hongkhen…!

Hidan a kimansak a, kiheek a ina omlai un, Unau ihihna,Sisan khat ihihna pen ipaai theikei a, Pasian in Unau ihihna te awlawl in hong kitelsak hiaihiai hi. Lungdam huai mahmah hi.

2. TUHUN

Kum bangzahhiam paisa a kipan in iciding a , adiak in ZNC hunlai a kipan in India Zomite lak ah Zomi a khanlawhna thupitak a hongom hi. Tuahun a kipan in Unau ihihna te hong kitel hiaihiai in, damdam a kikawm in I om uhhi. Nidang 2000 Kum kiimpawl bang in Ka Khua ua’h Kawlgam Zomi sumbawl honkhat hongpai in, ka inn bang uah hongtung in, Tape Record te hongzuak, Van tuamtuam, Beelpi cihte kileizel hi.

Tuahun ciang in naupang mahmah lai kihi mahleh thu kithei uut mahmah a, Kawlgam ah na BEH uh Ngaihte Beh, NAulak, Samte, etc te tam mahmah hi acihciang bang un BEH a lunglut kihikei mahleh neu apan a Zomi haicilh khat akihihna ah Unau ihihna te naupang lungsim ah kitel mahmah in, “KHATVEI BEEK TEDIM KAPHA TEITEI DIING” kaci hi.

Hun hongpai in, Naupangcik himahle’ng 2012 Kum in TUITHANG Khua ah NGAIHTE Beh Khawmpi omding acihciang un, Ka ute khat in hongzawn a, Keizong Kawlgam munuam kahihman in BEH pen thutuam hileh LAIZOM ZOMI TE LENNA ci in 2012 Kum in Tamu tawn in Kana pai uhhi. Tuahun ah Kawlgam pen Galkap ki ukna a khauh mahmah lai ahi a, Pasian hehpihna tawh senpyi kawikawi in Tuithang kavatung a, AG Pawlpi Crusade omlaitak anahi a, Sanggampa Kapno hongzotna tawh Laa bang kavasa hi.

Thu tampi telkei mahle’ng Zomi te thupina kavamu hi. Hun honpai in Zomi tawh kisai ah tunitan in Kawlgam Zomite ii omna I Zogam leitang 6 (Guk) vei bang kapaita a, thu pen ka tel ciauciauta hi. Ka ngaihsun a Zomite nidang hun a ina kimatsaksak uh khawng haihuai hina e kaci hi. Kumpi te in hongkhen sawm in, Ikiim Ipaam a pawlkhat in khenzak teitei hongsawm mahle uh, INTERNET tungtawn te,Social Networking te in Ih La ate, Thu te, Ngeina te kimutuah in khat ihihna uh kuamah in hong khenzo nawnlo a, KIMATSAKSAK HUN PEN BEITA HI.

Nungkum masa bang in Lamka ah 3rd World Zomi Convention thupitak in kibawl in, Kawlgam pan Zomi tampi hongpai in nuam mahmah hi. Nidang a mang a zong imat khakloh, hithei ding a zong ingaihsut ngeiloh uh Zomi te kigawmna hongtungta hi kaci hi. Pasian in Zomite hong iit mahmah ahihman in I kikhen ding uh hong deihlo in damdam in honggawm hi kaci a kalung adam hi.

Tuaban ah kalungdamna mahmah khat leuleu ah zanzek a ih Zomi Khuado Pawi, Kawlpi a zatna ah LAMKA pan EBC Lamka North Division Choir leh Soloist bangzahhiamte bang hongpai aa hun hongzat uh kamuhciang in ka mit ah kipahna mittui aluang a, nidanghun te hong ngaihtuahsak a, Pasian tate ki iitna hidan ahi maw, Pasian tel minamte ihi taktak maw ci in kalungdamna Pasian kiang kanatun hi.

Tuate lak ah lawmte atelkhate kiang ah, Bang aci a, anuamhia? Kacihciang bang in , “Nuamlua, zinkhakloh ding kalau, I sanggamte in hongngai in siam mahmah uhhi. Leitung ah Zomite mi maimai hilo ihihna kamu hi” hongcihciang bang un KA NUI PEEKPAAK hi. Pasian kiang ah kathum a, Topa Zomi ka iitna tawh keimah meetna diing enlo a,Nongpaisak a, Nakiang aa thu kongngette leh koimun koimun a om Zomite in thu kongngette uh guaksuaksak lo a, hongdawng nahi maw Topa…… Unau nonggawm ta maw ci in Lungdam kako hi.

Hun paisa a Pu Thual Zen, Pu Tunkhopum Baite, Pu Chin Sian Thang, Pu Gougin Tungnung, Pu Thang Khan Gin Ngaihte, Pu Lalneihthang Hatlang, Pu Thanglianpau, Pu Laldenga, etc te in ZOMITE kigawmna ding a Tha-le-zung, Sum-le-pai, Khua-ul sisan kailiang a ana gente uh Pasian in hongtangtungsak ding hita e kaci a kalung adamhi. Makai Phamsa te zong alung uh adam mahmah ding kaci hi.

3. MAILAM AH

Tuniciang in Pasian in Kawlgam Zomite kiang ah 6 vei hongpuak in, kaneu apan ka mangmat phakloh Singapore, Malaysia leitangte ah hongpuak in Imi-Isa telak ah hongzang mawk a, hampha ka kisa hi. Tuni in ih omna atuam dungzui a Pau awkaih tuam zekzek, Min lawhdan tuam zekzek tezong Zomi I iitna tawh kuamah deidan lo a, Zopau ahi, Zolai ahi icihtheih ding thupi kasa hi. Mangkangte bang ih etleh BRITAIN leh AMERICAN te pen a Pau uh kibang hetlo a, English hi veve hi.

Tuaban ah Khawvel pen khangto zel ahihna ah, Media bang hat mahmah in, Pawlkhatte bang in I Zomi sung a Awkaih khat thupisak nopluat hang a Zomi iit kingeih a Kampau awkaih atuamzek Imi te ko leh gensiat a ciing mahmah tampi ki om a tuazong I ciinloh diing kadeih hi. Media pen zatkhialhloh a Zomite kigawmna ding a zatdiing kadeih mahmah hi.

Mailam I kalsuan zelna ah I kibatna te thupisak a ikibatlohna tawmcikte gengen nawnloh kadeih mahmah hi. Tuaban I makaihna ah zong Mite ettehtak ding a om a, Mi khat I muhdahman a, amah kihelna bup pawlpi bang ilangpan hetlohding kadeihhi. Mihingpen ituam bang in I ngaihsutna tuam a, igeelna tuam hi. tuate kitheihsiam mahmah diing hoih hi.

Tua ahihman in bangcileh ka Zomi ka gawmkhawm seem theidia, bangcileh Zomi a diing in Nnahoih kasemtheidia cihpen lungtang ah neitek lehang kadeihhi. Mailam Zomi kalsuanna ding khempeuh pasian aap in, Pasian muang in taisan ngeikeini, tuaban ah mapangkhawm semsem ding in Zomi te hongcial ingh. Lungdam, B.Muan Ngaihte Kuala Lumpur, Malaysia (Tawmvei)