Hun hoih lai ~ Michael Pau

Hun hoih lai ~ Michael Pau

“Hun hoih lai-a pek 20 tawh ka lei hiven, to mahmah hiven”…., “hun Hoih lai – in van man ol in, nuntak nuam mahmah…. . ” cih kammalte i nisim nuntakna kimlepam ah i za thei zelzel hi. Ka neu lai-in tua “hun hoih lai” cih kammalte ka zakcil pan kipan tuni dong “hun hoih lai” a cih pen bang hun aitam ci’n ngaihsun zelzel in, tua “hun hoih lai” a cih hunin pianga, akhangkhia hi leng kei zong val man ol nono tawh lei thei in, nuntak nuamsa mah ding hi veng maw ci’n ka ommuanin ka lungngai thei zel hi.

Hun hoih lai i cih huna nuntak ding ka lunggulh mahmah hi. Kumpi ki-ukna tawh kisai ding maw? Leitung sumbawlna hun luanzia tawh kisai ding maw? Pasian thu tawh kisai ding maw? Tua “hun hoih lai” pen bang hun hi-a, bang tawh khentel ding i hia?

Tua tawh kizomin “hun hoih lai” pen bang hun hi ding hiam ci’n ka ngaihsutsut ciang, hun tampi ka mukhia hi. Hun tampi cih sangin HUN KHEMPEUH pen HUN HOIH ahih lam ka mukhia hi. Ei Zomi dinmun pan kumpi ki-ukzia tangthu bulphuh in enpak leng, Mikangte hong ukma, kua ma khutnuai ah omlo in, ei le ei akhua akhua ah ukpite tawh suaktataka ki-uk hun (1896 ma), Mikangte hong uk hun (1896-1948), Suahtakna ngahkhit U Nu uk hun ci main i (1948-1962), atel baih dingin Ni Win uk hun (1962-1988), Galkap kumpi uk hun (1988-2010), tu in U Thei Sein Uk hun (akl) Democracy hun cih dan in kikhen thei hi.

Tua hi-in “hun hoih lai” a ci thei zel, i pu, i pa, i u-te tuakna/thuakna (experience) te ka etkak ciang, ei le ei ki-uk hun le Mikangte hong uk hun atuak khawmkha i pute in, ei le ei ki-uk hun pen “hun hoih lai” na cikha thei ding uhi. Bang hang hiam cih leh i pute in “hun hoih lai acih hun pen Mikang kumpi hong uk hun na hih tuak hi.

Amau adingin Mikang kumpi uk hun pen “hun hoih lai” hi-a, suahtakna i ngah khit ciang hun hoihsa nonlo uhi. Tua mah bangin, i pate khang pan en leuleu leng; suahtakna i ngah khit Perlimantary Democracy hun, U Nu uk hun pen “hun hoih lai” na hi-a, Ni Win hun ciang, hoih nonlo hi. En toto leng ei sang uzaw Ni Win huna khangte in “hun hoih lai” a cihcih uh pen, Ni Win hun na hi leuleu in, Galkap kumpi hun ciang, hun hoihsa nonlo uhi.

Tua manin HUN KHEMPEUH “HUN HOIH LAI” hikhin ka ci nuam hi. Alangkhat pan a sialamin ngaihsun leng belh Hun khempeuh SIA khinkha ding hi. Ei tungsiah a, “hun hoih lai” a cici thei zel, i pu, i pa, i ute nuntakzia tawh i etkik leuleu ciang, hi bangin kimu thei hi. I pute in Mikang kumpi hun, hun hoih a cih theihna in, amau cidam pen hunk um 20-25 pan 45-50 kim aphak hun, na sep hat laitak, sum le pai muh theih lai, zonzawh lai hun na hi gige hi.

Amau kum 50 hong val khit ah kumpi kilaih in, a ci uh zong nidangzaha dam nonlo, khanghamta, sum le pai zonna-ah zong hong hamsat pian ciang, U Nu hun pen, hun hoih nonlo hong suak mawk hi. I pate khang zong en leng, tua bangmah in i mu ding hi. I uzawte nuntakzia zong en leng, khangno hun, cidam hun, nasep hat hun, adiakdiakin sumlepai zon zawh hun, neih le gam i tom zawh hun pen “hun hoih lai” ahi hi. Tua manin van man bangzah in khang tase leh cidamin sumnu sumpa na zonzawh leh nang adingin tu hun zong “hun hoih lai” hi pah lel hi.

Atawpna ah “ Hun Hoih Lai” i cih pen, kumpi le ki-ukna tawh kisai lo, Van man kiam le khan tawh zong kisai lo a, ei mah mimal khat ciat khangno hun, cidam hun, nasep zawh hun, sum zonzawh hun tawh kisaizaw hi. Hun hitaleh kumpi le ki-ukna hitaleh a ma pianzia zuiin hong kikhel toto lel dinga, ei vaihawm zawh zong hikhin lo hi. Vanman i cihte zong leitung thuluanzia tawh kizui-in hong kikhel zel lel ding hi. Bangbang hileh a thupi pen in, a lei nading sum i neih ding hizaw a, leizo peuh leng van man khan hang phamawh kisa lua khol lo ding hi.

Mi kimkhat-te ading bangin “hun hoih’ tawntuna, pawl khatte adingin hoihlo den thei mai hi. Hun hoih/hoihlo pen ei tungah kinga zaw hi. I khangno hun, i cidam hun hi-in, hun manphate mawk beisak lo-a, i hanciam ding ei mah mimal khatciat i vaipuak ahi hi. Sunmang manin ni i tumsak leh “hun hoih lai” in hong taisai, hong nusia lel ding hi. Tua hi-in ka neulai a, “hun hoih lai” a cih hun in, piang nuam sing e… ci a, mawk omom in, sunmang sungah a kidiahdiahkha i om leh tu laitak pen “hun hoih lai” hi; diangin la, hanciam in ci’n Tongsan pan i kihanthawn hi. “Hun Hoih” in nang ading ahi hi. Michael Suan Lian Pau