Hun nunung leh siatna

Hun nunung leh siatna

Laisiangtho in hun nunung ciang leitungah siatna tampi piang ding cih gen khol hi(Mt.24:1-44, Lk.21:7-19).Hun nunung ciapteh nate pen a tangtung hi ta hi.Tua ahihmanin leitung hun bei ding nai mah mah ta ding in ummawh huai hi.

Leitung hun nunung ciaptehna te gen khit zawh ding hi lo hi.Leitung hun masa lama om ngei lo hun nunung a siatna leitungin a buaipih pawlkhat gen dih ni.Ozone Layer kekseu ahihmanin kidah mah mah hi.Ozone pen oxygen namkhat ahi hi.Ni leh lei kikal tai(mile) 6-30 kiim a tuam huih ahi hi.A lauhuai nizung (ultra violet ray), ni pana direct a leitunga pai pen Ozone in na dal gige hi.Mihing leh khaite kitangsap zah bek pesawn zel hi.Kum 1985 in leitaw lamah Ozone kikek cih kithei hi.Tua khit a sawt lo in leilu lamah zong kekseu(vang) cih kimukhia kik hi.Phawp(bawlphat) theih lah hi lo ahihmanin dah huai mah mah hi.A ki kekna vang lian sem sem ci zawmah lai hi.Hih Ozone pen meikhu(smoke) lam effect hanga kekseu ahi hi.Ozone hong kisia takpi leh nizung pen a dal om nawn lo in direct in leitung hong tung ding ahihmanin kuaman thuak zolo ding hi.

Aksi them lamkhial(lampial) ten zong leitung phukha thei ding cih ki thei hi.Asteroid leitung sanga lianzaw pen 8,000 bang om hi.Hih te amau leh amau ki phukha le uh zong leitung adingin lauhuai veve hi.Tuabanah leitung phukha dek dek ngei zel uh hi.Leitung phu kha lian leh siatna lianpi a tung ding hi mawk hi.Kum 1989 March 23 in zong aksi them khat in leitung phukha dektak hi.Tuamah bangin kum 1992 December kha in zong phukha dektak ngei hi.Leitung hong phut khak ding lauhuai mah mah hi.

Leitung hun masa lam tawh the in hun nunung pen lum sem sem ta hi.Leitung a lum sem semna pen a hang tuam tuam om hi.Tuate’ laka khat pen singkung lopa atawm man ahi hi.Tua khualum(Global Warming) hangin kial(famine) zong tung thei hi.Khualum na hangin tuilu leh tuitaw a vuukkhal te tuisuak thei in tui khang(flood) ziau thei hi.Mihingte teenna mun tampi tuipi(ocean) sungah tum thei ding hi.Tua bek tham lo in khuahun(climate) pen pongman lo mawk hi.Climatologist te natawm in climate predict dik ngei nawn lo uh hi.Khuahun a pongman loh man in buh leh khai a piang ding zah piangzolo in lonei mite adingin lungkhamna lian mah mah khat ahi hi.

Leitung hun masa lam sangin tuhun ciangin huih siangtho nawn lo zaw tham hi.Bang hang hiam cih leh meikhu tuam tuam tam lua ta hi.Tua meikhu te in guah thuk(acid Rain) piangsak thei hi.Tua acid Rain pen mihing leh khaicin te adingin hoih lo mah mah hi.Huihniin in haak(lead) piangsak in tua in sisan sang(High BP) tamsak hi.Hun khat khit hunk hat lei pen da sem sem hi.Kumsim in sehnel gam kibehlap zel hi.Laisiangtho in mun tuam tuam ah ziin liing ding(Mark 13:8) a cih zong tangtung ta hi.

Leitung ah aki damsak thei lo natna a tung ziau thei nam 13 kiim om hi.Tua te Ebola, Marburg, Junin, Sabia, Oropouche, Yellow Fever, Rift Valley Fever, Machupo, Lassa, Dengue, AIDS, HTLV leh Hanta ahi hi.Gamkhangto USA bangah kumsim AIDS hanga si mi 179,000 om zen uh hi.Leitung pilna leh siamna tawh natna pawlkhat ki damsak thei zel mahleh, aki damsak thei lo natna dang hong piang zel hi.Laisiangtho in hun nunung ah natna hong leeng ding(Luka 21:11) a cih pen hong tangtung takpi hi.Mun tuam tuam ah kumsim in kial a tung den hi mai veh aw. Africa gam Mali khua bangah Kauphe(Locusts) 12 bek in Vaimim leilet Acres 2 a za ni khat sungin ne gai zen uh hi.

Leitungah kum 6,000 sungin leitungah ki dona 14,500 vei om khin zo hi.Kidona hangin mihing million 4000 kiim si khin uh hi.Gam leh gam kidona bek tham lo in nam leh nam kido ding laisiangtho in ci hi(Mark 13:8).Manipur lam eimite zong i sanggam Thadou ten kum 1997 in na buaisak gawp ngei uh hi.Hih zong Laisiangtho genkholh a tangtunna khat ahi hi.Leitung hun bei kuan cianga thupiang ding lakah patauhna(terro/fear) zong kihel hi(Lk 21:26).Mi gilo leh misia tam ta ahihmanin patauhna/lauthawnna tuam tuam in leitung hong umcih ta hi.

Leitung siatna kawmkalah Pasian a muangte Zion mual bangin liing ngei lo ding hi.Pasian thu um mite adingin bangmah patauhna om tuan lo hi.Pasian a muangte lui geia singkung bangin gah zel ding hi.Nang bang dinmunah na ding hiam?Leitung siatna te a lau den thu um mi peuh na hi kha hiam?Pasian adingin piak khiatna tam sem sem napi a sunglam ah launa a nei kinken lai mi pawlkhat om hi.Tua bang mite Satan in maingap se hi.Pasian a um mite kip ding, lau ding om lo hi cih laisiangtho in hong hilh hi lo ahi hiam?Pasian thu ah a kip kho tawntung dingin laisim mimal kim Topa’n thupha hong pia ta hen.

N. Pau Tun Thang